ءبىز ءسوز ەتكەن ارالداعى تاعى ءبىر كورىكتى جەر – ەتنواۋىل ايماعى. جوسپار بويىنشا بۇل ايماقتا ءتۇرلى ۇلت وكىلىنىڭ ۇيلەرى بوي كوتەرەدى. قازىردىڭ وزىندە زاماناۋي ۇلگىدەگى بالالار الاڭى جاسالىپ ءبىتتى, بۇدان باسقا دا قۇرىلىس جۇمىستارى قارقىندى جۇزەگە اسىپ جاتىر. ەتنواۋىلدى جارىقتاندىرۋعا باعانالار ورناتىلادى, ورىندىقتار قويىلىپ, تاماق, سۋسىن, كوفە ۇسىناتىن ساۋدا ورىندارى جۇمىسىن باستايدى. بۇعان قوسا الاڭداعى اباتتاندىرۋ جۇمىسى مەن تالاپقا ساي جاڭا ساحنا ورناتىلسا, ءارتۇرلى مادەني-كوپشىلىك ءىس-شارانى وتكىزەتىن, مەرەكە كۇندەرى قالا تۇرعىندارى مەن قوناقتارىنىڭ باسىن قوساتىن قۇتتى ورىنعا اينالادى.
قالاداعى قۇرىلىس نىساندارىن ارالاعان اباي وبلىسىنىڭ اكىمى نۇرلان ۇرانحاەۆ بيزنەس وكىلدەرىمەن كەزدەسىپ, «بەيبىتشىلىك» ارالىنىڭ بۇگىنگى جاي-كۇيى مەن بولاشاعى جونىندە ويىن ورتاعا سالدى. «جەرلەستەرىمىز بەن قالا قوناقتارى ارالعا كەلگەندە الاڭسىز دەمالاتىنداي بولۋى كەرەك. سول ءۇشىن ءاربىر اتقارىلىپ جاتقان جۇمىستى بۇگە-شىگەسىنە دەيىن ويلاستىرىپ, تالاپقا ساي جاساعان دۇرىس. ءبىز ءوز تاراپىمىزدان «بەيبىتشىلىك» ارالىنىڭ جاڭا كەيىپكە ەنۋىنە اتسالىسامىن دەۋشىلەرگە قولداۋ بىلدىرۋگە ءازىرمىز. تەك جۇمىس ساپالى ءارى بۇگىنگى زامان تالابىنا لايىق بولعانى ءجون», دەدى ءوڭىر باسشىسى.
سونىمەن قاتار سەمەي قالاسىنداعى №1 ەمحانانىڭ الدىندا دارىگەرلەر گۇلباعىنىڭ قۇرىلىس جۇمىستارى جوسپار بويىنشا جالعاسىپ كەلەدى. وبلىس اكىمدىگىنىڭ ءباسپاسوز قىزمەتىنىڭ حابارلاۋىنشا, گۇلباق اۋماعىندا جاتتىعۋ, ويىن الاڭدارى مەن ساۋلەتتىك كومپوزيتسيالار, سونداي-اق سۋبۇرقاق ورناتىلادى. ساياباقتا اعاش وتىرعىزىلىپ, اۆتوماتتى سۋارۋ جۇيەسى ىسكە قوسىلدى.
جاقىندا عانا سەمەيدەگى باۋىرجان مومىش ۇلى مەن اسەت نايمانباەۆ كوشەلەرىنىڭ جولايرىعىندا تاريحي قيىلىس اشىلىپ, قالا تۇرعىندارى مەن قوناقتارىن قىزىقتىراتىن جاڭا ورىنعا اينالدى. بۇل – وبلىس اكىمدىگىنىڭ تاپسىرىسى اياسىندا جۇزەگە اسىپ وتىرعان ايتۋلى جوبالاردىڭ ءبىرى. جوباعا تاريحي عيماراتتار مەن ساۋلەت ەسكەرتكىشتەرىن جاڭعىرتۋ, نىسانداردىڭ قۇندىلىعىن ساقتاۋ ماقساتىندا زاماناۋي ماتەريالداردى پايدالانا وتىرىپ, ولاردىڭ باستاپقى كەلبەتىن قالپىنا كەلتىرۋ كوزدەلگەن.
اتالعان كوشەلەردىڭ قيىلىسىندا تاريحي ەسكەرتكىشتەر مەن ساۋلەت كومپوزيتسيالارىنىڭ بوي تۇزەۋى بەكەر ەمەس. سەبەبى مۇندا كونە قالانىڭ شەجىرەسىنەن بەلگىلى تاريحي نىساندار مەن ساۋلەت ونەرىندە تاڭداي قاقتىراتىن عيماراتتار ساپ قۇراعان. تاريحقا بويلاۋمەن قاتار ءدال وسى جەردە قاۋىپسىز ينفراقۇرىلىمعا جول اشىلىپ, كولىك قولجەتىمدىلىگى جاقسارىپ, جاياۋ جۇرگىنشىلەرگە قولايلى ايماقتار, جارىقتاندىرۋ, اۆتوتۇراقتار جاسالدى.
«سەمەيدە قالامىزدىڭ تاريحي وقيعالارىن بايلانىستىراتىن تاعى ءبىر قوعامدىق كەڭىستىك اشىلعانى جاعىمدى جاڭالىق بولدى. ءبىزدىڭ ماقساتىمىز – ونى جاقسى جاعدايدا ساقتاۋ. بۇل رەتتە «تازا قازاقستان» باعدارلاماسى اياسىنداعى جۇمىستاردى جالعاستىرۋ ماڭىزدى. ەكولوگيالىق ماسەلەلەر مەن اباتتاندىرۋ ءبىرجولا شەشىلمەيدى, ولار ۇنەمى قوعام نازارىن جانە كۇش سالۋدى تالاپ ەتەدى. بۇل باعدارلامانىڭ جالعاسۋى تۇرعىندار اراسىندا ەكولوگيالىق مادەنيەتكە, بالالاردىڭ دا, ەرەسەكتەردىڭ دە تابيعاتقا ۇقىپتى قاراۋىنا دا جاۋاپكەرشىلىك جۇكتەيدى», دەيدى سەمەي قالاسىنىڭ قۇرمەتتى ازاماتى زەينوللا توقاەۆ.
وبلىستا بوي كوتەرىپ جاتقان ءبىلىم نىساندارىنىڭ قۇرىلىسى دا وبلىس باسشىسىنىڭ ءجىتى نازارىندا تۇر. قالاداعى «قاراعايلى» شاعىن اۋدانىنداعى 1 200 ورىندىق جاڭا مەكتەپتىڭ قۇرىلىسى قارقىن الىپ, زاريا شاعىن اۋدانىندا «KazMinerals» كومپانياسىمەن جاسالعان مەموراندۋم اياسىندا مەكتەپ جۇمىسى جاقىن ارادا اياقتالادى. قازىر اينالانى اباتتاندىرۋ, عيماراتتاردىڭ قاسبەتتەرىن جوندەۋ جۇمىسى جۇرگىزىلىپ جاتىر. ءىت جانە جاڭا تەحنولوگيالار جوعارى كوللەدجىندە ينجەنەرلىك كوممۋنيكاتسيالار Smart تەحنولوگيالار مەن جاساندى ينتەللەكت ەلەمەنتتەرىن قولدانۋ ارقىلى ەنگىزىلىپ وتىر. عيمارات الدىنداعى اۋماقتا اباتتاندىرۋ جۇرگىزىلىپ, قوسىمشا LED ەكران ورناتىلدى. «زاريا» شاعىن اۋدانىنداعى مەكتەپ پەن ءىت جانە جاڭا تەحنولوگيالار جوعارى كوللەدجى بولاشاقتا بىرلەسە جۇمىس اتقارىپ, بىلىكتى ماماندار دايارلاپ شىعاتىن وقۋ ورنىنا اينالاتىنى انىق.
«الەم ءبىلىم مەن عىلىمعا ەرەكشە كوڭىل ءبولىپ جاتقان تۇستا كوشتەن قالماۋدىڭ قامىن جاساعان ءجون. زاماناۋي مەكتەپتەر, ءبىلىم مەكەمەلەرىن اشۋ, ولارعا بىلىكتى ۇستازداردى تارتۋ – كۇن تارتىبىنەن تۇسپەيتىن ماسەلەلەردىڭ ءبىرى. سولاردىڭ كۇشىمەن سانالى ۇرپاق تاربيەلەپ شىعامىز دەگەن ويدامىن. ءبىزدىڭ باستى نازارىمىز – الەۋمەتتىك نىسانداردى, دەمالىس ورىندارىن دامىتۋ جانە كولىك جەلىسىن جاقسارتۋ. بارلىق جوبا تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالۋى كەرەك. كۇزدىڭ جاڭبىرلى كۇندەرى باستالادى. سوندىقتان اۋا رايى قولايلى بولىپ تۇرعاندا جۇمىستى جىلدامداتۋ كەرەك», دەدى وبلىس اكىمى.
سونداي-اق ءوڭىر باسشىسىنىڭ جوسپارى بويىنشا «قاراعايلى» شاعىن اۋدانىندا بلوك-مودۋلدىك قازاندىق, «سولتۇستىك» ساۋدا ورتالىعىمەن اراداعى اينالما جولدىڭ قۇرىلىسى, ماگيسترالدىق جىلۋ جەلىلەرىنىڭ اعىمداعى جوندەۋ جۇمىستارى دا تەكسەرىلدى.
اباي وبلىسى
