- سىياقىنى مولىنان بەرەتىندەر تىزىمىندە قازاقستان توعىزىنشى ورىندا تۇر. قازاق ەلىندە چەمپيونعا – 250 000, كۇمىس پەن قولا جۇلدەگەرلەرگە تيىسىنشە 150 000 جانە 75 000 دوللار تولەۋ قاراستىرىلعان. سونداي-اق ەڭ كوپ سىياقى بەرەتىندەردىڭ توپ-وندىعىندا تۇركيا (ا – 380 000, ك – 230 000, ق – 115 000), گرۋزيا (ا – 370 000, ك – 185 500, 92 700), تايلاند (ا – 365 150, ك – 219 090, ق – 146 060), يندونەزيا (ا – 346 000, ك – 138 500, ق – 69 250), يزرايل (ا – 276 100, ك – 207 100, 138 000), مالايزيا (ا – 236 000, ك – 71 000, ق – 24 000) سىندى مەملەكەتتەر بار.
- ەۋروپانىڭ دامىعان مەملەكەتتەرى تورتجىلدىقتىڭ باستى دوداسىندا دارالانعان سپورتشىلارىنىڭ تابىسىنا اسا ءبىر ەمىرەنە قويمايدى. ماسەلەن, وسى وليمپيا ويىندارىن ۇيىمداستىرىپ وتىرعان فرانتسيادا باس جۇلدە 80 000 ەۋروعا باعالانادى. گەرمانيادا چەمپيوننىڭ ەسەپشوتىنا 20 000 عانا اۋدارىلادى. ال ۇلىبريتانيا, نورۆەگيا, شۆەتسيا سەكىلدى بىرقاتار ەلدە سىياقى جاعى مۇلدە قاراستىرىلماعان.
- جوعارىدا اتالعان الپاۋىتتارعا قاراعاندا قارت قۇرلىقتاعى يتاليا (التىن ءۇشىن بەرىلەتىن سىياقى 212 000 دوللار), ۋكراينا (125 000), يسپانيا (110 000), ماجارستان (166 000), چەحيا (111 000) ۇكىمەتى باسقارىپ وتىرعان ازاماتتاردىڭ قولدارى اشىق ەكەن.
- وزگە قۇرلىقتارعا كەلەر بولساق, ءۇندىستاننىڭ ۇكىمەتى التىن العان دۇلدۇلگە 83 000 ەۋرو تولەسە, اتالعان ەلدىڭ ۇلتتىق وليمپيادا كوميتەتى قوسىمشا 110 000 بەرەدى. وڭتۇستىك كورەيادان شىققان چەمپيوندارعا 42 000 ەۋرولىق سىياقىدان بولەك, تاعى بىرقاتار جەڭىلدىك قاراستىرىلعان. ولار اي سايىن 673 ەۋرو كولەمىندە عۇمىرلىق سىياقى الىپ تۇرادى نەمەسە بىردەن 47 000-دى ءوز ەسەپشوتىنا اۋدارادى. تاڭداۋ سپورتشىنىڭ وزىندە.
- الەمدىك ساياساتتا ۇستەمدىك جۇرگىزىپ وتىرعان اقش وليمپيادا چەمپيونىنا 37 500 دوللار تولەۋمەن شەكتەلەدى. جۇلدەگەرلەر 22 500 جانە 15 000 الادى. الپاۋىت اقش-تىڭ ءدال ىرگەسىندە ورنالاسقان كانادانىڭ بەرەتىنى ودان دا از. ولار باس جۇلدەنى بار-جوعى 16 000-عا باعالاپ وتىر. ەكونوميكاسى قارىشتاپ دامىپ كەتكەن جاپونيا دا سپورتشىلارىن قارىق قىلمايدى. كۇنشىعىس ەلىنەن شىققان وليمپيا ويىندارىنىڭ جەڭىمپازىنا 45 000 دوللار تولەنەدى.
- كەزىندە كسرو قۇرامىندا بولعان مەملەكەتتەر اراسىندا ەڭ كوپ سىياقى بەرەتىن گرۋزيا مەن قازاقستان ەكەنىن جوعارىدا ايتتىق. سول سەكىلدى ازەربايجاندار دا ءمارت ەكەن. ولار چەمپيوننىڭ قولىنا 235 000 دوللار ۇستاتادى. ال كورشىلەرىمىز جايىندا ايتار بولساق, التىن تۇعىرعا كوتەرىلگەن ساڭلاقتىڭ ەسەپشوتىنا وزبەكستاندا – 200 000, قىرعىزستان رەسپۋبليكاسىندا – 119 000,تاجىكستاندا 14 000 دوللار اۋدارىلادى.
