فوتو: t.me/UKIMET
«وڭتۇستىك» يندۋستريالدى ايماعىندا ولجاس بەكتەنوۆ سۋسىندارعا ارنالعان اليۋميني قالبىرلار مەن قاقپاقتار شىعاراتىن QazAlPack كاسىپورنىنا باردى. كاسىپورىن جىلىنا 1,2 ملرد دانا بانكا شىعارادى. زاۋىتتا 360 ادام جۇمىس ىستەيدى.
QazAllPack جشس ديرەكتورى رۋستام سۋحوۆ اۆتوماتتاندىرىلعان ءوندىرىس پروتسەسىن تانىستىرىپ, قاپتامانىڭ بۇل ءتۇرى ءوزىنىڭ تۇتىنۋشىلىق قاسيەتتەرى بويىنشا ەڭ پروگرەسسيۆتى ءارى ەكولوگيالىق تازا ەكەنىن ايتتى. زاماناۋي ساپا ستاندارتتارى بويىنشا وندىرىلەتىن ونىمدەر ىشكى نارىقتا ساتىلىپ, وزبەكستان, قىرعىزستان, رەسەي, تاجىكستان ەلدەرىنە ەكسپورتتالادى. مەملەكەتتىك قولداۋ شارالارى مەن يندۋستريالىق ايماقتا قۇرىلعان قولايلى جاعدايلاردىڭ ارقاسىندا كومپانيا 2025 جىلعا قاراي ەكىنشى وندىرىستىك جەلىنى ىسكە قوسىپ, ءونىم كولەمىن 2,3 ملرد بانكاعا دەيىن ارتتىرۋدى جوسپارلاپ وتىر.
«شىمكەنت قالاسىنىڭ جالپى ونەركاسىپ نەگىزىن اۋدانى 1 276 گەكتاردى قۇرايتىن 7 ونەركاسىپ ايماعى, ونىڭ ىشىندە, بۇگىندە 293 جوبا ىسكە اسىرىلعان, 8,2 مىڭنان استام جاڭا جۇمىس ورنى اشىلعان. «وڭتۇستىك» ينۆەستيتسيالىق پورتفەلىنە جالپى قۇنى 151,3 ملرد تەڭگەنى قۇرايتىن 70 جوبا كىرەدى», دەدى شىمكەنت قالاسى اكىمىنىڭ ورىنباسارى ايدىن كارىموۆ.
ۇكىمەت باسشىسى سونداي-اق «پەتروقازاقستان ويل پروداكتس» مۇناي وڭدەۋ زاۋىتىندا ءتۇرلى وتىن تۇرلەرىن ءوندىرۋدىڭ تەحنولوگيالىق تىزبەگىمەن تانىستى. كاسىپورىن جىلىنا 6 ملن توننا مۇناي وڭدەيدى. شىعارىلاتىن ءونىم تۇرلەرىنىڭ قاتارىنا اۆتوموبيل بەنزيندەرى, ديزەل وتىنى, اۆياتسيالىق كەروسين, سۇيىتىلعان كومىرسۋتەك گازى, مازۋت جانە باسقا دا مۇناي ونىمدەرى كىرەدى.
مۇناي وڭدەۋ زاۋىتىنىڭ وندىرىستىك قۋاتىن جىلىنا 12 ملن توننا قايتا وڭدەلگەن مۇنايعا دەيىن ۇلعايتۋ جوباسى قولعا الىنعان. ولجاس بەكتەنوۆ جانار-جاعارماي نارىعىنداعى تۇراقتىلىقتى قامتاماسىز ەتۋدىڭ ماڭىزدى ەكەنىن اتاپ ءوتتى.
