شەنەۋنىك سىبايلاس جەمقورلىق قىلمىسى ءۇشىن 7,5 جىلعا سوتتالدى.
«وبلىس بويىنشا ۆەتەرينارلىق باقىلاۋ جانە قاداعالاۋ ينسپەكتسياسىنىڭ باسشىسى لاۋازىمدى تۇلعا بولا تۇرا, بىرنەشە رەت جك ديرەكتورىنان 1,4 ملن تەڭگە جانە جالپى قامقورلىعى ءۇشىن شق باسشىسىنان 500 مىڭ تەڭگە پارا العان. سونىمەن بىرگە بقو ينسپەكتسياسىنىڭ باس مامانىمەن جانە ۆەتەرينارلىق ينسپەكتورىمەن الدىن الا ءسوز بايلاسۋ ارقىلى جك ديرەكتورىنان جالپى قامقورلىعى ءۇشىن 1,8 ملن تەڭگە پارا الۋدى ۇيىمداستىرعان.
جك ديرەكتورى جانە شق باسشىسى قر شەكاراسىندا كولىكتىڭ زاڭسىز قوزعالىسى ءۇشىن پارا رەتىندە 3,3 ملن تەڭگە مەن 500 مىڭ تەڭگەنى جەكە وزدەرى بەرگەن. سوتتالۋشىلاردىڭ كىناسى سوتتالۋشىلاردىڭ, كۋالاردىڭ ايعاقتارىمەن, اقشا قاراجاتىن اۋدارۋ تۋرالى تۇبىرتەكتەرمەن, تەرگەۋ ارەكەتتەرىنىڭ بەينەجازبالارىمەن, مامانداردىڭ قورىتىندىلارىمەن دالەلدەندى» دەپ جازدى سوتتان.
سوتتالۋشىلاردىڭ اسىراۋىندا كامەلەتكە تولماعان بالالاردىڭ بولۋى, كىنالارىن مويىنداۋى – جازا مەن قىلمىستىق جاۋاپتىلىقتى جەڭىلدەتەتىن ءمان-جاي رەتىندە تانىلدى, اۋىرلاتاتىن ءمان-جاي رەتىندە قابىلداعان انتتى بۇزۋى تانىلدى.
سوتتالۋشىلار تاعىلعان ايىپ بويىنشا كىنالى دەپ تانىلدى. ينسپەكتسيا باسشىسى 7 جىل 6 ايعا باس بوستاندىعىنان ايىرىلدى.
باس مامان مەن ۆەتەرينارلىق ينسپەكتورعا پارا سوماسىنىڭ 60 ەسەلەنگەن مولشەرىندە ايىپپۇل تاعىلدى. جك جانە شق باسشىلارىنا – پارا سوماسىنىڭ 26 ەسەلەنگەن مولشەرىندە ايىپپۇل سالىندى. بارلىعى مەملەكەتتىك قىزمەتتە جانە مەملەكەتتىك ۇيىمداردا قىزمەت اتقارۋ قۇقىعىنان ءومىر بويىنا ايىرىلدى.
سوت ۇكىمى زاڭدى كۇشىنە ەنگەن جوق.
