وسى باعىتتا حالىقارالىق «قازاق ءتىلى قوعامىنىڭ» استانا قالاسى بويىنشا فيليالى تالاي تارتىمدى ىسكە باستاماشىل بولىپ, ماڭىزدى جوبالاردى جۇزەگە اسىردى.
مەملەكەتتىك ءتىلدىڭ مارتەبەسىن بيىكتەتۋگە ىنتالى ءتىل جاناشىرلارىنىڭ باسىن قوسقان ىرگەلى ۇيىم قازاق مادەنيەتى مەن ۇلتتىق قۇندىلىقتارىن ناسيحاتتاۋ, ءتىلدى قولدانۋ مەن ونى ۇيرەتۋدە جاڭا تەحنولوگيالىق ادىستەردى پايدالانۋ باعىتتارىنا نازار سالادى. ماسەلەن, سوڭعى جىلدارى كوپشىلىك قولداۋىنا يە بولعان استانا, قوستاناي, اتىراۋدا اتقارىلعان «كورنەكى» جوباسى مەن شەكارا سىرتىندا تانىلا باستاعان «Tildes.kz» قازاقشا سويلەcۋ كلۋبىن ەرەكشە اتاپ ءوتۋ قاجەت.
«كورنەكى» جوباسىنىڭ ماقساتى – ەلىمىزدەگى تۇتىنۋشىلاردىڭ قازاق تىلىندە قىزمەت الۋ قۇقىعىن قورعاۋ ءۇشىن جەرگىلىكتى قوعامدىق ورىندارداعى كورنەكى اقپاراتتىڭ ساپاسى مەن سانىن جەتىلدىرۋ. ىلكىمدى باستاما كاسىپكەرلىك نىسانداردىڭ تىلگە قاتىستى زاڭنامانى قاتاڭ ساقتاۋىنا ىقپال ەتىپ وتىر. ماسەلەن, بىلتىردىڭ وزىندە جوبا اياسىندا ءتىل تۋرالى زاڭنىڭ 21 بابىنا باعىتتالعان ارنايى نۇسقاۋلىقتار ارقىلى ءبىلىمىن ارتتىرعان ەرىكتىلەر استانا قالاسىنداعى 3 مىڭنان اسا نىسانعا مونيتورينگ جۇرگىزگەن.
ال, تالايدى «مەن ەندى قازاقشا سويلەۋدەن قىسىلمايمىن, كۇندەلىكتى قاجەتتىلىگىمدى قازاقشا سۇراپ, قازاقشا ايتامىن» دەگىزىپ وتىرعان «Tildes.kz» سپيكينگ كلۋبىنىڭ ءجونى تىپتەن بولەك. بۇل جوبانى ءتىل جاناشىرلارى 2022 جىلى اشقان.
حالىقارالىق «قازاق ءتىلى قوعامىنىڭ» استانا قالاسى بويىنشا فيليالى ويلاپ تاپقان كەلەسى ۇزدىك جوبا – ء«تاتتى ەرتەگى» جوباسى. ماقسات 6 جاسقا دەيىنگى بالالارعا قازاق تىلىندە ساپالى ەرتەگىلەردى تىڭداتۋ ارقىلى ءتىل ۇيرەتۋ. باستاما ء«تاپ-ءتاتتى» كونديتەرلىك جەلىسىمەن بىرلەسە ىسكە اسقان. ءبىر ۋاقىتتا 8 جەردە ۇيىمداستىرىلىپ, 80-گە جۋىق بالا ەرتەگى تىڭداپ, ۇلتتىق قۇندىلىق دارىپتەلدى.
تاعى ءبىر تىڭ ءتول تۋىندى – «Qazaq_camp» بالالارعا ارنالعان ءتىل ۇيرەتۋ لاگەرى. «اتا-انالاردى پەداگوگيكالىق قولداۋ ورتالىعى قىزمەتىنىڭ تۇجىرىمدامالىق تاسىلدەرىن بەكىتۋ تۋرالى» وقۋ-اعارتۋ ءمينيسترىنىڭ 2024 جىلعى 5 اقپانداعى №55 بۇيرىعىن ىسكە اسىرۋ ماقساتىندا اتا-انالارمەن بىرگە جازعى لاگەر ۇيىمداستىرىلدى. وندا 6 جاستان 14 جاسقا دەيىنگى بالالارعا قازاق ءتىلىن «Tildes.bala» قازاقشا سويلەسۋ كلۋبى ارقىلى قىزىقتى ادىستەمەمەن ۇيرەتىپ, بىرنەشە بالا تەگىن لاگەرمەن قامتاماسىز ەتىلدى. تاياۋدا باستاما «ەڭ ۇزدىك ەتنو لاگەر» ستاتۋسىنا يە بولدى.
بۇل جوعارىدا اتالعان جوبالاردىڭ جەتەكشىسى – حالىقارالىق «قازاق ءتىلى قوعامىنىڭ» استانا قالاسى بويىنشا فيليال توراعاسى, پەداگوگ, جۋرناليست لاريسا الدابەرگەن. قوعام بەلسەندىسى 2018 جىلى فيليالدا جاۋاپتى حاتشى, 2020 جىلى توراعا ورىنباسارى, كەيىن 2023 جىلدان باستاپ جەتەكشىلىك لاۋازىمدى اتقارىپ كەلەدى.
بۇگىندە «قازاق ءتىلى» قوعامىنىڭ جارعىسىنا, فيليالدارىنىڭ ەرەجەسىنە سايكەس فيليال كەڭەسى دە بەلسەندى قىزمەت ەتىپ وتىر. ءتىل جاناشىرلارى ساپىندا نازارباەۆ ۋنيۆەرسيتەتى, ەۇۋ, تۇران سىندى بىرقاتار جوو پروفەسسور, دوتسەنتتەرى وزگە دە استاناداعى ءبىلىم سالاسىنىڭ بىلىكتى پەداگوگتارى, قوعام بەلسەندىلەرى جانە بەلگىلى كاسىپكەرلەر بار.
