فوتو: سالي سابيروۆ, ۆلاديسلاۆ سەمەنوۆ
ەل قورجىنىنا جالعىز التىن جۇلدەنى دزيۋدودان 60 كگ دەيىنگى سالماقتا باق سىناعان ەلدوس سمەتوۆ سالدى. 2016 جىلى ريو وليمپياداسىندا – كۇمىس, 2021 جىلى توكيودا قولا العان وتانداسىمىز پاريجدە وليمپ شىڭىن باعىندىردى. وسىلايشا, جەرلەسىمىز دزيۋدودان وليمپيادا چەمپيونى اتانعان تۇڭعىش قازاق سپورتشىسى اتاندى.
گيمناست ناريمان قۇربانوۆ, پالۋان دەمەۋ جادىراەۆ (77 كگ) جانە بوكسشى نۇربەك ورالباي (80 كگ) وليمپيادانىڭ كۇمىس مەدالىن تاعىندى. گرەك-ريم كۇرەسىنىڭ پالۋانى دەمەۋ جادىراەۆ وليمپيا ويىندارى تاريحىندا اراعا 20 جىل سالىپ وسى سپورت تۇرىنەن فينالدا بەلدەستى. ال ناريمان قازاقستان گيمناستيكا تاريحىندا وليمپيادادا مەدال العان تۇڭعىش سپورتشى اتاعىنا يە بولدى. نۇربەك ورالباي بوكستان وليمپيادا تاريحىنداعى 26-شى جۇلدەنى قانجىعالادى.
ال يسلام ساتپاەۆ پەن الەكساندر لە (نىسانا كوزدەۋدەن ارالاس جۇپتىق سىن), دزيۋدوشى عۇسمان قىرعىزباەۆ (66 كگ) جانە بوكسشى نازىم قىزايباي (50 كگ) پاريج وليمپياداسىنىڭ قولا جۇلدەگەرى اتاندى.
«سپورتشىلارىمىزدىڭ بۇدان دا ءتاۋىر ناتيجەگە قول جەتكىزۋگە مۇمكىندىگى بولدى. دەگەنمەن, توكيو وليمپياداسىنداعى ناتيجەدەن ساباق الىپ, پاريجدە جەتىستىگىمىزدى جاقسارتا الدىق. ءتورت جىلدان كەيىن اقش-تا وتەتىن كەلەسى وليمپيادادا بۇدان دا جوعارى ناتيجەگە قول جەتكىزەمىز دەگەن سەنىمدەمىن», دەدى تۋريزم جانە سپورت ءمينيسترى ەرمەك مارجىقپاەۆ.
ايتا كەتەيىك, پاريج وليمپياداسىندا قازاقستان قۇراماسىنىڭ 78 اتلەتى 25 سپورت تۇرىنەن سىنعا ءتۇستى. سونىڭ ىشىندە 54-ءى العاش رەت وليمپياداعا قاتىستى. پاريجدەگى ءدۇبىرلى دودادا جالپى 91 ەلدىڭ سپورتشىسى جۇلدەگەرلەر قاتارىنان كورىندى. كەلەسى جازعى وليمپيا ويىندارى 2028 جىلى اقش-تىڭ لوس-اندجەلەس قالاسىندا وتەدى.
