كەيىنگى بىرنەشە جىلدا الەم حالقىنىڭ نازارىن اۋدارعان ەتنوسپورتقا قىزىعاتىندار ءبىرشاما. مۇنى « ۇلى دالا دۇبىرىندە» توعىزقۇمالاقتان سايىسقا تۇسۋگە كەلگەن ۇمىتكەرلەردىڭ سانىنان انىق اڭعاردىق. ماسەلەن, بيىلعى جارىستا كولۋمبيا, فرانتسيا, گەرمانيا, اقش, قىتاي, لاتۆيا, افريكا, اراب ەلدەرى سىندى 41 مەملەكەتتەن كەلگەن 114 قاتىسۋشى شەبەرلىكتەرىن سىنادى.
«توعىزقۇمالاقتىڭ دامۋىنا دۇنيەجۇزىلىك كوشپەلىلەر ويىنىنىڭ استانادا ءوتۋى دە جاڭا سەرپىن بەردى. ساعات 09.00-دەن 21.00-گە دەيىن 200 مىڭنان استام ادام مەكتەپتەردە, ۋنيۆەرسيتەتتەردە, كوللەدجدەردە, جۇمىس ورىندارىندا ءوز تاقتالارىن پايدالانا وتىرىپ, بليتس فورماتىندا توعىزقۇمالاق وينادى. سونىمەن قاتار وسى جارىسقا دايىندىق بارىسىندا ءبىز عارىشقا توعىزقۇمالاق تاقتاسىن اتتاندىردىق. ول 35 شاقىرىمداعى اۋە كەڭىستىگىنە ۇشىرىلدى», دەدى دۇنيەجۇزىلىك جانە توعىزقۇمالاق سپورتى فەدەراتسياسىنىڭ پرەزيدەنتى ءاليحان بايمەنوۆ.
ايتا كەتەيىك, 2020 جىلى توعىزقۇمالاق يۋنەسكو شەشىمىمەن ادامزاتتىڭ مادەني مۇرا تىزىمىنە ەنسە, 2022 جىلى دۇنيەجۇزىلىك توعىزقۇمالاق فەدەراتسياسىنىڭ شەشىمىمەن 9 قىركۇيەك «توعىزقۇمالاق كۇنى» بولىپ بەكىتىلدى. سوعان سايكەس كوشپەلىلەر ويىنى كەزىندە سپورتشىلار جارىستى «توعىزقۇمالاق كۇنى» ساعات 09.09-دا العاشقى ءجۇرىسىن 9 تاقتادان 9 ۇياشىققا 9 ويىنشى سالۋ ارقىلى باستاپ, زياتكەرلىك ويىننىڭ كورىگىن قىزدىرعان ەدى.
وسىلايشا, 4000 جىلدىق تاريحى بار ۇلتتىق ويىنىمىز تورتكۇل تاراپقا تۇتاس تانىلدى. جالپىكوماندالىق ەسەپتە قازاقستان قۇراماسى كوش باستادى. ال ەكىنشى ورىندى قىرعىزستان, ءۇشىنشى ورىندى رەسەي جانە موڭعوليادان كەلگەن ويىنشىلار يەلەندى.
