فوتو: kaztag.info
«اۋىل اكىمدەرىن تىكەلەي سايلاۋ جۇيەسى 2021 جىلى ەنگىزىلدى. سودان بەرى 2,5 مىڭعا جۋىق اكىم سايلاندى. بۇل – بارشا اۋىل اكىمدەرىنىڭ 90 پايىزعا جۋىعى دەگەن ءسوز. قالعاندارى اكىمنىڭ وكىلەتتىك مەرزىمى اياقتالعان كەزدە ءوز رەتىمەن سايلانا بەرەدى. جاڭا اكىمدەردىڭ 60 پايىزى بۇرىن مەملەكەتتىك قىزمەتتە جۇمىس ىستەمەگەن. ولاردىڭ اراسىندا ءارتۇرلى كاسىپ يەلەرى, ءتۇرلى پارتيا وكىلدەرى بار. ورتاشا جاسى – 46 جاس. ءبىر سوزبەن ايتساق, حالىق ءوزى تاڭداعان اكىمدەردىڭ قۇرامى ەداۋىر جاڭعىردى», دەدى پرەزيدەنت.
بىلتىر كۇزدە العاش رەت اۋدان جانە وبلىستىق ماڭىزى بار قالا اكىمدەرى سايلانا باستادى.
«بارلىق وبلىستا 45 اكىم جاڭا تاسىلمەن سايلاندى. ءبىز سايلاۋ ناتيجەسىن جانە سايلانعان اكىمدەردىڭ جۇمىسىن جان-جاقتى زەردەلەدىك. سونىڭ قورىتىندىسى بويىنشا تۇبەگەيلى شەشىم قابىلدادىق. كەلەسى جىلدان باستاپ جاڭا جۇيەگە ءبىرجولا كوشەمىز. بۇدان بىلاي اۋدان جانە وبلىستىق ماڭىزى بار قالالاردىڭ اكىمدەرى تىكەلەي سايلاۋ ارقىلى عانا قىزمەتكە كەلەدى. اكىمدەردىڭ وكىلەتتىك مەرزىمى اياقتالۋىنا قاراي ياعني, روتاتسيا مەرزىمى جەتكەندە سايلاۋ بىرتىندەپ وتكىزىلە بەرەدى. بۇل دا – ساياسي جۇيەنى رەفورمالاۋ ىسىندەگى كەزەكتى ماڭىزدى قادام», دەدى ق:توقاەۆ.
سونىمەن قاتار مەملەكەت باسشىسى ساياسي رەفورما – ءبىر رەتتىك ناۋقان ەمەس ەكەندىگىن اتاپ ءوتتى. مەملەكەتتىڭ دامۋىنا قاجەت بولسا, رەفورمالار وسىلاي ۇزدىكسىز جالعاسا بەرۋى ءتيىس.
