كەزدەسۋدىڭ باستى تاقىرىبى – «ەلىمىزدەگى مەتاللۋرگيالىق كاسىپورىنداردى عىلىمي-تەحنولوگيالىق دامىتۋ». ساراپشىلار ارنايى قۇرىلعان توپتاردا جۇمىس ىستەي وتىرىپ, بىرنەشە تەحنولوگيالىق ۇسىنىس ازىرلەدى.
عىلىم جانە جوعارى ءبىلىم ۆيتسە-ءمينيسترى دارحان احمەد-زاكيدىڭ ايتۋىنشا, حاكاتون – ەلىمىزدەگى عىلىمدى كوممەرتسيالاندىرۋدىڭ يننوۆاتسيالىق فورماتى.
«بۇگىنگى تاڭدا ءبىزدىڭ الدىمىزدا ىرگەلى زەرتتەۋلەردى دامىتۋ عانا ەمەس, سونىمەن قاتار عىلىمي ازىرلەمەلەردى وندىرىسكە بەلسەندى ەنگىزۋ مىندەتى تۇر. حاكاتون – عالىمدار مەن ونەركاسىپشىلەر ءۇشىن ناقتى تەحنولوگيالىق قيىندىقتاردى شەشۋدە كۇش بىرىكتىرۋدىڭ جاقسى مۇمكىندىگى. مۇنداي يننوۆاتسيالىق فورماتتار ەلدەگى عىلىم مەن تەحنولوگيالىق ۇدەرىستىڭ تابىستى كوممەرتسيالانۋىنىڭ نەگىزى. تەحنولوگيالىق سىن-قاتەرلەردى شەشۋدە عالىمدار مەن ونەركاسىپشىلەردىڭ كۇش-جىگەرىن بىرىكتىرۋدىڭ ماڭىزى جوعارى», دەدى ول.
ەلىمىزدەگى «ERG» باس ديرەكتورىنىڭ ورىنباسارى يوحەن بەربنەر حاكاتوننىڭ عىلىمي-تەحنولوگيالىق دامۋ كارتاسىن قالىپتاستىرۋعا جانە وتاندىق ازىرلەمەلەرگە نەگىزدەلگەن شەشىمدەردى ازىرلەۋگە كومەكتەسەتىنىن اتاپ ءوتتى. عالىمدار مەن وندىرۋشىلەر جەر قىرتىسىنىڭ تەرەڭىندە جاتقان كوكتال بوكسيتىنىڭ سيپاتتاماسىن, ولاردى ءوندىرۋ ادىستەرىن, اليۋميني رۋداسىنداعى جوعارى ىلعالدىلىق ماسەلەلەرىن, بوكسيتتەردى قايتا وڭدەۋدىڭ يننوۆاتسيالىق تەحنولوگيالارىن جانە ءاليۋمينيدىڭ ساپاسىن جاقسارتۋ جولدارىن زەرتتەدى. سونداي-اق اليۋميني زاۋىتتارىنىڭ جابدىقتارىن جاڭعىرتۋ, اليۋميني ءوندىرىسىنىڭ قالدىقتارىن قايتا وڭدەۋ جانە پاۆلودار اليۋميني زاۋىتىنىڭ ونىمدەرىنەن گاللي مەن سكانديدى ءتيىمدى الۋ ماسەلەلەرى تالقىلاندى.
