سۋرەت: عالىمجان قارامان ۇلى/Kazinform
قازاق-بريتان ۇكىمەتارالىق كوميسسيا وتىرىسىندا اعىلشىن ءتىلى ءپانىن ءتيىمدى وقىتۋ ماسەلەلەرى ايتىلعان ەدى. ارنايى قۇرىلعان جۇمىس توبى عىلىمي زەرتتەۋلەر جۇرگىزىپ, ۇسىنىستار ءبىلدىردى. سولاردىڭ ءبىرى – ەلىمىزدەگى مۇعالىمدەردىڭ ۇزدىكسىز كاسىبي دامۋى ءۇشىن وزىق بريتانيالىق ادىستەمەمەن تەرەڭىرەك تانىسۋ جوباسى بولدى.
«ارىپتەستەرىمىزدىڭ تاجىريبەلەرى, ارينە, الەمگە تانىلىپ جاتىر. جاڭا اقپاراتتى وسى كىسىلەردەن الىپ, وزىمىزدەگى ماسەلەلەردى ءتيىمدى شەشۋ ءۇشىن وسىندا كەلىپ وتىرمىز», دەدى وقۋ-اعارتۋ مينيسترلىگى ورتا ءبىلىم كوميتەتىنىڭ باسقارما باسشىسى ءاليا چوكۋشەۆا.
جيىرما ەكى ادامنان تۇراتىن دەلەگاتسيا قۇرامىندا جوعارى وقۋ ورىندارىنىڭ باسشىلارىنان باستاپ, اۋىل مۇعالىمدەرىنە دەيىن بار. شاقىرۋشى تاراپ – ۇلىبريتانيا حالىقارالىق ساۋدا دەپارتامەنتى جانە بريتان كەڭەسى. ولار ۇزدىكسىز كاسىبي دامۋ جۇيەسى بويىنشا پانەلدىك پىكىرتالاستار وتكىزىپ, مەكتەپتەر مەن ۋنيۆەرسيتەتتەرگە ساپارلار ۇيىمداستىردى.
« ۇلىبريتانيا مۇعالىمدەر دايىنداۋدا وتە قاتاڭ الەمدىك ستاندارتتاردى ۇستانادى. ءبىز ۇزدىكسىز كاسىبي دامۋ ماسەلەسىنە ەرەكشە ءمان بەرەمىز. وسى ءبىلىمىمىزدى قازاقستاندىق ارىپتەستەرىمىزبەن بولىسۋگە دايىنبىز», دەدى لوندون ۋنيۆەرسيتەتى, كوممۋنيكاتسيا جانە قوعام مەكتەبىنىڭ باسشىسى ليۆيا ماتەي.
ساپار بارىسىندا مۇعالىمدەردى سەرتيفيكاتتاۋ, ولار ءۇشىن بىلىكتىلىكتى ارتتىرۋ كۋرستارىن ۇيىمداستىرۋ جانە مەكتەپ باسشىلارى مەن ادىسكەرلەردى قولداۋ ماسەلەلەرى دە باستى نازاردا بولدى. ۇزدىكسىز كاسىبي دامۋدىڭ ءتيىمدى جولدارىن ۇيرەنۋ ءۇشىن وتاندىق پەداگوگتەر بريتانيالىق ارىپتەستەرىمەن تىعىز بايلانىس ورناتتى.
