ەسكە سالايىق, 2024-2025 وقۋ جىلىنا بولىنگەن جالپى گرانت سانى – 94 مىڭنان استام. ونىڭ ىشىندە 78 مىڭ گرانت – باكالاۆريات ستۋدەنتتەرگە قاراستىرىلعان. ۇمىتكەرلەر بۇل تىزىمگە ىلىكپەگەن جاعدايدا قوسىمشا گرانتتارعا تالاسا الادى.
جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ توراعاسى گۇلزات كوبەنوۆانىڭ ايتۋىنشا, گرانتقا ىلىنبەي قالعان تالاپكەرلەر ءالى دە ءۇمىت ۇزبەگەنى ءجون.
– كەيبىر ماماندىقتاردا كونكۋرس وتە جوعارى بولدى. بۇل تالاپكەرلەردىڭ ماماندىقتى تاڭداۋىنا بايلانىستى. ماسەلەن, «ستوماتولوگيا» ماماندىعىنا ءبىر ورىنعا 35 ادام تالاسسا, «حالىقارالىق قاتىناستار جانە ديپلوماتيا» ماماندىعى بويىنشا ءبىر ورىنعا 12 ادام, سونداي-اق «اۋدارما ءىسى», «دەنە شىنىقتىرۋ مۇعالىمدەرىن دايارلاۋ», «قۇقىق», «مودا جانە ديزاين» سياقتى باعىتتار بويىنشا بيىل وتە جوعارى كونكۋرس بايقالىپ وتىر. سوندىقتان كەيبىر تالاپكەرلەر جالپى گرانتتىڭ تىزىمىنە ىلىكپەدى, بىراق ءالى دە مۇمكىندىك بار ەكەنىن اتاپ وتەمىز, – دەدى ول.
اكىمدىك 2,5 مىڭعا جۋىق گرانت ءبولدى
2024-2025 وقۋ جىلىنا جەرگىلىكتى اتقارۋشى ورگانداردان كونكۋرستىق نەگىزدە مەملەكەتتىك ءبىلىم بەرۋ گرانتىنا وتىنىشتەردى قابىلداۋ باستالدى. ناقتىراق ايتساق, بيىل جەرگىلىكتى اتقارۋشى ورگاندار 2475 ءبىلىم بەرۋ گرانتىن ءبولدى. ماسەلەن, 858 گرانتتى ەلوردا اكىمدىگى ءبولىپ وتىر. بۇل – اكىمدىكتەر اراسىنداعى ەڭ ۇلكەن كورسەتكىش. ودان كەيىنگى ورىندا شىعىس قازاقستان وبلىسى – 270, اباي وبلىسى – 200, ماڭعىستاۋ وبلىسى – 175, اقمولا وبلىسى – 160 جانە جەتىسۋ مەن قىزىلوردا وبلىسى – 100, قالعان ايماقتار 100-دەن از گرانت بولگەن.
ءبىلىم گرانتىن تاعايىنداۋ كونكۋرسىنا قاتىسۋ ءۇشىن ۇمىتكەر جوعارى وقۋ ورىندارىنىڭ قابىلداۋ كوميسسياسىنا ءوتىنىش بەرۋ قاجەت. سونداي-اق جوعارى وقۋ ورنىنا ءبىلىمى تۋرالى قۇجات, ۇبت سەرتيفيكاتىن, جەكە باسىن كۋالاندىراتىن قۇجاتتىڭ كوشىرمەسىن, جەڭىلدىك ساناتىن راستايتىن قۇجاتتاردى (بار بولعان جاعدايدا) تاپسىرادى. گرانت بەرۋ تۋرالى شەشىمدى اكىمدىك جانىنان قۇرىلعان ارنايى كوميسسيا قابىلدايدى. ايتا كەتەيىك, جوعارى وقۋ ورىندارىنا قابىلداۋ 25 تامىزدا اياقتالادى.
«قازاقستان حالقىنا» قورىنان 850 گرانت
«قازاقستان حالقىنا» قورى 2024-2025 وقۋ جىلىنا ارنالعان ءبىلىم گرانتتارى باعدارلاماسىن جاريالادى. 2022 جىلدان بەرى وسى باعدارلامانىڭ كومەگىمەن بۇگىندە 2,6 مىڭنان استام ستۋدەنت ءبىلىم الىپ جاتىر. بيىل الەۋمەتتىك وسال توپتاعى 850 تالاپكەر جوعارى ءبىلىم الۋعا قول جەتكىزە الادى. ءبىلىم گرانتتارى باكالاۆريات باعدارلاماسى بويىنشا بەرىلەدى. بۇل كونكۋرسقا اۋىلدىق جەردەگى, شاعىن جانە مونوقالالارداعى از قامتىلعان وتباسىلاردان شىققان بالالار قاتىسا الادى. سونىمەن قاتار جەتىم بالالار نەمەسە كامەلەتكە تولعانعا دەيىن اتا-اناسىنىڭ قامقورلىعىنسىز قالعان بالالار, مۇگەدەكتىگى بار جانە 2022 جىلعى قاڭتارداعى قايعىلى وقيعالار كەزىندە قايتىس بولعان ازاماتتاردىڭ بالالارى اتالعان گرانتقا يە بولا الادى. ايتا كەتەيىك, ۇمىتكەرلەردىڭ جاسى 29 جاستان اسپاۋى ءتيىس. مەملەكەتتىك ءبىلىم گرانتىن العاندار «قازاقستان حالقىنا» قورىنىڭ گرانتىنا قۇجات تاپسىرا المايدى. تالاپكەر جوعارىدا اتالعان تالاپتارعا تولىق ساي بولسا, جوعارى وقۋ ورىندارىنىڭ قابىلداۋ كوميسسيالارىنا حابارلاسىپ, باعدارلاماعا ءوتىنىش بەرە الادى. وتىنىمدەردى قابىلداۋدىڭ سوڭعى مەرزىمى – 17 تامىز.
سونداي-اق «Freedom Bank» «Freedom Grants» ءبىلىم جوباسىنا وتىنىشتەردى قابىلداي باستادى. بيىل بانك تالاپكەرلەرگە 400 گرانت ءبولدى. بۇل مۇمكىندىككە يە بولۋ ءۇشىن ۇمىتكەرلەرگە قويىلاتىن بىرنەشە شارت بار. جاس تۇلەكتەر 18 تامىزعا دەيىن ءوزىنىڭ Instagram جەلىسىندە بانك پاراقشاسىن (@bankffin.kz) بەلگىلەي وتىرىپ, «FreedomGrants» حەشتەگىمەن پوست نەمەسە ريلس جاريالاۋى كەرەك. جازبادا تالاپكەر ءوزى تۋرالى ايتىپ, وقىعىسى كەلەتىن ۋنيۆەرسيتەتتى اتاۋى ءتيىس, سونداي-اق نەگە وسى ماماندىقتى تاڭداعانى جونىندە جانە ءوز ايماعىن قالاي جاقسارتقىسى كەلەتىنىن ءتۇسىندىرۋى قاجەت. تامىزدىڭ 21-ءى كۇنى بانكتىڭ @bankffin.kz رەسمي پاراقشاسىندا تىكەلەي ەفيردە كەزدەيسوق سانداردى تاڭداۋ ادىسىمەن «Freedom Grants» يەلەرى انىقتالادى.
ۋنيۆەرسيتەتتەن بولىنگەن گرانت كوپ
تۇركىستانداعى حالىقارالىق تۋريزم جانە قوناقجايلىلىق ۋنيۆەرسيتەتى «ۆ091 تۋريزم» جانە «ۆ093 مەيرامحانا ءىسى جانە مەيمانحانا بيزنەسى» ماماندىقتارى بويىنشا قوسىمشا 800 گرانت ءبولىپ وتىر. ول ءۇشىن تالاپكەرلەردىڭ مىندەتتى تۇردە بەيىندىك پاندەرى «گەوگرافيا – شەت ءتىلى» بولۋى قاجەت. سونداي-اق تالاپكەردىڭ ۇلتتىق بىرىڭعاي تەستىلەۋدەن جيناعان جالپى ۇپايى 65-تەن جوعارى بولۋى ءتيىس. («قازاقستان تاريحى» جانە بەيىندىك پاندەر كەمىندە 5 بالل, «وقۋ ساۋاتتىلىعى» جانە «ماتەماتيكالىق ساۋاتتىلىق» كەمىندە 3 بالل). اتاۋلى گرانتقا قۇجات قابىلداۋ 18 تامىزعا دەيىن جالعاسادى. ال ج.تاشەنوۆ ۋنيۆەرسيتەتىنىڭ قابىلداۋ كوميسسياسى جوعارى بالل جيناعان تالاپكەرلەرگە «تاشەنوۆ تارتۋى» ءبىلىم گرانتىن تاعايىندادى. بولىنگەن 150 گرانتقا يە بولۋ ءۇشىن تالاپكەر ۇلتتىق تەستىلەۋ ورتالىعى وتكىزگەن تەستىلەۋدى تاپسىرعان جانە مەملەكەتتىك ءبىلىم گرانتى كونكۋرسىنا قاتىسقان بولۋى مىندەتتى. ەڭ باستىسى, تەستىلەۋدەن بەس ءپاننىڭ جيىنتىعى بويىنشا جوعارى بالل جيناۋى ءتيىس. ايتا كەتەرلىگى, بۇل كونكۋرستا اۋىلدىق جەرلەردەن قاتىسۋشىلارعا باسىمدىقتار بەرىلەدى. سونىمەن بىرگە 10-11 سىنىپتارىندا پاندىك وليمپيادالار مەن رەسپۋبليكالىق, حالىقارالىق بايقاۋلاردا جەتىستىككە جەتكەن تۇلەكتەر اتالعان كونكۋرسقا قاتىسا الادى. گرانت بەرۋ تۋرالى شەشىم ارنايى قۇرىلعان كونكۋرستىق كوميسسيانىڭ شەشىمىمەن انىقتالادى. ەسكەرتە كەتەتىن جايت, كونكۋرستا ۇمىتكەرلەردىڭ ۇبت بالى تەڭ بولعان جاعدايدا, ولاردىڭ اتتەستاتتاعى ۇلگەرىمىنىڭ ورتاق بالى ەسكەرىلەدى. ال جاڭا وقۋ جىلىندا س.تورايعىروۆ ۋنيۆەرسيتەتىندە مەملەكەتتىك گرانتتاردان بولەك, جوعارى وقۋ ورنىنىڭ وزىنەن, سەرىكتەس كاسىپورىنداردان قوسىمشا 100 گرانت قاراستىرعان. ولاردىڭ قاتارىندا ەتنومادەني بىرلەستىكتەر وكىلدەرىنە, وبلىستىق پاندىك وليمپيادا مەن عىلىمي جوبالاردىڭ جەڭىمپازدارىنا, «دارىن» وڭىرلىك وليمپياداسى مەن س.تورايعىروۆ ۋنيۆەرسيتەتىنىڭ پاندىك وليمپياداسىنىڭ ۇزدىكتەرىنە, مەرزىمدى اسكەري قىزمەت وتكەرگەن جاستارعا, حالىقتىڭ الەۋمەتتىك قورعالاتىن ساناتتارىنا جاتاتىن جاستارعا ارنالعان گرانتتار بار. ايتا كەتەيىك, س.تورايعىروۆ ۋنيۆەرسيتەتىنىڭ سەرىكتەستەرى جوعارى وقۋ ورىندارىندا تەگىن وقۋعا كەپىلدىك بەرەدى. سونىمەن قاتار اباي وبلىسىنىڭ زياتكەرلىك ەليتاسىن قالىپتاستىرۋ جانە تۋعان ولكەسىنە قىزمەت ەتۋ جونىندەگى ءوز ميسسياسىنىڭ شەڭبەرىندە شاكارىم اتىنداعى سەمەي مەملەكەتتىك ۋنيۆەرسيتەتى ءبىلىم بەرۋ گرانتى بويىنشا تۇسپەگەن «التىن بەلگى» يەگەرلەرىنە ءتورت جىل بويى تەگىن وقۋعا مۇمكىندىك بەرەدى. ۋنيۆەرسيتەت ءاربىر تالانتتى جاستىڭ وڭىردە قالىپ, ءوزىنىڭ الەۋەتىن بارىنشا ارتتىرىپ, ءوز ايماعى مەن ەلىنىڭ دامۋىنا ۇلەس قوسا الاتىن تۇلعانى قالىپتاستىرۋعا باسا نازار اۋدارادى.
دارىندى, تالانتتى جاستاردى قولداۋ ماقساتىندا س. امانجولوۆ اتىنداعى شىعىس قازاقستان ۋنيۆەرسيتەتىندە 20-دان استام پاندىك وليمپيادا وتكىزىلەدى. جەڭىمپازدار ۋنيۆەرسيتەتتىڭ ءتورت جىلدىق گرانتىن الۋعا ۇمىتكەر بولا الادى. ۋنيۆەرسيتەت جىل سايىن وقۋدا جوعارى كورسەتكىش كورسەتكەن, از قامتىلعان جانە كوپبالالى وتباسىدان شىققان, سونداي-اق اتا-انا قامقورلىعىنسىز قالعان بالالار ساناتىنا جاتاتىن تالاپكەرلەردى ۇنەمى قولدايدى. س.امانجولوۆ ۋنيۆەرسيتەتى اۋقىمدى وبلىستىق جانە رەسپۋبليكالىق وليمپيادالار ۇيىمداستىرادى. ماسەلەن, «مەنىڭ قازاقستانىم», «تۋعان ەل. تۋعان جەر. تۋعان گلوبال», «اباي وقۋلارى», «پەداگوگيكالىق اسسورتي», «دارىن» سىندى بايقاۋلاردىڭ قورىتىندىسى بويىنشا جەڭىمپازدارعا وقۋدىڭ بارلىق كەزەڭىنە ءجۇز پايىز جەڭىلدىك قاراستىرىلعان.
