- سپورتتىق گيمناستيكادان وتكەن جارىستا سيمونا بايلز ءۇش رەت التىننان القا تاعىپ, اقش قۇراماسىنىڭ جالپى كوماندالىق ەسەپتە كوش باستاۋىنا سۇبەلى ۇلەس قوستى. 27 جاستاعى وگايو شتاتىنىڭ تۋماسى قولدى تىرەپ جاسايتىن جاتتىعۋدا, كوپسايىستى جانە كوماندالىق باسەكەدە الدىنا جان سالمادى. وعان دەيىن ول 2016 جىلعى ريو وليمپياداسىندا ءتورت رەت جەڭىس تۇعىرىنىڭ ەڭ بيىك ساتىسىنا كوتەرىلگەن. وسىلايشا, باس جۇلدە سانىن التىعا جەتكىزگەن بايلز ايەلدەردىڭ سپورتتىق گيمناستيكا تاريحىندا ولجاعا مولىنان كەنەلگەندەر اراسىندا ءۇشىنشى ورىنعا كوتەرىلدى. ونىڭ الدىندا – تەك كەلمەسكە كەتكەن قوس مەملەكەت كسرو مەن چەحوسلوۆاكيا قۇراما كوماندالارىنىڭ مۇشەلەرى لاريسا لاتىنينا (9 التىن+5 كۇمىس+4 قولا) مەن ۆەرا چاسلاۆسكا (7+4+0). امەريكالىق ارۋدىڭ التى التىنىنان بولەك, تاعى ءبىر كۇمىس پەن ەكى قولاسى بار.
- وليمپيا ويىندارىندا 28 (23+3+2) جۇلدە الىپ, ادام نانعىسىز كورسەتكىشكە قول جەتكىزگەن اقش-تىڭ اتاقتى ءجۇزۋشىسى مايكل فەلپس دوپينگپەن ۇستالعانداردى بىردەن ءومىر بويى ۇلكەن سپورتتان شەتتەتۋ قاجەت دەپ ەسەپتەيدى. «مەن ءاربىر جارىستى ۇتقان سايىن مىسىقتىلەۋ ادامدار تابىلاتىن. ولار مەنى «رۇقسات ەتىلمەگەن ءدارى-دارمەكتەر پايدالاندى, ارامزا ارەكەتتەرگە باردى. ايتپەگەندە مىناداي كورسەتكىشكە قولى جەتپەيتىن ەدى» دەپ ايىپتادى. الايدا مەن ەش ۋاقىتتا الاياقتىق جاساعان ەمەسپىن. جەڭىسكە ءوز ەڭبەگىم ارقىلى عانا جەتتىم. ونى قۇزىرلى ورگاندارعا سان مارتە دالەلدەدىم. سول سەبەپتى دە مەن «دوپينگ داۋىنا» ىلىككەن ارامزالارعا اسا قاتاڭ جازا قولدانىلعانىن قالايمىن», دەدى.
- دزيۋدودان وليمپيادانىڭ ەكى جانە الەمنىڭ بەس دۇركىن چەمپيونى داۆيد دۋيە فرانتسيا سپورتشىلارىنا بەرىلەتىن سىياقىدان سالىق ۇستاۋعا ءۇزىلدى-كەسىلدى قارسى ەكەنىن مالىمدەدى. ء«بىزدىڭ ەلدە چەمپيوندار 80 000, كۇمىس پەن قولا جۇلدەگەرلەر 40 000 جانە 20 000 ەۋرو الادى. بىرەۋلەر بۇل سومانى اسا ءبىر قوماقتى قارجى دەپ ەسەپتەمەسە, ەندى بىرەۋلەر ءۇشىن زور بايلىق. وعان سپورتشىلار قاۋىمى ۇزاق جىل بويى توككەن تەرى ارقىلى قول جەتكىزەدى. سوندىقتان دا تازا ەڭبەكپەن كەلگەن اقشادان سالىق ۇستاۋ – ناعىز وپاسىزدىق, ۇيات نارسە», دەيدى فرانتسۋزدىڭ اتاقتى بالۋانى.
- يزرايل سپورتشىسى اناستاسيا گوربەنكو حالىقارالىق وليمپيادا كوميتەتى (حوك) ۇيىمداستىرعان بانكەتكە بارامىن دەپ جارىستان قالىپ قويدى. نەگىزى ول 200 مەترگە كەشەندى جۇزۋشىلەر سايىسىنىڭ فينالىنا وتە الماعان ەدى. سودان حوك-تىڭ كەشكى اسىندا تاماققا سىلقيا تويىپ الادى. ءبىر مەزەتتە اناستاسيانىڭ الدىن وراپ كەتكەن اۋستراليالىق ەللا رەمزيدىڭ سىرقاتتانىپ قالعانى بەلگىلى بولادى. ەرەجەگە ساي جاسىل قۇرلىق وكىلىن ودان كەيىن تۇرعان سپورتشى الماستىرۋى كەرەك. ول گوربەنكو ەدى. بۇل جاڭالىق ونىڭ قۇلاعىنا جارىسقا 25 مينۋت قالعاندا عانا جەتەدى. بىراق سول ۋاقىت ارالىعىندا «پاري-لا-دەفانس» ارەناسىنا جەتۋى مۇمكىن ەمەس-ءتى. ءسويتىپ, فينالدىق سايىس ءيزرايلدىڭ وكىلىنسىز وتەدى. كىم ءبىلسىن, ەگەر اناستاسيا اسقا بارماعاندا جەڭىس تۇعىرىنا كوتەرىلۋى دە مۇمكىن ەدى عوي؟
- اسا اۋىر سالماقتا ايقاسىپ, جەڭىلىستىڭ كەرمەك ءدامىن تاتىپ كورمەگەن كاسىپقوي بوكستىڭ كوكجالى الەكساندر ۋسيك پاريجدە جەڭىس تۇعىرىنا كوتەرىلگەن ۋكراينانىڭ بىلعارى قولعاپ شەبەرلەرىنە ءوز قالتاسىنان سىياقى تاعايىندادى. سول ەلدىڭ ايگىلى باپكەرى دميتري سوسنوۆسكيدىڭ ايتۋىنشا, ۋسيك چەمپيوندىق اتاققا قول جەتكىزگەن ساڭلاققا 80 000, فيناليسكە 70 000 جانە قولا جۇلدەگەرگە 50 000 دوللار تابىستاۋعا ۋادە ەتكەن كورىنەدى.
- ايەلدەر اراسىنداعى 100 مەترلىك سايىستا سەنساتسيالىق ناتيجە تىركەلدى. باستى فاۆوريتتەردىڭ بارلىعىنا شاڭ قاپتىرىپ كەتكەن جيۋلەن الفرەد تەڭدەسسىز دەپ تانىلدى. تىپتەن, اقش-تىڭ قوس جۇيرىگى شاكارري ريچاردسون مەن مەليسسا دجەففەرسون وعان جەتە المادى. بۇل – سەنت-ليۋسي تاريحىنداعى وليمپيادانىڭ العاشقى التىن مەدالى.
