فوتو: سەناتتىڭ ءباسپاسوز قىزمەتى
سەناتتىڭ ءباسپاسوز قىزمەتىنىڭ مالىمەتىنشە, دەپۋتات اقسۋ قالاسىنىڭ الەۋمەتتىك جانە سپورت سالاسىنىڭ ۇجىمدارىمەن, سونداي-اق مالايسارى كەنتىنىڭ تۇرعىندارىمەن كەزدەسۋ بارىسىندا اەس قۇرىلىسى جوباسىنىڭ ستراتەگيالىق ماڭىزى تۋرالى ءتۇسىندىرۋ جۇمىستارىن جۇرگىزدى. ول ءوز سوزىندە اتالعان جوبانىڭ ەلىمىزدىڭ ەنەرگەتيكالىق تاۋەلسىزدىگىن قامتاماسىز ەتۋدە ماڭىزى زور ەكەنىن اتاپ ءوتتى.
«اەس سالۋ – قازاقستاننىڭ ەنەرگەتيكالىق قاۋىپسىزدىگىن نىعايتۋعا باعىتتالعان ستراتەگيالىق قادام. پرەزيدەنت ماڭىزدى شەشىمدەر قابىلدادى جانە ازاماتتاردىڭ پىكىرىن ەسكەرە وتىرىپ, جالپىۇلتتىق رەفەرەندۋم وتكىزۋدى ماقۇلدادى. بۇل ءار داۋىسقا ءمان بەرىلەتىن «حالىق ۇنىنە قۇلاق اساتىن مەملەكەت» تۇجىرىمداماسىنىڭ ىسكە اسۋىنىڭ جارقىن مىسالى», دەدى سەناتور.
دەپۋتات سونداي-اق حالىقتىڭ ءبىر بولىگى ەندى قولعا الىنعالى وتىرعان جاڭا سالالارعا قاتىستى الاڭداۋى مۇمكىن ەكەنىنە نازار اۋداردى. وسى ورايدا جوبانىڭ نەگىزگى جاقتارىن جان-جاقتى ءتۇسىندىرىپ, تۇرعىنداردىڭ كوكەيكەستى ساۋالدارىنا جاۋاپ بەردى. ول ازاماتتاردى رەفەرەندۋمعا بەلسەندى قاتىسۋعا شاقىردى.
اقسۋ قالاسى مەن مالايسارى اۋىلىنىڭ تۇرعىندارى پرەزيدەنتتىڭ باستامالارىنا قولداۋ ءبىلدىرىپ, جوبانى جۇزەگە اسىرۋعا قاتىستى ءوز ۇسىنىستارى مەن تىلەكتەرىن ءبىلدىردى. كەزدەسۋ بارىسىندا ەلىمىزدىڭ تۇراقتى دامۋىن قامتاماسىز ەتۋ ءۇشىن ءاربىر ازاماتتىڭ سانالى تاڭداۋىنىڭ ماڭىزدىلىعى ايتىلدى.
