گونكونگتەگى روبوتتەحنيكا چەمپيوناتىندا ەل نامىسىن قورعاعان «Aldebara» كومانداسى بەدەلدى «Team Model Award» سىيلىعىن جەڭىپ الدى. بۇل بايقاۋعا 45 ەلدەن 210 كوماندا قاتىسقان. وقۋشىلار عىلىمي جوباسىن ونەردەگى جاڭاشىلدىق تاقىرىبى بويىنشا ۇسىندى. ياعني جوبا مۋزەيلەر مەن كورمەلەردە ىڭعايلى ءارى قاراپايىم قوزعالىس ءۇشىن جاسالعان قوسىمشا رەتىندە تانىستىرىلدى.
كوماندا جەتەكشىسى بالعىن يساقوجانىڭ ايتۋىنشا, اتالعان جارىسقا دايىندىق وتكەن جىلدىڭ مامىر ايىنان باستالعان.
«وقۋشىلار اۋەلى ىرىكتەۋدەن ءوتتى. ولاردىڭ ءبارى دە 3,4-سىنىپتا وقيدى. كەيىن حالىقارالىق سايىسقا جولدامانى «Central Asia FIRST Championship» چەمپيوناتىندا جەڭىپ الدىق. شاكىرتتەرىمىز ءۇمىتتى اقتاپ, ەلگە جەڭىسپەن ورالعانىمىزعا قۋانىشتىمىز», دەدى ول.
ال وڭتۇستىك كورەيانىڭ تەدجون قالاسىندا وتكەن «11th International youth robotic competition» سايىسىنا الەمنىڭ 20 ەلىنەن مىڭنان اسا وقۋشى قاتىسقان. نۇركەن قايىپوۆ سول مىڭ وقۋشىنىڭ ىشىنەن قارا ءۇزىپ, گران-پري سىيلىعىن جەڭىپ الدى. ول جارىستا «ورماندى قۇتقارۋ» (13-18 جاس) ساناتىندا باسقا قاتىسۋشىلارعا قاراعاندا ءوز باعدارلاماسىن جىلدام ءارى ساپالى جاساپ شىققان.
«مەن روبوتتەحنيكامەن بەس جىلدان بەرى اينالىسامىن. بۇل حالىقارالىق جارىستى البەتتە, قاتتى ۋايىمدادىم. بىراق ءبارى ويداعىداي ءوتتى. ماعان كورەيا ۇنادى. بولاشاق ماماندىعىم روبوتتەحنيكا جانە IT - تەحنولوگيامەن بايلانىستى بولعاندىقتان, كورەيا مەملەكەتىنىڭ جوعارى وقۋ ورنىنا تۇسكىم كەلەدى. زور قولداۋىن بىلدىرگەن جاتتىقتىرۋشىم مەن اتا-اناما العىسىمدى ايتامىن», دەدى ول.
ايتا كەتەيىك, نۇركەن وسى سايىستىڭ الدىندا عانا سانكت-پەتەربۋرگتە وتكەن روبوتتەحنيكا جانە تسيفرلىق تەحنولوگيالار بويىنشا «DETALKA-2024» بايقاۋىندا جەڭىمپاز اتانعان ەدى.
