اشىلۋ سالتاناتىندا كوپشىلىك الدىنا شىققان ءبىرىنشى كوماندا – العاشقى دۇنيەجۇزىلىك كوشپەلىلەر ويىندارىن قابىلداعان قىرعىزستان بولدى. تۇڭعىش ويىندارعا 19 ەلدەن سپورتشىلار قاتىسقان بولاتىن. بۇل قازاقستان استاناسىنداعى ويىندارعا كەلگەن كوماندالار سانىنىڭ تورتتەن بىرىنە تەڭ. سونىمەن بىرگە استاناداعى ويىندارعا كوشپەلى مادەنيەتى جوق ەلدەر دە قاتىسىپ جاتىر.
بۇل جىلى امەريكا قۇرلىعىنىڭ بارلىق ەلىنەن سپورتشىلار كەلدى. امەريكالىق كوۆبويلار برازيليا, ۆەنەسۋەلا, دومينيكان رەسپۋبليكاسى, ارگەنتينا, باربادوس, چيلي, كولۋمبيا, ەكۆادور, مەكسيكا, پاناما, ۋرۋگۆاي وكىلدەرى جارىس جولىنا شىقپاق.
V دۇنيەجۇزىلىك كوشپەلىلەر ويىندارىنا كەلگەن ەڭ ءىرى دەلەگاتسيالار – قازاقستان, قىرعىزستان, رەسەي, موڭعوليا جانە پاكىستاننىڭ كوماندالارى. ەڭ كىشكەنتاي كوماندا – 1 عانا سپورتشىدان تۇراتىن شۆەيتساريا قۇراماسى.
الەم ەلدەرى ءۇشىن وليمپيا ويىندارى قانداي ماڭىزدى بولسا, كوشپەلى مادەنيەتتىڭ بەسىگى سانالاتىن قازاقستان ءۇشىن دۇنيەجۇزىلىك كوشپەلىلەر ويىندارى سونداي ماڭىزدى.
بۇركىتشىلەر سايىسىندا جەڭىسكە جەتكەندەر 2000 دوللاردى قالتاسىنا باسادى, ال باسقا سپورت تۇرلەرىنەن التىن مەدال العاندار 1000 دوللارعا يە بولماق.
قازاقستان بيلىگى بۇكىل الەمگە تەلەارنا ارقىلى ترانسلياتسيا جاسايتىن ويىندار بەلگىلى قازاقستاندىق ءانشى ديماش قۇدايبەرگەننىڭ كونتسەرتىمەن اياقتالماق.
الەم تاريحىندا تەرەڭ ءىز قالدىرعان وركەنيەت
V دۇنيەجۇزىلىك كوشپەلىلەر ويىندارىنىڭ اشىلۋ سالتاناتىنا قاتىسقان قازاقستان پرەزيدەنتى قاسىم-جومارت توقاەۆ كوشپەلىلەر وركەنيەتى الەم تاريحىندا تەرەڭ ءىز قالدىرعانىن ايتتى.
«استانا ارەنا» ستاديونىندا وتكەن ءىس-شاراعا وزبەكستان پرەزيدەنتى شاۆكات ميرزيوەۆ, قىرعىزستان پرەزيدەنتى سادىر جاپاروۆ, تۇرىكمەنستان حالىق ءماسليحاتىنىڭ توراعاسى گۋربانگۋلى بەردىمۇحامەدوۆ, تاتارستان رايسى رۋستام ميننيحانوۆ, ساحا رەسپۋبليكاسىنىڭ باسشىسى ايسەن نيكولاەۆ, موڭعوليانىڭ ەكس-پرەزيدەنتى نامبارىن ەنحبايار, ت.ب. قاتىستى.
قاسىم-جومارت توقاەۆ ءوز سوزىندە حالىقارالىق اۋقىمداعى ءىرى جارىسقا قاتىسۋعا كەلگەن باۋىرلاس ەلدەردىڭ باسشىلارىنا, جوعارى مارتەبەلى قوناقتار مەن سپورتشىلارعا العىسىن ءبىلدىردى. ول سونداي-اق كوشپەلىلەر وركەنيەتى الەم تاريحىندا تەرەڭ ءىز قالدىرعانىن, ۇلى دالانىڭ كوشپەلى حالقى ىقىلىم زاماننان ەۋرازيا كەڭىستىگىن مەكەندەگەنىن ايتتى. ءوز زامانىنا ساي يننوۆاتسيالىق تەحنولوگياعا يە بولعان ولار عالامدىق پروگرەسكە ۇلەس قوسقانىن تىلگە تيەك ەتتى.
قازاقستان پرەزيدەنتى قازاق جەرى الەمگە عىلىم مەن گۋمانيستىك يدەيالاردىڭ دامۋىنا ەلەۋلى ۇلەس قوسقان ءال-فارابي مەن قوجا احمەت ياساۋي سەكىلدى كورنەكتى تۇلعالاردى بەرگەنىن جەتكىزدى. اتا-بابالارى قۋاتتى مەملەكەتتەر قۇرىپ, ۇلى دالا توسىندە كولەمى مەن كوركى جاعىنان تاڭداي قاقتىرار وتىرار, تۇركىستان, تاراز, سارايشىق سەكىلدى قالالاردى تۇرعىزعانىن اتاپ ايتتى.
جالپى جۇلدە قورى – 253 ملن تەڭگە
تاتارستان رايسى رۋستام ميننيحانوۆ قازاق تاراپىنىڭ شاقىرۋىمەن V دۇنيەجۇزىلىك كوشپەلىلەر ويىندارىنىڭ اشىلۋىنا قاتىسۋعا استاناعا تابان تىرەدى.
اشىلۋ سالتاناتى الدىندا ونى اقوردا رەزيدەنتسياسىندا قازاقستان پرەزيدەنتى قابىلدادى. ول قاسىم-جومارت توقاەۆتى كوشپەلىلەر ويىندارىنىڭ باستالۋىمەن قۇتتىقتاپ, «كوشپەلى وركەنيەت مادەنيەتىنىڭ جاڭعىرۋى مەن ساقتالۋىنا تەڭدەسسىز ۇلەس قوسادى» دەپ اتاپ ءوتتى. ايتا كەتسەك, رەسەي قۇراماسى قاتارىندا 27 سپورتشى مەن 5 باپكەردەن تۇراتىن تاتارستان كومانداسى دا ونەر كورسەتەدى.
«بريكس سامميتىنە دايىندالىپ جاتقانىڭىزعا قاراماستان, ۋاقىت تاۋىپ ءبىزدىڭ ەلگە كەلىپ وتىرسىز. ءسىز بەن ءبىزدىڭ بىرلەسكەن جوبالارىمىز جوسپار بويىنشا ورىندالىپ جاتىر جانە مەنىڭ تىكەلەي باقىلاۋىمدا», دەدى قاسىم-جومارت توقاەۆ.
ءۇش مىڭ ءارتىستىڭ قاتىسۋىمەن مۋزىكالىق-تەاترلاندىرىلعان شوۋ تۇرىندە وتكەن اشىلۋ سالتاناتى ماسكەۋ ۋاقىتىمەن ساعات 17:00-دە باستالدى. وندا تاتارستان رەسپۋبليكاسىنىڭ مەملەكەتتىك ءان-بي ءانسامبلى دە ونەر كورسەتتى.
كەزەكتى V كوشپەلىلەر ويىندارى « ۇلى دالاداعى كەزدەسۋ» ۇرانىمەن ءوتىپ جاتىر. وعان 91 ەلدەن 2,5 مىڭنان استام سپورتشى قاتىسادى. جارىستىڭ جالپى جۇلدە قورى – 253 ملن تەڭگە (47 ملن رۋبل).
جارىس باعدارلاماسىنا 21 سپورت ءتۇرى قوسىلعان, ونىڭ ىشىندە ۇلتتىق كۇرەس تۇرلەرى, ءداستۇرلى ساداق اتۋ, ءداستۇرلى زياتكەرلىك ويىندار, ت.ب. بار. باعدارلاماعا قوسىلعان ويىندار كوبىرەك بولۋعا ءتيىس ەدى, الايدا كوكتەمگى سۋ تاسقىنىنان كەيىن قاسىم-جومارت توقاەۆ ءىس-شارانىڭ بيۋدجەتىن ازايتىپ, ناتيجەسىندە ويىنداردى ۇيىمداستىرۋعا 5,7 ملرد تەڭگە ءبولىندى.
سپورتتىق نىسانداردان بولەك, استانادا كوشپەلىلەر ويىندارى اياسىندا وزگە دە لوكاتسيالار ىسكە قوسىلعان. مىسالى, «قازانات» يپپودرومى جانىنان اشىق اسپان استىنداعى كوشپەلىلەر وركەنيەتى مۋزەيى, شىعىس بازارى, ۇلتتىق ويىندارعا ارنالعان بالالار ويىن الاڭى بار «كوشپەلىلەر الەمى» اۋىلى ورىن تەپكەن.
سالتاناتتى شەرۋ ساپىندا بولدى
8 قىركۇيەكتە استانادا V دۇنيەجۇزىلىك كوشپەلىلەر ويىندارىنىڭ اشىلۋ سالتاناتى ءوتتى. «استانا ارەنا» ستاديونىندا ۇيىمداستىرىلعان عالامات ءىس-شاراعا 3 مىڭ ءارتىس قاتىستى.
تەاترلاندىرىلعان قويىلىم قاتىسۋشى مەملەكەتتەردىڭ سالتاناتتى شەرۋىمەن باستالدى. سولاردىڭ قاتارىندا ازەربايجان سپورتشىلارى دا الاڭنان ءجۇرىپ ءوتتى.
ايتا كەتسەك, ءبىزدىڭ ەلىمىزدەن 54 سپورتشى 8 سپورت تۇرىنەن باق سىنايدى. دۇنيەجۇزىلىك كوشپەلىلەر ويىندارى 8-13 قىركۇيەك ارالىعىندا وتەدى. وندا 21 سپورت تۇرىنەن 97 مەدال جيىنتىعى ساراپقا سالىنباق.
