توسىننان كەلگەن وزگەرىس ءبوريستىڭ اناسى اتى جامان اۋرۋعا شالدىققاننان كەيىن باستالدى. ونىڭ اناسىنا دەگەن ماحابباتى ەرەكشە-تۇعىن. ناۋقاس ادامعا كۇتىم جاساي المايتىنىن تۇسىنگەندە, جۇرەگى ەزىلدى. سەبەبى جۇمىسىن تاستاسا, كۇنكورىسى مۇڭعا اينالادى. وسى ساتتە ول ەلەكترمەحانيكالىق كومەكشى جاسايمىن دەگەن شەشىمگە كەلەدى. ءبىر قىزىعى, سول زاماندا تەلەديداردىڭ ءوزى ناعىز عاجايىپ بولىپ كورىنەتىن. كەڭەس وداعى عارىشتى ەندى يگەرگەن كەزەڭدە, ءبوريستىڭ مۇنداي ماقسات قويۋى – ناعىز باتىلدىق.
1962 جىل. ۇلكەن ىزدەنىستەن كەيىن روبوتحاتشىنىڭ سىزبالارى دايىن بولدى. ال 3 جىلدان كەيىن روبوت قۇرالىپ, ىسكە قوسىلدى. بوريس وعان «ارسيك» دەپ ات قويدى. حابارلاما جازۋ, ادامدارمەن سويلەسۋگە بىردەن 2 ماگنيتوفون, قيمىلداۋىنا 13 ەلەكتر قوزعالتقىش قولدانىلدى. باستاپقى كەزدە قۇرىلعىنىڭ كەمشىن تۇسى وتە كوپ ەدى. دەگەنمەن «چيپ» ۇعىمى ءالى تولىق ەنبەگەن ۋاقىتتا, ارسيك – ونەر تۋىندىسى-تۇعىن.
1966 جىل. تالاپتى جىگىت دىتتەگەن ماقساتىنا جەتتى. قۇلتەمىر ءبوريستىڭ اناسىنا قولعانات بولدى. تاڭەرتەڭ وياتىپ, ءدارىسىن بەرەتىن, قاجەتتى جاتتىعۋىن جاساتاتىن. تەلەديدار, راديو قوسىپ بەرىپ, قوناقتاردى قارسى الاتىن, قوڭىراۋعا جاۋاپ بەرەتىن. ءتىپتى مۇعالىم جىگىتتىڭ كۇن تارتىبىنە دە جاۋاپتى بولدى. سولاي جىلدار جىلجىپ, ءبوريستىڭ اناسى ومىردەن ءوتتى. ول ۇلىنىڭ ونەرتابىسىنا ءدان ريزا ەدى. ءوزى ءۇشىن جاسالعان ارسيكتى جاقسى كورەتىن. سىرقات دەندەپ, كوز جۇمار ساتىندە ۇلى بوريس, قولعاناتى ارسيك جانىندا تۇردى.
2015 جىل. ونەرتاپقىش بوريس گريشين 91 جاسىندا قايتىس بولدى. ارسيك بۇل كەزدە دە يەسىن اقتىق ساپارعا شىعارىپ سالدى. مارقۇمنىڭ تۋىستارى ونى جەرگىلىكتى مۇراجايعا تاپسىردى. وسىلايشا, روبوت 50 جىل بويى جان جولداس بولا ءبىلدى. وسى وقيعانى ەستىگەن جۇرت «قۇلتەمىر دە ماحابباتتان تۋادى ەكەن-اۋ» دەستى...
