قاتىسۋشى ەلدەر سانى بويىنشا اتالعان ءبىلىم باسەكەسى حالىقارالىق ماتەماتيكا وليمپياداسىنان كەيىنگى ەكىنشى ۇلكەن عىلىمي سايىس. ەلىمىزدىڭ قۇراما كومانداسى ينفورماتيكا جارىسىنا بيىل جيىرما جەتىنشى رەت قاتىسىپ وتىر.
بيىل ۇزدىك ناتيجە كورسەتكەن قازاقستان كومانداسىنىڭ قۇرامىندا اتىراۋ وبلىستىق №1 ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى مانسۇر تايماس, الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 10-سىنىپ وقۋشىسى ماكسيم تسوي, الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 11-سىنىپ وقۋشىسى نازار سەرازيتدينوۆ, قىزىلوردا وبلىستىق ء«بىلىم-يننوۆاتسيا» ليتسەي-ينتەرناتىنىڭ 10-سىنىپ وقۋشىسى احمەت يسا بار.
«اتالعان بايقاۋ ەكى كۇننەن تۇرادى, وندا قاتىسۋشىلارعا الگوريتمدىك ەسەپتەردى شەشۋ جانە باعدارلامالاۋ تاپسىرمالارى بەرىلگەن. وقۋشىلار جەكە دارا باق سىنايدى. ايتا كەتەرلىگى, ءار ەلدەن وزدەرىنىڭ ۇلتتىق وليمپيادالارىندا جەڭىمپاز اتانعان ءتورت وقۋشى قاتىسادى. قازىر حالىقارالىق دەڭگەيدەگى بەدەلدى 7 وليمپيادا بار. ولار ماتەماتيكا, فيزيكا, حيميا, ينفورماتيكا, گەوگرافيا, لينگۆيستيكا, بيولوگيا پاندەرىنەن جىل سايىن وتەدى. سونىڭ ءبىرى – حالىقارالىق ينفورماتيكا وليمپياداسى. اتالعان ءبىلىم بايگەسى العاش رەت 1989 جىلى ءوتتى. ال قازاقستان قۇراما كومانداسى بۇل سايىسقا 1998 جىلدان بەرى قاتىسىپ, 3 التىن, 27 كۇمىس جانە 41 قولا مەدالعا قول جەتكىزدى», دەيدى دارىن رەسپۋبليكالىق عىلىمي-پراكتيكالىق ورتالىعى ديرەكتورىنىڭ ورىنباسارى نۇرلان جۇماگەلدى.
بۇل جەتىستىكپەن وقۋشىلارىمىز بيىلعى جەتى بەدەلدى حالىقارالىق وليمپيادالارعا قاتىسۋىن قورىتىندىلايدى. 2023-2024 وقۋ جىلىنىڭ ناتيجەسى بويىنشا ەلىمىزدىڭ ۇلتتىق قۇراماسى IMO (ماتەماتيكا), IPhO (فيزيكا), IBO (بيولوگيا), IChO (حيميا), IOL (لينگۆيستيكا), IGeO (گەوگرافيا) جانە IOI (ينفورماتيكا) سايىستارىنا قاتىسىپ, 2 التىن, 12 كۇمىس, 12 قولا مەدال جانە ءبىر ديپلومعا يە بولدى.
