ونىڭ «ورتالىق ازيا بيدايىنا تولىق گەنومدى سكانەرلەۋ, اۆتوماتتاندىرىلعان فەنوتيپتەۋ جانە ينتەنسيۆتى سەلەكتسيا ادىستەرى ارقىلى قۇندىلىقتار قوسۋ» تاقىرىبىنداعى جوباسى عىلىم جانە جوعارى ءبىلىم مينيسترلىگىنىڭ گرانتىنا يە بولدى. ءۇش جىلعا جوسپارلانعان جۇمىس ناتيجەسىندە 450-گە تارتا بيداي سۇرىبىنىڭ گەنەتيكاسى ستاندارتتالادى.
«بەلگىلى ءبىر ورتاعا بەيىمدى سۇرىپتى شىعارۋعا 14-12 جىل ۋاقىت كەتەدى. بۇل – وتە ۇزاق ۋاقىت, كوپتەگەن رەسۋرستى تالاپ ەتەدى. ال مەن زەرتتەپ جاتقان تەرەڭ گەنەتيكالىق تالداۋ اتالعان ۋاقىتتى التى ەسەگە دەيىن قىسقارتادى. ءبىر داقىلدىڭ گەنەتيكالىق كودى 16 ميلليارد ارىپتەن تۇرادى. كومپيۋتەرلىك ولشەممەن العاندا اربىرىنەن 16 گيگابايت اقپارات الىنادى. سونىمەن قاتار جىلدام سەلەكتسيالاۋ باعىتىنىڭ اۋقىمى كەڭەيەدى», دەيدى قانات ەرمەكباەۆ.
جاس عالىم وسى جوبا اياسىندا ورتالىق ازيا بيدايىنىڭ تولىق گەنومدىق گەنەتيكالىق (Whole Genome Sequencing) ماعلۇماتتارىن الىپ, زەرتتەي باستادى. سونداي-اق ورتا ازيا بويىنشا العاشقىلاردىڭ ءبىرى بولىپ جەتىسۋ ۋنيۆەرسيتەتى بازاسىندا قۇرىلعان «Speed Breeding» پلاتفورماسى كەڭەيتىلىپ, «ۇشقىشسىز ۇشۋ اپپاراتى» قولدانىلماق. ەڭ ماڭىزدىسى, «Speed Breeding», ياعني جىلدامداتىلعان سەلەكتسيا تەحنولوگياسىنىڭ تولىق الەۋەتى عالىمدارىمىزعا ءبىر جىلدا التى رەت ءونىم الىپ, ەلىمىزدەگى ءداندى-داقىلداردىڭ سەلەكتسياسىن ايتارلىقتاي جىلدامداتۋعا مۇمكىندىك بەرەدى.
