وزىق تەحنولوگيالار مەن ولاردىڭ ورنىقتى دامۋداعى ماڭىزدىلىعىنا ارنالعان جيىندا ەلەكتروندىق قارجى ورتالىعىنىڭ ماماندارى مەملەكەتتىك قارجى جۇيەسىن جاڭعىرتىپ, باسقارۋ جۇيەسىنىڭ تيىمدىلىگىن ارتتىراتىن بىرنەشە ءونىمدى كوپشىلىكتىڭ نازارىنا ۇسىندى. اتاپ ايتقاندا, بيۋدجەتتىك جوسپارلاۋدى اۆتوماتتاندىرىپ, اقپاراتتىق سۇيەمەلدەۋ تاقىرىبىنا باسىمدىق بەرىلگەن. ونىڭ ارتىقشىلىعى بيۋدجەت قاراجاتىن ءتيىمدى ءبولۋدى ارتتىرىپ, سول ۇدەرىستىڭ اشىقتىعىن قامتاماسىز ەتەدى. ال بىرىڭعاي ساتىپ الۋ پلاتفورماسى – مەملەكەتتىك ورگانداردىڭ, كۆازيمەملەكەتتىك سەكتور سۋبەكتىلەرىنىڭ, باسقا دا الاڭداردىڭ ساتىپ الۋ ۇدەرىستەرىن بىرىكتىرىپ, قولدانۋشىلاردىڭ ىڭعايلىلىعى ءۇشىن مونيتورينگ پەن باقىلاۋدى قامتاماسىز ەتەتىن ءونىم. سونداي-اق ەلەكتروندى تاۋارلار كاتالوگىنىڭ تەحنيكالىق ەرەكشەلىكتەردى اۆتوماتتى تۇردە قالىپتاستىرىپ, بۇرىنعى باعالاردى تالداۋ مەن تاۋار اينالىمىن باقىلاۋعا مۇمكىندىك بەرەتىن دەرەكتەردى ساقتاپ, باسقارۋدا پايداسى وراسان. تاعى ءبىر جوبا – ونلاين بيۋدجەتتىك مونيتورينگ. ول كامەرالدى باقىلاۋدى جۇرگىزۋگە, بيۋدجەت قاراجاتىن ءتيىمسىز يگەرىلۋ تاۋەكەلدەرىنىڭ الدىن الۋعا جانە قارجىلىق بۇزۋشىلىقتاردى ازايتۋعا مۇمكىندىك بەرەدى. بۇدان بولەك, قارجى مينيسترلىگىنىڭ بىرىڭعاي بايلانىس ورتالىعى – ازاماتتارمەن كەرى بايلانىستى جاقسارتۋ ماقساتىندا ۆەدومستۆونىڭ اقپارات جۇيەلەرىنىڭ كوممۋنيكاتسيالىق ارنالارىن بىرىكتىرەتىن جوبا.
مەملەكەت باسشىسى قاسىم-جومارت توقاەۆ بيىلعى قازاقستان حالقىنا جولداۋىندا مەملەكەتتىك قارجى سالاسىنداعى تسيفرلى ترانسفورماتسيانى ۇكىمەتتىڭ باسىم مىندەتتەرىنىڭ قاتارىنا قوسقان ەدى. بۇل رەتتە قارجى مينيسترلىگى سالىق باعىتى مەن كەدەندىك رەتتەۋدە, بيۋدجەتتى جوسپارلاۋ مەن اۋديت ىسىندە تسيفرلى باستامالاردى جوسپارلى تۇردە ىسكە اسىرىپ جاتقانىن ايتا كەتەيىك.
«قازىر الەمدىك كوشباسشىلاردىڭ قاتارىنا قوسىلۋدى ماقسات ەتسەڭ, ەكونوميكانىڭ بارلىق سالاسىنا تسيفرلى تەحنولوگيالاردى كەڭىنەن قولدانۋ قاجەت. بۇگىندە ءبىزدىڭ سالا مەملەكەتتىك قارجى جۇيەسىنىڭ تسيفرلى ارحيتەكتۋراسىنا وڭ اسەر ەتەتىن كوپتەگەن باستامانى مىقتاپ قولعا الدى. مۇندا بىرنەشە جوبانى ۇسىنىپ وتىرمىز. اتاپ ايتقاندا, مەملەكەتتىك جوسپارلاۋدىڭ اقپاراتتىق جۇيەسى, بىرىڭعاي ساتىپ الۋ پلاتفورماسى, «ەلەكتروندىق شوت-فاكتۋرالار» اقپارات جۇيەسى, «ەلەكتروندى تاۋارلار كاتالوگى» اقپارات جۇيەسى, ونلاين بيۋدجەتتىك مونيتورينگ جانە بىرىڭعاي بايلانىس ورتالىعى», دەدى «Kazakhstan Tech Solution Day» كورمەسىندە قارجى ۆيتسە-ءمينيسترى اسەت تۇرىسوۆ.
«ەلەكتروندىق قارجى ورتالىعى» اق باسقارما توراعاسى دياس كرامشەەۆتىڭ ايتۋىنشا, ەلىمىز قازىر تسيفرلاندىرۋ سالاسىندا ءبىرشاما جەتىستىككە جەتىپ, كوشباسشى ەلدەردىڭ قاتارىنان كورىنىپ كەلەدى.
«مەملەكەتتىك قارجى جۇيەسىن تسيفرلى ترانسفورماتسيالاۋ وسى ۇدەرىستىڭ نەگىزگى ەلەمەنتى سانالادى. جوعارىدا اتالعان جوبالاردى ەنگىزۋ مەملەكەتتىك قارجىنى باسقارۋ ۇدەرىسىنىڭ تيىمدىلىگىن نىعايتىپ, اشىقتىقتى قامتاماسىز ەتۋمەن بىرگە ازاماتتاردىڭ سەنىمىن ارتتىرادى», دەدى ۇيىم باسشىسى.
ايتا كەتەيىك, بۇۇ ەسكاتو-نىڭ ازيا-تىنىق مۇحيتى كونفەرەنتسياسى تسيفرلاندىرۋ مەن IT سالاسىنا جاۋاپتى مينيسترلەردى, حالىقارالىق ۇيىمداردى, جەكە سەكتور مەن ازاماتتىق قاۋىمداستىقتىڭ وكىلدەرىن قوسا العاندا, 50-دەن استام ەلدىڭ دەلەگاتسياسىن بىرىكتىرەدى. ونىڭ نەگىزگى ماقساتى – ورنىقتى دامۋ كورسەتكىشتەرىنە قول جەتكىزۋ ارقىلى وڭىردەگى بارلىق ەلگە تسيفرلى رەسۋرستارعا تەڭ قولجەتىمدىلىكتى قامتاماسىز ەتۋ, سونداي-اق تسيفرلى تەحنولوگيالار سالاسىنداعى ىنتىماقتاستىقتى دامىتۋ.
