سۋرەت: alashorda.kz
ليتسەي 3–11-سىنىپ ارالىعىنداعى 700 بالاعا ارنالعان. سىنىپتاردا وقۋشى سانى 16–18 وقۋشىدان اسپايدى. مۇندا شاحمات, توعىزقۇمالاق سىندى ينتەللەكتۋالدى ويىندارعا باسىمدىق بەرىلىپ ءارى ۇلتتىق اسپاپتار ۇيىرمەلەرى جۇمىس ىستەيدى. پاندىك وليمپياداعا باعدارلى دايىندىق جانە ۇلتتىق بىرىڭعاي تەستىلەۋگە, «IELTS» ەمتيحانىنا كەشەندى دايىندىق جۇرگىزىلەدى. ەڭ باستىسى, اتالعان مەكتەپ قازاق تىلىندە تەرەڭدەتە ءبىلىم بەرەدى, سونداي-اق بالانىڭ بويىنا ۇلتتىق تاربيەنى سىڭىرەدى.
ء«بىز ۇلتتىق مەكتەپتىڭ كەرەگەسىن كەڭەيتىپ, ساپاسىن ارتتىرعىمىز كەلەدى. سەبەبى ماعجان جۇماباەۆ: «مەكتەبىمىزدى تازا, بەرىك ءھام قازاق جانىنا ۇيلەسەتىن نەگىزدە قۇرا بىلسەك, كەلەشەگىمىز ءۇشىن تايىنباي سەرتتەسۋگە بولادى», دەگەن ەدى. باستى ارمانىمىز – قازاقتىڭ جانىنا جاقىن مەكتەپتى قۇرۋ. مۇستافا شوقاي «بالا قاي تىلدە ءبىلىم السا, ءتۇبى سول ۇلتقا قىزمەت ەتەدى», دەسە, ال جۇسىپبەك ايماۋىت ۇلى جات جۇرتتىڭ تاربيەسىن العان بالا ۇلتقا قىزمەت قىلىپ جارىتپايتىنىن ايتقان. ءبىز ۇلتقا قىزمەت قىلاتىن, قازاق ارمانىن ورىندايتىن مەكتەپتىڭ نەگىزىن قالاعىمىز كەلەدى. ەكى جىل بۇرىن «Qazbilim» ۇلتتىق ليتسەيلەرىنىڭ ىرگەتاسىن قالاپ باستاعانبىز. ال قازىر ەلىمىزدىڭ سەگىز قالاسىندا توعىز مەكتەپ جۇمىس ىستەپ جاتىر», دەدى «Qazbilim» جوبالارىنىڭ نەگىزىن قالاۋشى اياتجان احمەتجان ۇلى.
ايتا كەتەيىك, قازاق تىلىندە تەرەڭدەتە ساباق بەرەتىن ۇلتتىق ليتسەيلەر بۇعان دەيىن اتىراۋ, اقتاۋ, قوستاناي, قاراعاندى, الماتى, شىمكەنت, قىزىلوردا قالالارىندا اشىلعان ەدى. ال نەگىزگى ادىستەمەلىك ورتالىق, باسقاشا ايتساق, ۇلتتىق مەكتەپتەر جەلىسىنىڭ وزەگى استاناداعى وسى مەكتەپتە بولماق.
