وليمپيادانىڭ فينالدىق كەزەڭى تەستىلىك, مۋلتيمەديالىق جانە دالالىق تاپسىرمالارى بار ەكى كەزەڭنەن تۇردى. بۇل جارىستىڭ تاجىريبەلىك ءمانى مەن پانارالىق سيپاتىن كۇشەيتەدى. دالالىق كەزەڭنىڭ جارىسى باستالماس بۇرىن قاتىسۋشىلار «تازا قازاقستان» جوباسىنىڭ اياسىندا استاناداعى «كوكتال» ساياباعىنا كوشەت وتىرعىزدى. وسىلايشا, وليمپيادانىڭ تاربيەلىك سيپاتى دا كۇشەيە ءتۇستى.
بۇگىندە گەوگرافيا عىلىمى قارقىندى دامىپ, اۋقىمى كەڭەيىپ كەلە جاتقان سالالاردىڭ بىرىنە اينالدى. ول جەر بەدەرى مەن جەر بەتىنىڭ قۇرىلىمىن, تابيعاتتى, ەلدەردىڭ اۋماعىن زەرتتەيتىن ءداستۇرلى عىلىم عانا ەمەس, سونىمەن قاتار عارىشتىق گەوگرافيا سەكىلدى جاڭا باعىتتاردى دا قامتيدى. وسىعان بايلانىستى الەمدە گەوگرافيانى وقىتۋدىڭ ماڭىزى مەن وزەكتىلىگى كۇننەن كۇنگە ارتىپ كەلەدى. بۇل ءپان وقۋشىلاردىڭ تانىمدىق كوكجيەگىن كەڭەيتەتىن كوپتەگەن مالىمەت ۇسىنىپ, عىلىمي زەرتتەۋلەرگە دەگەن قىزىعۋشىلىقتى وياتادى.
EcoForming قورىنىڭ باسشىسى قانات اباشوۆ: «ۇلتتىق وليمپيادانى وتكىزۋدەگى باستى ماقسات – وقۋشىلاردىڭ گەوگرافيا پانىنە دەگەن قىزىعۋشىلىعى مەن ىنتاسىن ارتتىرۋ, سونداي-اق گەوگرافيانىڭ ءپان رەتىندەگى ءمانى مەن ماڭىزىن ناسيحاتتاۋ», دەپ جوبانىڭ ماڭىزىن ءتۇسىندىردى. وليمپياداعا قاتىسۋ جاسوسپىرىمدەردىڭ زەرتتەۋ ماشىعىن دامىتىپ, ءبىلىمىن تەرەڭدەتۋگە مۇمكىندىك بەرەدى.
ۇيىمداستىرۋشىلاردىڭ ايتۋىنشا, Geo Star وليمپياداسى بيىل ايتارلىقتاي ءوسىم كورسەتىپ, قاتىسۋشىلار سانى ەكى ەسە ارتقان. بۇل وقۋشىلاردىڭ پانگە دەگەن قىزىعۋشىلىعىنىڭ ارتقانىن ايعاقتايدى.
Geo Star ۇلتتىق گەوگرافيا وليمپياداسى اياسىندا قاتىسۋشىلار اراسىندا اعىلشىن تىلىندە ارنايى تۋر ۇيىمداستىرىلادى. ونىڭ جەڭىمپازى جىل سايىن تايلاندتا وتەتىن International Asian Championships ۇيىمىنىڭ ازيا بويىنشا گەوگرافيا چەمپيوناتىندا قازاقستاننىڭ نامىسىن قورعاۋ مۇمكىندىگىنە يە بولادى.
بىلتىر اتالعان چەمپيوناتتا قازاقستان اتىنان الماتى قالاسىنىڭ 8-سىنىپ وقۋشىسى ەرىك ەرلان قاتىسىپ, 90-نان استام قاتىسۋشىنىڭ اراسىندا 14-ورىن يەلەندى. بيىل مۇنداي جولداما استانالىق وقۋشى قالي نۇرسۇلتانعا بۇيىردى.
نۇرسۇلتاننىڭ ءوزى بيىلعى جارىس باسەكەگە تولى وتكەنىن ايتادى. قارسىلاستارىنىڭ دايىندىعى جوعارى بولعان.
«بىلتىر وسى جارىستا 2-ورىن يەلەنگەن ەدىم, بيىل 3-ورىن الدىم. دەگەنمەن اعىلشىن تىلىندەگى ارنايى تۋردا جەڭىمپاز اتانعانىمدى ەستىگەندە, قاتتى تاڭىرقادىم ءارى ەرەكشە قۋاندىم. وسى وليمپياداعا تالاي ۋاقىتتان بەرى دايىندالعان ەدىم», دەيدى نۇرسۇلتان.
ايتا كەتۋ كەرەك, وليمپيادا رەسپۋبليكالىق عىلىمي-پراكتيكالىق «دارىن» ورتالىعىنىڭ, دارىندى بالالار مەن تالانتتى جاستاردى انىقتاۋ جانە قولداۋ ورتالىعى – «استانا دارىنى» ۇيىمىنىڭ ادىستەمەلىك قولداۋىمەن, Chevron كومپانياسىنىڭ دەمەۋشىلىگىمەن, سونداي-اق National Geographic Qazaqstan جۋرنالى رەداكتسياسىنىڭ كونتەنتتىك قولداۋىمەن وتكىزىلدى.
