ء«ىس-شاراعا ۆەدومستۆولىق باعىنىستى ۇيىمدار مەن وبلىستىق شىعارماشىلىق ۇجىمداردى قوسا العاندا, 3 000-عا جۋىق ونەرپاز قاتىسادى. 8-ءشى قىركۇيەك كۇنى ساعات 16:00-دە دۇنيەجۇزىلىك كوشپەلىلەر ويىندارىنىڭ اشىلۋ سالتاناتى الدىندا وتاندىق ەسترادا جۇلدىزدارىنىڭ قاتىسۋىمەن كونتسەرت وتەدى. باعدارلامادا مۋزىكا, بي جانە ءداستۇرلى ونەر ارقىلى قازاق مادەنيەتىنىڭ سان الۋان بايلىعى كورەرمەن نازارىنا ۇسىنىلادى», دەلىنگەن ۆەدومستۆو حابارلاماسىندا.
كونتسەرت اياقتالعاننان كەيىن رەسمي اشىلۋى ساعات 19.00-دە باستالادى. اشىلۋ سالتاناتىندا زاماناۋي ساحنالىق تەحنولوگيالار مەن مۋلتيمەديالىق ديزاين قولدانىلعان, 2 ساعاتتىق اۋقىمدى مۋزىكالىق-تەاترلاندىرىلعان قويىلىم كورسەتىلەدى.
«اشىلۋ سالتاناتى ءداستۇرلى تۇردە سپورت دەلەگاتسيالارىنىڭ شەرۋىنەن باستالىپ, سوڭىندا قازاقستاننىڭ حالىق ءارتىسى ديماش قۇدايبەرگەننىڭ ورىنداۋىنداعى حالىقتار دوستىعى مەن بىرلىگى تۋرالى مۋزىكالىق كومپوزيتسيامەن تۇيىندەلەدى», دەپ اتاپ ءوتتى مينيسترلىك.
ءار ەلدەن كەلگەن سپورتشىلار ات جارىسى, ۇلتتىق كۇرەس, ساداق اتۋ جانە ءداستۇرلى اقىل-وي ويىندارى سىندى 21 ەتنيكالىق سپورت تۇرىنەن باق سىناسادى. بارلىعى 97 مەدال جيىنتىعى ساراپقا سالىنادى.
ءىس-شارانىڭ تىكەلەي ترانسلياتسياسىن «Qazaqstan», «Qazsport», «Jibek Joly», «حابار» تەلەارنالارىنان كورۋگە بولادى.
ايتا كەتەيىك, دۇنيەجۇزىلىك كوشپەلىلەر ويىندارى كوشپەندى حالىقتاردىڭ ۇلتتىق سپورتى مەن مادەني مۇراسىن ناسيحاتتاۋدى ماقسات ەتەدى. العاشقى ويىندار 2014 جىلى شولپان-اتادا (قىرعىز رەسپۋبليكاسى) ءوتتى. سودان بەرى ەكى جىلدا ءبىر رەت ۇيىمداستىرىلىپ كەلەدى. كوپتەگەن سپورتشى مەن كورەرمەن قاتىساتىن بۇل ءىس-شارا كوشپەلى مادەنيەتتىڭ جاھاندىق ماڭىزىن كورسەتەدى.
