كوللاجدى جاساعان – قونىسباي شەجىمباي, «EQ»
مينيسترلىكتىڭ تاراتقان اقپاراتىنا سۇيەنسەك, ءبىلىم سالاسىندا ساپانى قامتاماسىز ەتۋ كوميتەتى جىل سوڭىنا دەيىن پروفيلاكتيكالىق باقىلاۋ جۇرگىزۋ ءۇشىن 2 487 ءبىلىم بەرۋ ۇيىمىن انىقتاعان. وسىعان دەيىن, انىعى جاڭا وقۋ جىلىنىڭ باسىندا ءبىلىم بەرۋ سالاسىنداعى ساپانى قامتاماسىز ەتۋ جونىندەگى اۋماقتىق دەپارتامەنتتەر 422 ءبىلىم بەرۋ ۇيىمىندا باقىلاۋ-باعالاۋ ءىس-شارالارىن جۇرگىزگەن ەدى. ول وقۋ ۇدەرىسىندەگى پروبلەمالاردى انىقتاۋعا, وقۋ ۇدەرىسىنىڭ مەملەكەتتىك جالپى ءبىلىم بەرۋ ستاندارتى مەن بىلىكتىلىك تالاپتارىنا سايكەستىگىن انىقتاۋعا باعىتتالدى.
ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ وسى ءىس-شاراعا قاتىستى: «وتكەن جىلى كوميتەت پەن ونىڭ اۋماقتىق دەپارتامەنتتەرى 2 624 ءبىلىم بەرۋ ۇيىمىندا ءتۇرلى تەكسەرۋ جۇرگىزدى, ونىڭ ىشىندە مەملەكەتتىك اتتەستاتتاۋ, پروفيلاكتيكالىق باقىلاۋ, شاعىمدار بويىنشا جوسپاردان تىس تەكسەرۋلەر بولدى. تەكسەرۋ ناتيجەسىندە مۇعالىمدەردىڭ بىلىكتىلىگىن ارتتىرۋ كۋرستارىنىڭ ۋاقتىلى اياقتالماۋى, مەكتەپتەردىڭ ماتەريالدىق-تەحنيكالىق بازاسىنىڭ تالاپقا ساي قامتاماسىز ەتىلمەۋى فاكتىلەرى انىقتالدى», دەپ ءتۇسىندىردى.
نەگىزى مونيتورينگ جاساۋ, سونداي-اق باعالاۋ قىزمەتى – ءبىلىم بەرۋ قىزمەتىنىڭ ساپاسىن, ءبىلىم بەرۋ ۇدەرىسىنە قاتىسۋشىلاردىڭ قۇقىقتارى مەن قاۋىپسىزدىگىن قورعاۋدى قامتاماسىز ەتۋ ماقساتىندا جۇرگىزىلەتىن جۇمىس.
