فوتو: dzen.ru
- فيليپپيندىك گيمناست كارلوس يۋلو پاريج وليمپياداسىندا ەكى جاتتىعۋ بويىنشا الدىنا جان سالماي, التىن تۇعىردان قول بۇلعادى. وعان دەيىن اتالعان مەملەكەتتىڭ بىردە-ءبىر ەر سپورتشىسى عالامدىق باس جۇلدە الماعان. سول كوشتى يۋلو باستادى. ونىڭ ەڭبەگى ۇكىمەت تاراپىنان جوعارى باعالانىپ, سىياقى رەتىندە 52 000 دوللار كولەمىندە قاراجات پەن تولىق جابدىقتالعان ەكى بولمەلى پاتەر بەرىلدى. وعان سپورتشىلاردى ىنتالاندىرۋ قورىنان 174 360 دوللار ءبولىندى. سونىمەن قاتار ءاپ-ساتتە ۇلتتىق باتىرعا اينالعان ساڭلاق ءومىر بويى ءوزى قالاعان مەيرامحانادان تاماقتى تەگىن ءىشىپ, ءدارىحانالار مەن اۋرۋحانالاردىڭ قىزمەتىن تەگىن پايدالانۋعا قۇقىلى. جانە دە وعان ەڭ قىمبات ماركالى تەلەفوندار, كولىكتەردىڭ قوسىمشا بولشەكتەرى, تۇرمىسقا قاجەتتى زاتتار مەن قۇرال-سايماندار اقىسىز بەرىلەتىن بولدى.
- فرانتسيالىق لەون مارشان وليمپيا ويىندارى بارىسىندا 200 مەترگە براسس جانە باتتەرفلياي ادىسىمەن جۇزۋدە باس جۇلدەنى ولجالادى. ەكى رەتىندە دە ول وليمپيادالىق رەكورد ورناتتى. بۇعان دەيىن جەر-جاھانداعى ەشبىر ءجۇزۋشى ونداي كورسەتكىشكە قول جەتكىزە الماعان ەدى. تىپتەن داڭقى جەر جارعان مايكل فەلپستىڭ وزىنە ونداي باق بۇيىرماعان. 22 جاستاعى تۋلۋزانىڭ تۋماسى 200 جانە 400 مەترگە كەشەندى جۇزۋدە دە الدىنا جان سالماي, 4ح100 ەستافەتاسىندا قولا مەدالدى يەلەندى.
- فرانتسيانىڭ باس شاھارىندا 57 كگ سالماقتا جۇدىرىقتاسقان مۇناربەك سەيىتبەك ۇلى جەڭىس تۇعىرىنا كوتەرىلدى. بۇل – قىرعىزستاننىڭ بوكس تاريحىنداعى وليمپيادانىڭ تۇڭعىش جۇلدەسى. قازىرگى كەزدە الەۋمەتتىك جەلىدە رينگتىڭ بۇرىشىنداعى مۇناربەككە ۇلتتىق قۇرامانىڭ باس باپكەرى دانيار تولوگون ۇلىمەن بىرگە وزبەك مامانى اقمال حاسانوۆتىڭ دا سەكۋندانت رەتىندە جاردەمدەسىپ جۇرگەنىن بايقاۋعا بولادى. سەبەبى قىرعىزستاننىڭ ۇلتتىق وليمپيادا كوميتەتى بوكسشىنىڭ جەكە جاتتىقتىرۋشىسى بەكاناس سۇلتانباەۆقا اككرەديتاتسيا بەرمەي, ونى ەلدە قالدىرىپ كەتتى. جالعىز ءوزىنىڭ قينالىپ جۇرگەنىن بايقاعان وزبەكستاننىڭ وكىلى ارىپتەسىنە كومەككە كەلدى. بۇل كورىنىس جۋرناليستەردىڭ نازارىنان تىس قالعان جوق. باۋىرلاس تۇركى حالقىنىڭ اۋىزبىرلىگى مەن ءبىر-بىرىنە دەگەن شىنايى جاناشىرلىعىنا ءتانتى بولعان باق وكىلدەرى ارنايى روليك ءتۇسىرىپ, سونى جەر-جاھانعا عالامتور ارقىلى تاراتىپ جاتىر.
