باعدارلاما وفلاين فورماتتا استانا قالاسىندا وتەدى. ال وزگە قالالار مەن شەت مەملەكەتتەن كەلگەن قاتىسۋشىلار تۇرعىن ۇيمەن قامتىلادى. ءتورت ايعا سوزىلاتىن باعدارلامادا وقىتۋ, ستارتاپ-جوبالاردى ازىرلەۋ بويىنشا سالا ساراپشىلارى جەكە كەڭەس بەرەدى.
«جاڭا زاماندا جاساندى ينتەللەكت بيزنەستەن باستاپ مەديتسينا مەن بىلىمگە دەيىنگى ءومىرىمىزدىڭ ءارتۇرلى سالاسىمەن بىتە قايناسىپ كەتتى. AI'preneurs-ءتىڭ قۇندىلىعى – يدەيا پايدا بولعان ساتتەن باستاپ, نارىقتا ءساتتى جۇزەگە اسقانعا دەيىن ستارتاپتاردىڭ شىڭدالۋىنا تولىق جاعداي جاسايدى. باعدارلاما اياسىندا بىلىكتى تالىمگەرلەر مەن ۇيلەستىرۋشىلەر جوبالاردىڭ دامۋىنا تىكەلەي قولداۋ كورسەتىپ, تۇراقتى ىلگەرىلەۋىن باقىلايدى. قاتىسۋشىلار ماماندانعان ساراپشىلارعا جۇگىنىپ, ءوز ونىمىنە قاتىستى جەكە كەڭەستەر الادى. سونىمەن قاتار كوماندالاردىڭ تەحنيكالىق جابدىقتالۋىنا تولىق جاعداي جاسايمىز», دەدى «Astana Hub» بيزنەس باعدارلامالار ءوفيسىنىڭ ديرەكتورى ەربول احمەتوۆ.
قازىر «AI'preneurs» جوباسىنىڭ سوڭعى كەزەڭىنە وتكەن قاتىسۋشىلارى ستارتاپ-جوبالار قۇرۋعا باعىتتالعان وقۋدى باستادى. كوميسسيا قاراۋىنا ۇسىنىلعان 250-دەن استام ءوتىنىمنىڭ ىشىنەن اۋەلى 100 ۇمىتكەر ىرىكتەلدى. كەيىن سولاردىڭ اراسىنان ەڭ ۇزدىك 50 قاتىسۋشى عانا باعدارلاماعا قاتىسۋعا جولداما الدى. بۇگىندە ولار ءتورت ايلىق وقۋدى باستادى.
اتالعان باعدارلاما تالانتتى مامانداردىڭ باسىن قوسىپ, جاساندى ينتەللەكت سالاسىنداعى يننوۆاتسيالىق ستارتاپتاردى بىرلەسىپ قۇرۋعا باعىتتالعان. ىرىكتەلگەن 50 فيناليست قاتارىندا اعا ينجەنەرلەر, باعدارلامالىق جاساقتاما قۇراستىرۋشىلارى, كيبەرقاۋىپسىزدىك ماماندارى مەن زەرتتەۋشى ينجەنەرلەر, سونداي-اق يننوۆاتسيالىق تەحنولوگيالاردى ازىرلەۋ جانە ەنگىزۋ سالاسىنىڭ شەبەرلەرى بار.
«باسەكەگە تولى ىرىكتەۋدەن وتكەن ۇزدىكتەر باعدارلامانىڭ العاشقى كەزەڭىنە كىرىستى. قاتىسۋشىلاردىڭ مۇنداعى مىندەتى – سەرىكتەستەرىن تاۋىپ, كوماندا قۇرۋ. ولارعا توپ پەن ستارتاپ قۇرۋ اياسىندا ءتۇرلى ۆوركشوپ پەن باسقا دا ءىس-شارا ۇيىمداستىرىلادى. وسىلايشا, ءار قاتىسۋشى ءوزىنىڭ مىقتى قاسيەتىن تانىتا الادى», دەدى ەربول احمەتوۆ.
ەسكە سالساق, اكسەلەراتور ءۇش نەگىزگى كەزەڭنەن تۇرادى. اتاپ ايتساق, كوماندا قۇرۋ, ينۆەستيتسيالىق كوميتەتپەن بايلانىس جانە ءونىمدى ازىرلەۋ بارىسى. ءبىرىنشى كەزەڭ اياسىندا قاتىسۋشىلار سەرىكتەستەر تاۋىپ, ىرىكتەلگەن ۇمىتكەرلەر اراسىنان كوماندا قۇرادى. ال ەكىنشى كەزەڭدە جاساقتالعان كوماندالار ستارتاپ يدەياسىن ويلاستىرىپ, ءونىمنىڭ ءپروتوتيپىن جاسايدى جانە ونى ينۆەستيتسيالىق كوميتەتكە ۇسىنادى. ولاردىڭ جوباسى كەلەسى كەزەڭگە ءساتتى وتسە, قارجى بولىنەدى. ال وداقتاسىن تاپپاعان قاتىسۋشىلار جانە ينۆەستيتسيالىق كوميتەت ماقۇلداۋىن الماعان كوماندالار باعدارلامامەن قوش ايتىسادى نەمەسە باسقا كومانداعا قوسىلادى. سوڭعى كەزەڭدە ستارتاپتار ءونىم ازىرلەۋگە كىرىسەدى.
باعدارلاماعا قاتىسۋشىلاردىڭ ءبىرى – بالالار ءاۋتيزمىن ەمدەۋدى كوزدەيتىن ونلاين-سەرۆيستىڭ نەگىزىن قالاعان جانبولات قايىرعوجين. ونىڭ پلاتفورماسى ون بەستەن استام ەلدىڭ, ونىڭ ىشىندە ەۋروپا بالدىرعاندارىنا قولداۋ كورسەتەدى. جوبا ءتورت جىل ىشىندە جۇزدەگەن بالاعا كومەك قولىن سوزعان. بۇل كورسەتكىش جىل سايىن ارتىپ كەلەدى. جانبولات پىكىرلەس ادامداردى تاۋىپ, «MedTech» پلاتفورماسىن قۇرۋدى جوسپارلاپ وتىر.
«AI'preneurs اياسىندا اۋتيزممەن اۋىراتىن بالالاردى ەمدەۋ شارالارىنىڭ ساپاسىن باقىلاۋعا جانە دياگنوستيكالاۋعا ىقپال ەتەتىن پلاتفورما قۇرۋدى جوسپارلاپ وتىرمىن. مۇندا جاساندى ينتەللەكت ارتىقشىلىعى دا قولدانىلادى. مەنىڭ ويىمشا, جۇمسالعان سومادان مىڭ ەسە باعالى قۇندىلىق جاساپ, ۇزاقمەرزىمدى ءارى عالامات دۇنيە شىعارۋعا بولادى. اكە رەتىندە بالالار دەنساۋلىعى باعا جەتپەس بايلىق ەكەنىن تۇسىنەمىن», دەدى ج.قايىرعوجين.
جوبانىڭ تاعى ءبىر قاتىسۋشىسى – گۇلناز جۇمابەك. ول كەمبريدج ۋنيۆەرسيتەتىنىڭ تۇلەگى, ءارتۇرلى نارىقتا, سونىڭ ىشىندە ۇلىبريتانيا مەن پارسى شىعاناعى ەلدەرىندە 15 جىلدان استام كەڭەس بەرۋ جانە ينۆەستيتسيالىق بانكينگ سالاسىندا ەڭبەك ەتكەن. «AI'preneurs» باعدارلاماسى ارقىلى دەنساۋلىق ساقتاۋ تەحنولوگيالارى سالاسىندا ستارتاپ قۇرۋدى جوسپارلاپ وتىر.
«Astana Hub»-تىڭ AI’Preneurs باعدارلاماسى – ءبىز ءۇشىن تاپتىرمايتىن مۇمكىندىكتەر الاڭى. مۇندا تالىمگەرلەر جوبامىزعا جول سىلتەپ, پايدالى اقپاراتقا قانىق بولدىق. سونداي-اق باسقا كوماندالارمەن تاجىريبە الماسىپ جاتىرمىز. قازىر مەن دەنساۋلىققا ارنالعان ەكى تەحنولوگيالىق جوبادا جۇمىس ىستەپ جاتىرمىن. العاشقىسى پسيحولوگياعا قاتىستى. ياعني جاساندى ينتەللەكت ارقىلى ءار ادامنىڭ ەموتسيونالدىق ينتەللەكتىن انىقتاپ, كەرى بايلانىس ورناتاتىنداي باعدارلاما جاساپ جاتىرمىز. ال ەكىنشى جوبامىزدا ءبىز ماشينالىق وقىتۋ ادىسىمەن ءاۋتيزمدى ەرتە انىقتاۋعا تىرىسامىز», دەدى ول.
باعدارلاما بارىسىندا قاتىسۋشىلار جەكە مەنتورلىق قولداۋ تاۋىپ, كاسىپكەرلىك داعدىلاردى دامىتۋعا ىقپال ەتەتىن ترەنينگتەرگە, تەحنيكالىق جانە بيزنەس-ماسەلەلەر بويىنشا ساراپشىلار كەڭەستەرىنە قول جەتكىزەدى. سونداي-اق كوماندالار «Astana Hub» ينفراقۇرىلىمىن پايدالانادى. اكسەلەراتسيانىڭ بارلىق كەزەڭىن ءساتتى اياقتاعان قاتىسۋشىلار يننوۆاتسيالىق ستارتاپ-جوبالارىن الەۋەتتى ينۆەستورلارعا ۇسىنىپ, ونى ىسكە اسىرۋ ءۇشىن قوماقتى قارجى الادى.
