2,3 ملن توننا استىق قامباعا قۇيىلدى. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى كەنەش ءالىمجانوۆتىڭ ايتۋىنا قاراعاندا, گەكتار بەرەكەسى 13 تسەنتنەردىڭ توڭىرەگىندە.
بيىل كوكتەم مەن جازدا ىلعال مول ءتۇستى. ەرتە كوكتەمدە كۇن قاباعى ءبىر اشىلماي, كوكتەمگى ەگىس ناۋقانى دا كەشەۋىلدەپ اياقتالدى. سول سەبەپتى, ەگىننىڭ ءپىسۋى دە باياۋ. «قازگيدرومەت» مەكەمەسىنىڭ بولجامىنا قاراعاندا, قىركۇيەك ايىندا ىلعالدىڭ ورتاشا كورسەتكىشى 80 پايىز بولعان. نوسەر جاۋىن قول بايلاپ, العا ۇمتىلعان قادامدى كەرى كەتىرىپ, بەرەكەسىن العان سوڭ امالسىز كىدىرگەن ديقاندار كۇن اشىلا سالىسىمەن بىلەك بىرىكتىرىپ, ىسكە كىرىسكەن. ءوڭىر قازىر تاۋلىگىنە 200 مىڭ گەكتار القاپتىڭ ەگىنىن ورىپ جاتىر.
جۇمىستىڭ ءونىمدى بولۋى قۋاتتى تەحنيكاعا بايلانىستى. بۇل ورايدا 8,9 مىڭ استىق كومباينى القاپقا شىعارىلعان. ولاردىڭ 4,8 مىڭى – زاماناۋي جوعارى ءونىمدى تەحنيكا. 4,8 مىڭ جۇك كولىگى القاپتان قىرمانعا, قىرماننان ەلەۆاتورلارعا ءدان تاسىمالدايدى. وسى جىلى ءوڭىردىڭ اۋىل شارۋاشىلىعى قۇرىلىمدارى جالپى 28,5 ملرد تەڭگە بولاتىن 246 تراكتور, 115 كومباين ساتىپ الدى.
– وعان قوسىمشا جەڭىلدەتىلگەن نەسيە ارقىلى 80 تراكتور, 140 كومباين, 25 ءارتۇرلى قۇرىلعى الىندى, – دەيدى باسقارما باسشىسى, – قازىر القاپتان جەتكىزىلگەن ءداندى 66 استىق قابىلداۋ كاسىپورنى قابىلداپ, كەپتىرىپ جاتىر. وڭىردەگى استىق قابىلداۋ ورىندارىنا 2,8 ملن توننا ءدان سىيادى. بارلىق مۇمكىندىكتى ەكشەي ساراپتاعاندا, 7,2 ملن توننا استىق ساقتاۋعا مۇمكىندىك بار. بۇل ايماقتاعى بار ىرىزدىقتى تولىق قابىلداي الامىز دەگەن ءسوز.
باسقارما باسشىسىنىڭ ايتۋىنشا, استىق قابىلداۋ ورىندارىنا 558 مىڭ توننا جاڭا استىق ونىمدەرى جەتكىزىلگەن. ونىڭ 60 پايىزى ءۇشىنشى كلاستىڭ تالاپتارىنا ساي. ىلعال مول بولعاندىقتان كەي القاپتار ساپاسى ءسال تومەندەۋ ءونىم بەرىپ جاتىر. ارپانىڭ كورسەتكىشى جاقسى. ورتاشا ەسەپ بويىنشا 98,1 پايىزى – ەكىنشى كلاستى.
جاۋىن-شاشىندى جىلى القاپتاعى استىق قابىلداۋ ورىندارىنا ىلعالدى جەتكىزىلۋدە. سوندىقتان قازىر قابىلداۋ ورىندارى تاۋلىك بويى جۇمىس ىستەپ جاتىر. كەيبىر ەلەۆاتورلاردىڭ الدىندا ۇزىن سونار كەزەك تە پايدا بولدى. مۇنداي كەلەڭسىز كورىنىس اقكول اۋدانىنىڭ ەلەۆاتورىندا بايقالعان. سەبەبىن ساراپتاساڭىز, اۋدان ەلەۆاتورىنا كورشىلەس اۋدانداردىڭ بىرقاتار شارۋاشىلىعى دا استىق تاپسىرادى ەكەن. تاعى ءبىر ايتا كەتەتىن دۇنيە, استىق قابىلداۋ ورىندارىنىڭ دەمالىس كۇندەرى جۇمىس ىستەمەۋى. قازىر بۇل ماسەلە دە وڭ شەشىمىن تاپتى. كەنەش ءالىمجانوۆتىڭ ايتۋىنا قاراعاندا, ەلەۆاتورلارعا قاتىستى اۋىل شارۋاشىلىعى قۇرىلىمدارىنىڭ وكپە-نازى وڭىردەگى 66 ەلەۆاتوردىڭ ەكەۋىنە عانا بايلانىستى ايتىلعان. تۋىنداعان ماسەلەلەر جەدەل شەشىلدى. بۇل ورايدا وبلىستا كۇزگى دالا جۇمىستارىن ۇيلەستىرەتىن جەدەل شتابتىڭ قۇرىلۋى سەپتىگىن تيگىزىپ وتىر.
– قازىرگى ماڭىزدى ماسەلەنىڭ ءبىرى – استىقتىڭ باعاسى, – دەيدى باسقارما باسشىسى, – ءدان باعاسى وسسە, شارۋالاردىڭ دا ەڭسەسى كوتەرىلىپ قالار ەدى.
ەل ىرىزدىعىن ىسىراپسىز جيناپ الۋ جۇمىسى دالادا دا, استىق قابىلداۋ ورىندارىندا دا قاۋىرت كۇيگە ەنگەن. وڭىردەگى 265 ءدان كەپتىرەتىن قۇرىلعى ساعاتىنا 9,6 مىڭ توننا استىق كەپتىرە الادى. بۇل جۇمىسقا 22,8 مىڭ توننا جەڭىلدەتىلگەن جانار-جاعارماي, 1,8 مىڭ توننا گاز بولىنگەن.
شەشۋشى شاقتا ۇيىمشىلدىقپەن ىسكە كىرىسكەن ديقاندار ەل ىرىزدىعىن مولايتىپ, جەردە وسكەن ءداندى جەردە قالدىرمايمىز دەپ ەڭبەك مايدانىندا ءجۇر.
اقمولا وبلىسى
