سۋرەتتى تۇسىرگەن – سارسەنبەك قىزايبەك ۇلى
مۇنى ايتىپ وتىرعانىم, بالا كەزىمىزدە جىلقىعا جاماناۋىز ءجيى تيەتىن. اڭشىلار سايلانىپ شىعادى, ءتۇز تاعىسى الدىرا بەرە مە؟ باسقا ءوڭىردى قايدام, ءبىزدىڭ ەلدە قاردىڭ بەتىمەن جۇرەتىن «بۋران» كولىگى بولا قويمادى ما ەكەن, جىلقىعا كۇزەت قويىپ, ەل «قىرعىن» بولاتىن. اق, ادال مالى يت-قۇسقا جەم بولعانى وڭاي دەيسىز بە؟ قانشا جەردەن جىلقىشىلارمەن بىرگە كۇزەت قويىپ, اڭشىلار سايلانىپ شىعىپ, قۋىپ-ۇركىتىپ, اراسىندا اتىپ الىپ جاتسا دا, انانىڭ بايتالىن, مىنانىڭ جاباعىسىن جەپ كەتىپ جاتادى. قار بەكىگەن سايىن جاماناۋىزىڭ دا قۇتىرا تۇسەدى. بىرىنەن سوڭ ءبىرىن توپىرلاتادى. قازىر عوي, تەحنيكانىڭ كۇشى وزىپ, باسىلىپ تۇرعانى. ەرتەدە ەلدىڭ جىلقىسىن توپىرلاتىپ جەپ, كوپ شىعىنعا ۇشىراتاتىن. بولماعان سوڭ, حالىق جىلقىسىن قولىنا الادى. كۇندىز باعىپ, ىڭىرتتەتىپ اكەلىپ قوراسىنا قامايدى. وندايدا ءشوپ شاق كەلە مە؟ قوي مەن سيىرعا شاۋىپ, ۇيگەن پىشەندى وتاپ سالادى جىلقى جارىقتىق. ايتەۋىر ەل بولعان سوڭ ءبىر-بىرىنە سۇيەنىپ امالداپ تىعىرىقتان شىعادى اۋىل.
ءبىر عاجابى, ءبىزدىڭ ۇلكەن ءۇيدىڭ جىلقىسى التى اي قىس دالادا جاتا بەرەتىن. اتاما بىتكەن تورى ايعىر ۇيىرىنەن شاشاۋ شىعارمايتىن جىلقىنىڭ ءپىرى ەدى, جارىقتىق. التى اي قىستا ءبىر جاباعى جەگىزبەيتىن, ۇرىعا دا الدىرمايتىن بولسا كەرەك. ءۇيىر شىعىنسىز, امان-ەسەن دالادا قىستاپ شىعاتىن. قاسقىر مازا بەرمەگەن سوڭ ەل قىس ورتاسىندا جىلقىسىن قوراسىنا اكەپ باعىپ, دالاعا كوكتەمدە ءبىر-اق جىبەرەدى. بۇل ۋاقتا اتام ءۇيىنىڭ جىلقىسىن اكەم دالادان تۇگەندەۋگە اكەلەر ەدى. جىلدار بويى سولاي جالعاسا بەردى. بەس, بالكىم ودان دا كوپ جىل. ءبىر كۇنى قىس ورتاسىندا جىلقى تۇگەندەۋگە كەتكەن اكەم «تورى ايعىر جوق» دەپ كەلدى. جەمتىگىن كەيىن ىزدەپ زورعا تاۋىپتى, يت-قۇسقا اقىرى ءوزىن الدىرعان ەكەن جانۋار. تورى ايعىردى قاسقىر جەپ كەتىپتى. قانشاما جىلقىنى بىرنەشە جىل امان ساقتاپ كەلگەن قامبار اتانىڭ قۇتىنداي جانۋار, تىرشىلىگىندە جاۋعا ءبىر ق ۇلىن بەرمەي, سوڭىندا ءوزىن قۇربان ەتكەنى – ادام بالاسىن ويلاندىرماي قويمايدى. جىلقى-ەكەش جىلقىنىڭ ءوزى ۇرپاعى ءۇشىن جانىن بەرىپ, ەرلىككە بارىپ تۇر عوي. بۇدان كەيىن جىلقىنىڭ ەستىلىگى تۋرالى قانشاما شىعارما وقىپ, كينو دا كوردىك. سونىڭ بارىندە وسى تورى ايعىردىڭ ويقاستاپ ءۇيىرىن بورىدەن قورعاپ جۇرگەنى ەلەستەيدى. اكەم ايتاتىن «بىردە بۇرقاسىنداتىپ جىلقى تۇگەندەۋگە بارسام, ءۇيىر توبەنىڭ باسىندا شوقتاي بولىپ ءيىرىلىپ تۇرعانىن الىستان كوردىم, ايعىر سىرتىندا ويقاستاپ ءجۇر ەكەن. مەن بارعانشا, ءۇيىرىن اينالىپ سولاي ويقاستاۋمەن بولدى. جەلە جورتىپ جەتسەم, توبەنىڭ استىندا بەس ءبورى كەتىپ بارادى ەكەن. سوڭدارىنان مىلتىق اتتىم. قار بەلۋاردان بولسا دا, جىلقى تۇرعان جەردىڭ توپىراعى كورىنىپ قالىپتى, قانشاما ۋاقىت الىسىپ, كۇش قىلادى ەكەن عوي, جانۋارلار» دەيتىن.
جىلقىسى مۇنداي قازاقتىڭ جۇرتى قالاي جاتباۋىر بولماق. جىلقى مىنەز ەل ەمەس پە ەدىك؟
