پەداگوگ قىزمەتكەرلەرىنە ارنالعان تامىز كەڭەسى – جاڭا وقۋ جىلىنىڭ باستالۋىنا وراي جىل سايىن ۇيىمداستىرىلاتىن ءداستۇرلى ءىس-شارا.
استانا قالاسىنىڭ اكىمى جەڭىس قاسىمبەكتىڭ ايتۋىنشا, قالا تۇرعىندارىنىڭ جىل سايىنعى ءوسىمىن ەسكەرە وتىرىپ, ەلوردادا بىرنەشە مەكتەپ سالىنىپ جاتىر. ستاتيستيكاعا سۇيەنسەك, باس قالادا جىلىنا 35 مىڭ بالا دۇنيەگە كەلەدى. بۇگىنگى ءسابي – ەرتەڭگى وقۋشى. سوندىقتان ولاردى جايلى مەكتەپپەن قامتۋ – وزەكتى ماسەلە.
«قازىرگى ۋاقىتتا ەكى اۋىسىمدا 100 مىڭ وقۋشىعا ارنالعان 30-دان استام مەكتەپتىڭ قۇرىلىسى ءجۇرىپ جاتىر. جاڭا وقۋ جىلى ىشىندە 20-دان استام مەكتەپ اشامىز. ولاردىڭ ءبىر بولىگى — «جايلى مەكتەپتەر». مەملەكەت باسشىسىنىڭ تاپسىرماسىمەن «جايلى مەكتەپ» ۇلتتىق جوباسى اياسىندا «Samruk-Kazyna Construction» 2024–2025 جىلدار ارالىعىندا 90 مىڭ وقۋشىعا ارنالعان 24 مەكتەپ سالادى. جاۋاپتى مينيسترلىكپەن, ۋنيۆەرسيتەتتەرمەن, ينۆەستورلارمەن بىرلەسىپ, جاتاقحانالاردا ورىن سانىن ارتتىرۋ بويىنشا جۇمىس ىستەيمىز. بيىل استانادا 4,5 مىڭ ورىنعا ارنالعان 6 ستۋدەنتتىك جاتاقحانا سالىنادى. تاعى 4 ۋنيۆەرسيتەتكە جاتاقحانا سالۋ ءۇشىن جەر تەلىمى ءبولىندى. 2025 جىلى تاعى 2 جاتاقحانانى پايدالانۋعا بەرۋ جوسپارلانىپ وتىر. وسى ءىس-شارانىڭ بارلىعى وقۋشىلارىمىز بەن ۇستازدارىمىزدى قولداۋعا باعىتتالعان», دەدى ەلوردا باسشىسى.
بۇعان قوسا جيىندا وقۋ-اعارتۋ ءمينيسترى عاني بەيسەمباەۆ ءبىلىم سالاسىنا سالىنعان ينۆەستيتسيا كولەمى جىل وتكەن سايىن ارتىپ كەلە جاتقانىن ايتتى.
«ادام ومىرىندەگى سارقىلماس قازىنا – ءبىلىم مەن تاربيە. ال ونى بەرەتىن ۇستاز. سوندىقتان دا ءبىزدىڭ پەداگوگتەر مەملەكەت باسشىسىنىڭ ۇنەمى قولداۋى مەن قامقورلىعىن كورىپ وتىر. 2019 جىلى «پەداگوگ مارتەبەسى تۋرالى» زاڭ قابىلدانىپ, «قازاقستاننىڭ ەڭبەك سىڭىرگەن ۇستازى» مەملەكەتتىك ناگراداسىمەن 46 مۇعالىم ماراپاتتالسا, «ۇزدىك پەداگوگ» اتاعىن 668 ارىپتەسىمىز يەلەندى. ال ءتورت جىلدا ۇستازداردىڭ جالاقىسى ەكى ەسەگە ارتتى. سونداي-اق كەيىنگى بەس جىلدا ءبىلىم بيۋدجەتى ەكى ەسەگە, ال ينۆەستيتسيالار كولەمى التى ەسەگە ءوستى. استانا قالاسىندا بالاباقشا تاپشىلىعىن بايقاپ وتىرمىز. بۇگىنگى تاڭدا 2–6 جاسقا دەيىنگى بالالاردى قامتۋ 81 پايىز. بۇل باعىتتا قالا اكىمدىگى اۋقىمدى جۇمىس اتقارىپ جاتىر. 2025 جىلعا دەيىن ءبىرىنشى رەت 10 بالاباقشا سالۋ جوسپارلانعان. بۇل – وراسان زور جەتىستىك. الەۋمەتتىك وسال توپقا جاتاتىن وتباسىنداعى 97 مىڭ بالا تەگىن تاماقپەن قامتاماسىز ەتىلدى. ونىڭ 11 712-ءسى ەلوردا بالاباقشالارىنا تيەسىلى», دەدى مينيستر.
