بۇل باسپانالار سۋ تاسقىنىنان زارداپ شەككەندەرگە دەر كەزىندە كومەك كورسەتۋدى تاپسىرعان مەملەكەت باسشىسى قاسىم-جومارت توقاەۆتىڭ ايتۋىمەن سالىنعان.
اڭقاتى اۋىلىنداعى ۇيلەر «جايىقمۇناي» جشس دەمەۋشىلىگىمەن تۇرعىزىلدى. مەرەكەلىك ءىس-شاراعا باتىس قازاقستان وبلىسىنىڭ اكىمى ناريمان تورەعاليەۆ قاتىستى. ءوڭىر باسشىسى اۋىل تۇرعىندارىن قونىستويمەن قۇتتىقتاپ, ۇيلەردىڭ كىلتىن تابىس ەتتى.
«مەملەكەت باسشىسىنىڭ تاپسىرماسىنا سايكەس سۋ تاسقىنىنان زارداپ شەككەن حالىققا زاڭ اياسىندا ءتيىستى كومەك كورسەتىلىپ جاتىر. كوكتەمگى سۋ تاسقىنى ناتيجەسىندە تەرەكتى اۋدانى بويىنشا بارلىعى 160 ءۇي اپاتتى دەپ تانىلىپ, 30 ءۇي ساتىپ الىنىپ, 130 ءۇيدىڭ قۇرىلىسى جۇرگىزىلدى. قۇرىلىس جۇمىستارىنا قولداۋ كورسەتكەن دەمەۋشىلەر مەن كومپانيالارعا شىن جۇرەكتەن العىسىمدى بىلدىرەمىن», دەدى ن.تورەعاليەۆ.
اڭقاتى تۇرعىندارى كورسەتىلگەن قولداۋعا ريزاشىلىعىن ءبىلدىردى.
«سۋ تاسقىنىنان وتباسىمىز ابدەن ابىگەرگە ءتۇستى, بىراق مەملەكەت ءبىزدى دالادا قالدىرعان جوق. مىنە, ءبىز بۇگىن جاڭا, كەڭ, جارىق ۇيىمىزگە كىرىپ وتىرمىز. قولداۋ كورسەتىپ, قامقورلىق تانىتقان مەملەكەت باسشىسىنا مىڭ العىس», دەپ اۋىل تۇرعىنى سەرىكقالي توراليەۆ اعىنان جارىلدى.
بۇگىنگە دەيىن وبلىستا مىڭنان اسا تۇرعىن ءۇي ساتىپ الىنىپ, زارداپ شەككەن وتباسىلارعا بەرىلگەن. سۋ تاسقىنىنان زارداپ شەككەن وبلىس تۇرعىندارى ءبورلى, سىرىم, تەرەكتى, بايتەرەك اۋداندارىنداعى 253 ءۇيدىڭ كىلتىن الدى. جالپى, باتىس قازاقستان وبلىسىندا زارداپ شەككەندەرگە 775 تۇرعىن ءۇي سالىندى.
