بۇرلەن ادىلەتقىزى – شىڭجاڭ ولكەسى, ءدوربىلجىن اۋدانىنىڭ تۋماسى. بيىل جوعارى وقۋ ورنىن باعدارلاما جاساقتاۋشى ماماندىعى بويىنشا تامامداعان. ول قازاقستان – قىتاي اراسىنداعى ىنتىماقتاستىقتى قولداۋ ماقساتىندا ساپارعا شىققان. ەكى مىڭ شاقىرىمدى ارتقا تاستاعان بۇرلەندى ەلوردا جۇرتشىلىعى ەرەكشە ىقىلاسپەن قارسى الىپ, شاشۋ شاشىپ, قىمىز ۇسىندى. دۇنيەجۇزى قازاقتارى قاۋىمداستىعى استانا قالالىق فيليالىنىڭ باسشىسى عالىم ۇلكەنباي ۇلى بۇرلەندى جەڭىسىمەن قۇتتىقتاپ, العىسحات جانە اقشالاي سەرتيفيكات تابىستادى.
«استاناعا امان-ەسەن جەتىپ, سىزدەردى كورگەنىمە وتە قۋانىشتىمىن. قارسى الىپ جاتقان ىقىلاستارىڭىزعا كوپ راحمەت. بۇل ساپاردى كوپتەن بەرى ويلاستىرىپ ءجۇر ەدىم. تاۋەكەلگە بەل بۋىپ, 21 شىلدەدە ءۇرىمشى قالاسىنان جولعا شىقتىم. باستى ماقساتىم – ەكى ەلدىڭ دوستىعىن ناسيحاتتاۋ. بيىل ء«بىر بەلدەۋ, ءبىر جول» جوباسىنا 10 جىل تولىپ وتىر. قازاقستان مەن قىتاي اراسىنداعى ۆيزاسىز رەجىم ورناعاننان بەرى ساياحاتشىلاردىڭ سانى ارتىپ كەلەدى. ەكى ەل اراسىنداعى دوستىق نىعايا بەرسىن», دەدى ول.
«جول ازابىن جۇرگەن بىلەدى» دەمەكشى, بۇرلەننىڭ بۇل ساپارى ءتۇرلى قيىندىق پەن قىزىققا تولى بولعان.
«بۇل – ۆەلوسيپەدپەن شىققان العاشقى ساياحاتىم. كۇنىنە 100-150 شاقىرىم جول ءجۇرىپ وتىردىم. كۇننىڭ ىستىعى ازداپ قيىندىق تۋدىردى. قىزۋىم كوتەرىلىپ, اۋىرعان كۇندەرىم دە جوق ەمەس. اۋەلدە جۋان دوڭگەلەكتى ۆەلوسيپەدپەن شىققانمىن. بىراق ول باياۋ جۇرەتىندىكتەن, جىڭىشكە دوڭگەلەككە اۋىستىردىم. جولدا تاس, اينەك كىرىپ, دوڭعالاعىم جارىلىپ, شىنجىرىم ىستەن شىققان كەزدەر بولدى. ءبارىن ءوزىم جوندەپ الدىم. تاڭعى 5-تەردە شىعىپ, تۇندە ايالداپ وتىردىم. جولدا كەزدەسكەن جانداردىڭ بارلىعى قولداۋ ءبىلدىرىپ, سۋسىن بەرىپ, تاماعىمەن ءبولىسىپ, كومەكتەرىن كورسەتىپ جاتتى. بۇل ساپار ءومىرىمنىڭ ءبىر بەلەسى رەتىندە ەرەكشە ەستە قالاتىنى ءسوزسىز. اتامەكەنگە تابانىم العاش ءتيىپ تۇرعان جوق. بىراق وسى جولعى العان اسەرىم مەن تولقىنىسىم ەرەكشە», دەيدى بۇرلەن ادىلەتقىزى.
ۆەلوساپار كوڭىلىنەن شىققانى سونشا, بۇرلەن الداعى ۋاقىتتا وزگە ەلدەردى دە ارالاۋدى جوسپارلاپ وتىر.
