فوتو: semeytany.kz
ەلوردادا وتكەن جيىنعا قۇسبەگىلىك فەدەراتسياسىنىڭ پرەزيدەنتى بەرىك ءۋالي, ۆيتسە-پرەزيدەنتتەر – جانجىگىت ومارحان مەن باعدات مۇپتەكەقىزى, سونداي-اق اتقارۋشى ديرەكتور بازاربەك كۇنتۋعان جانە قۇسبەگى سپورتشىلار قاتىستى.
كۇن تارتىبىندەگى باستى ماسەلە – 8-13 قىركۇيەك ارالىعىندا استانادا وتەتىن 5-ءشى دۇنيەجۇزىلىك كوشپەلىلەر ويىندارىندا قۇسبەگىلىك سايىسى بويىنشا باق سىنايتىن ۇلتتىق قۇرامانىڭ دايىندىعى. بايراقتى باسەكەدە قازاقستاننىڭ نامىسىن قۇسبەگىلىكتەن توعىز سپورتشى قورعايدى. ولار: بۇركىت قۇسى بويىنشا – سەرىكبەك كۋنتۋگان, ەرزات بايكاداموۆ, ارمان كۋشكاروۆ, قارشىعا قۇسى بويىنشا – داۋرەن ارشاباي, باعدات كەۋەنوۆ, قۇدايبەرگەن راۋيل ۇلى جانە يتەلگى قۇسى بويىنشا – ەرلان كەنجەتاەۆ, باقداۋلەت باباجان, يبراگيم بازارباەۆ.
جىل باسىنان بەرى ۇلتتىق قۇراما ساپىنداعى قۇسبەگىلەر ءۇشىن الماتى قالاسى مەن اقمولا وبلىسىندا ەكى وقۋ-جاتتىعۋ جيىنى وتكەن ەدى. ءۇشىنىشى وقۋ-جاتتىعۋ جيىنى استانا قالاسىندا 27 تامىزدان 7 قىركۇيەككە دەيىن جالعاسادى. قازاق سپورتشىلارىنىڭ كوشپەلىلەر ويىندارىنا دايىندىعى فەدەراتسيا پرەزيدەنتىنىڭ جەكە باقىلاۋىنا الىنعان.
«ەلىمىزدىڭ تورىندە تورتكۇل دۇنيە كوز تىككەن ۇلكەن ءىس-شارا وتكەلى جاتىر. وسى ءدۇبىرلى دودادا ەل تۋىن سەنىپ تاپسىرعان سپورتشىلارىمىزعا فەدەراتسيا اتىنان ساتتىلىك تىلەيمىن. شاپقان اتتىڭ تۇياعى, ۇشقان قۇستىڭ قاناتى تالاتىن ۇلان-عايىر دالانىڭ يەسىن, قىران باپتاپ, قۇس سالعان بەگزادا ونەردىڭ كيەسىن تانىتاتىن ساتتە ايانىپ قالمايىق. مەملەكەت باسشىمىز بەن بۇكىل ەل بىزگە سەنىم ارتىپ وتىر», دەدى قۇسبەگىلىك فەدەراتسياسىنىڭ پرەزيدەنتى.
سونىمەن قاتار بەرىك ءۋاليدىڭ توراعالىعىمەن وتكەن جيىندا مەدالدىك مىندەتتەمەلەر مەن قوسىمشا سىياقى مولشەرى جاريالاندى.
بەلگىلى بولعانداي, V دۇنيەجۇزىلىك كوشپەلىلەر ويىندارى ديرەكتسياسىنىڭ اتىنان جەكە سپورت تۇرلەرىندە جەڭىمپازدار – ءبىرىنشى ورىن ءۇشىن 500 مىڭ تەڭگە, ەكىنشى ورىن يەلەنگەندەر – 300 مىڭ تەڭگە, قولا جۇلدەگەر – 200 مىڭ تەڭگەدەن الادى. بۇدان بولەك, ءدۇبىرلى دودادا قۇسبەگىلىكتەن قازاقستان قورجىنىنا مەدال سالعان ۇلتتىق قۇراما مۇشەلەرىنە فەدەراتسيا پرەزيدەنتىنىڭ اتىنان ارنايى سىياقى بەرىلەتىنى ايتىلدى. ياعني, ءبىرىنشى ورىن ءۇشىن – 1 000 000 تەڭگە, 2-ورىنعا – 500 000 تەڭگە, 3-ورىنعا – 300 000 تەڭگە تىگىلىپ وتىر.
ايتا كەتەيىك, قۇسبەگىلىكتەن جارىس قىركۇيەكتىڭ 12-13 كۇندەرى استانانىڭ ەتنواۋىل اۋماعىندا وتەدى.
