تانىسىپ, ءجون سۇراسقان سوڭ, كۇرەكتەي الاقانىمەن جول نۇسقاي ءجۇرىپ, جادىگەرلەر جينالعان ءۇيدىڭ ەسىگىن اشتى. قوس بولمەسى تولعان زات. كوبىسى كەشەگى كەڭەس وكىمەتى تۇسىنداعى تۇرمىستىق دۇنيەلەر. مايلى بوياۋمەن جازىلعان ازدى-كوپتى كارتينالار دا بار ەكەن. سوعان قاراعاندا, ءوزى دە ونەردەن قۇرالاقان ەمەستەي كورىندى.
– زەينەتكەرلىككە دەيىن قورىقشىلىق قىزمەتتە بولدىم. تابيعاتتى قورعادىم. ول كەزدە ماڭايدا اڭ-قۇس كوپ ەدى. ءسويتىپ ءجۇرىپ, كونە جادىگەرلەردى دە جيناستىردىم. ەرمەگىم دەسە دە بولادى. كەي-كەيدە سۋرەت تە سالاتىنمىن, – دەيدى باقىت جۇماش ۇلى سورەلەردە قاز-قاتار تىزىلگەن زاتتاردى تانىستىرا ءجۇرىپ.
نە جوق دەيسىز بۇل جەردە؟ قىرقىنشى جىلعى تارازى, XVIII عاسىرداعى اربانىڭ اعاش دوڭگەلەگى, شوق ۇتىك, توق ۇتىكتىڭ ءتۇر-ءتۇرى, كەروسين شام سەكىلدى دۇنيەلەردى وسى مۋزەي-ۇيدەن تاباسىز. ءيا, مۋزەي-ءۇي دەسە دە بولعانداي. مۇنداعى كەيبىر دۇنيە ۇلكەن مۋزەيلەردە جوق. بۇگىنگى زاماننىڭ بالاسى پاتەفوندى بىلەر مە ەدى؟ كىلتى ءبىر قارىس ق ۇلىپ, 1953 جىلى جاسالعان اعاش ورىندىق سەكىلدى جادىگەرلەر دە جەتەرلىك.
سورەلەردى كوزبەن شولا ءجۇرىپ, وسىلاردىڭ ىشىندەگى ەڭ قۇندىسى قايسىسى دەسەك, جەكە-دارا تۇرعان جەز شاۋگىمدى كورسەتتى. بەس ليترلىك بۇل شاۋگىمدى ءبىر ەشكى, ءبىر قارىن ماي بەرىپ ساتىپ الىپتى. ءتۇپ جاعىندا تۋلادان شىققانى بەلگىلەنىپتى. زەرتتەگەندەي بولىپ, جادىگەرلەر تۋرالى ءارتۇرلى اقپارات كوزدەرىنە زەر سالساق, 1930 جىلدارى جاسالعان سيرەك كەزدەسەتىن شاۋگىم ەكەن.
تىزە بەرسەك, جادىگەر كوپ. ءتىپتى تۇرىپ جاتقان ءۇيى تولى كونە زات. كوبىن سۇراعاندارعا بەرە دە سالعان ەكەن. مىنە, قابانبايدا كوپشىلىك بىلە بەرمەيتىن وسىنداي مۋزەي-ءۇي بار.
شىعىس قازاقستان وبلىسى,
تارباعاتاي اۋدانى
