سۋرەتتەردى تۇسىرگەن – يگور بۋرگاندينوۆ
ۇلتتىق مۋزەيگە قويىلعان كورمە وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ ەلىمىزگە مەملەكەتتىك ساپارى اياسىندا ءوتىپ جاتىر. مادەني ءىس-شارا تاۋەلسىزدىك جىلدارى ەكى ەل اراسىندا قالىپتاسقان مادەني-اقپاراتتىق ديالوگتى جالعاستىرۋ ماقساتىندا ۇيىمداستىرىلعان.
ەسكە سالساق, وزبەك ونەرى, اسىرەسە تاۋەلسىزدىك جىلدارى جاڭا بيىكتەرگە كوتەرىلىپ, تىڭ باعىتتارعا جول سالدى. الەمدىك كوركەمونەر كەڭىستىگىندە دە ەرەكشە شىعىستىق ستيلدەرىمەن كوزگە ءتۇستى. قىلقالام شەبەرلەرى ۇلتتىق مادەنيەتىن, تاريحي مۇراسى مەن قاراپايىم حالىقتىڭ تۇرمىس-تىرشىلىگىن, ۇلتتىق بولمىسىن مىڭ بوياۋمەن سويلەتتى. ءار بوياۋدىڭ ءتۇسى شىعىستىق سارىنمەن شەرتىلىپ, ۇلتتىق ونەرىن ورنەكتەدى. حح عاسىردىڭ ەكىنشى جارتىسى مەن ءححى عاسىردىڭ باسىنداعى وزبەكستان كەسكىندەمەسىنىڭ ايرىقشا ەرەكشەلىگىنە بالانعان «وزبەك اۆانگاردى» تولاستاعان وسى ىزدەنىستەردىڭ ناتيجەسىنەن تۋعان ەدى. مۇنى كەزىندە ونەر زەرتتەۋشىلەرى ۇلتتىق ونەر داستۇرلەرىنىڭ ەۋروپالىق پوستيمپرەسسيونيزمى جانە وتكەن عاسىردىڭ 20-30-جىلدارىنداعى وزبەكستان كەسكىندەمەسىمەن سينتەزى دەپ باعالادى.
وزبەك سۋرەت ونەرىندە وزىندىك قولتاڭباسىمەن تانىلعان اۆتورلار جەتەرلىك. بۇعان – اتالعان كورمەگە ۇسىنىلاتىن اكمال نۋر, اليشەر حامداموۆ, تاتيانا فادەەۆا, فايزۋللا احماداليەۆ, شاحنوزا ابدۋللاەۆا, باحتيور ماحكاموۆ, حۋرشيد زياحانوۆ جانە وزبەكستان ونەر اكادەمياسىنىڭ مۇشەلەرى مەن وزبەكستاننىڭ ءارتۇرلى ايماعىنىڭ تالانتتى جاس سۋرەتشىلەرى سىندى وزگە دە قىلقالام شەبەرلەرىنىڭ تۋىندىلارى ايقىن دالەل.
كورمەگە وزبەكستان سۋرەتشىلەرىنىڭ 80-گە جۋىق كارتيناسى مەن قولدانبالى ونەر شەبەرلەرى جاساعان 100-دەن استام زات قويىلدى.
كورمەنىڭ اشىلۋ سالتاناتىندا مادەنيەت جانە اقپارات مينيسترلىگى مادەنيەت كوميتەتىنىڭ توراعاسى كۇمىس سەيىتوۆا مۇنداي مادەني ءىس-شارالار ەكى باۋىرلاس مەملەكەت اراسىنداعى مادەني بايلانىستىڭ قارقىندى دامۋىنا سەپتىگىن تيگىزىپ, ءتۇبى ءبىر تۇركىتىلدەس قوس حالىقتىڭ تامىرى تەرەڭدە ەكەنىن ايعاقتايتىنىن اتاپ ءوتتى.
«بۇگىنگى كورمە تاريحى ورتاق, مادەني مۇراسى باي قازاق جانە وزبەك ۇلتىنىڭ دوستىعىن تاعى ءبىر مارتە پاش ەتىپ, رۋحاني بايلانىستى ارتتىرا تۇسپەك. بۇل كورمەدە وزبەك سۋرەتشىلەرىنىڭ, قولدانبالى ونەر شەبەرلەرىنىڭ سوڭعى ونجىلدىقتاعى تارتىمدى تۋىندىلارى قويىلعان. جالپى, وزبەك قىلقالام شەبەرلەرىنىڭ وزىندىك ەرەكشەلىكتەرى مول ەكەنىن اتاپ وتكەن ءجون. مۇنى بۇگىن ۇسىنىلىپ وتىرعان تۋىندىلاردان كورە الامىز», دەدى مادەنيەت كوميتەتىنىڭ توراعاسى.
سونداي-اق وزبەكستان ونەر اكادەمياسىنىڭ توراعاسى, سۋرەتشى اكمال نۋريدينوۆ ەكى ەلدىڭ ونەرپازدارى بىرىگىپ, تىعىز قارىم-قاتىناس ورناتىپ, تۇركى الەمىنە ورتاق مادەنيەتتى دامىتۋ كەرەگىن ايتتى.
ء«بىز قازاقستانداعى ونەرسۇيەر قاۋىمدى قىزىقتىراتىن وزبەك سۋرەتشىلەرىنىڭ جۇمىستارىن اكەلدىك. قازاقستانمەن ۇنەمى ورتاق جوبالار جۇرگىزىپ وتىرامىز. جالپى, وزبەكستان مەن قازاقستان ونەرى ۇقساس, ويتكەنى ءبىزدىڭ تۇپكى تامىرىمىز ورتاق», دەدى وزبەكستان ونەر اكادەمياسىنىڭ توراعاسى اكمال نۋريدينوۆ.
ەكسپوزيتسياداعى زاماناۋي كەسكىندەمە تۋىندىلارى شىعىستىڭ ەجەلگى اڭىزدارىنان, پوەزياسى مەن تاريحىنان, رۋحتانعان رومانتيكالىق بەينەلەردەن باستاپ, وزبەكستاننىڭ سۇلۋ تابيعاتى مەن ۇلتتىق تۇرمىسىنا ءتان سيپاتتارىن اشىپ كورسەتەتىن ناقتى سيۋجەتتەرگە دەيىنگى سۋرەتشىلەردىڭ ستيليستيكالىق ەرەكشەلىكتەرىنىڭ ارتۇرلىلىگىن, قىزىعۋشىلىقتارى مەن شىعارماشىلىق كوزقاراستارىنىڭ كەڭ اۋقىمىن كورسەتەدى.
«وزبەك سۋرەتشىلەرىمەن ارقاشان شىعارماشىلىق بايلانىستامىز. قىلقالام ۇستاعان قاۋىم بولعان سوڭ, ءاردايىم ءبىر-ءبىرىمىزدىڭ شىعارماشىلىق شەبەرحانامىزعا ءۇڭىلىپ, جاڭا ءبىر ستيل, توسىن وي بايقاي قالساق, بىردەن حابارلاسىپ ايتۋعا اسىقپىز. شەتەلدىك كورمەلەردە دە تالاي ساپارلاس بولدىق. ەكى ەلدىڭ مادەنيەتى مەن مەنتاليتەتى جاقىن بولعان سوڭ, كەنەپ بەتىندە ورتاق ۇقساستىقتار كوپ. شىعىستىق سارىن بىردەن بايقالادى. جالپى, تاۋەلسىزدىك جىلدارىنان بەرى وزبەك سۋرەت ونەرى كۇرت دامىدى. قازىر دە مەملەكەتتىك ساياسات سۋرەتشىلەرگە جاقسى كوڭىل بولەدى», دەيدى سۋرەتشى سەنبىعالي سماعۇلوۆ.
ال كورمەنىڭ قولدانبالى ونەر بولىمىندە وزبەكستاننىڭ ءداستۇرلى ونەرىن اشىپ كورسەتەتىن تۋىندىلار ۇسىنىلعان. كورمەگە جينالعان جۇرت تاشكەنتتىك زاماناۋي شەبەرلەردىڭ اعاش بۇيىمدارىن, بۇحارا مەن سامارقاند شەبەرلەرىنىڭ سيۋزانە كەستەلەرىن, مارعۇلاندىق شەبەرلەردىڭ قولدان توقىعان اتلاستارى مەن جىبەكتەرى, ريشتان مەن گيجدۋۆان شەبەرلەرىنىڭ ناقىشتارى مەن مينياتيۋرالارى, كەراميكا بۇيىمدارىن تاماشالادى.
ايتا كەتەيىك, كورمە 8 تامىزعا دەيىن جالعاسادى.
بۇدان بولەك, ەل استاناسىندا 7-8 تامىز كۇندەرى تاشكەنتتىڭ مادەنيەت كۇندەرى وتەدى. ورتالىق ساياباقتا وتەتىن مادەنيەت كۇندەرى اياسىندا تاشكەنت ارتىستەرىنىڭ قاتىسۋىمەن كونتسەرتتىك باعدارلامالار, ۇلتتىق ونەر جانە قولونەر كورمەلەرى, وتباسىلىق سپورتتىق جارىستار مەن ويىندار, تاشكەنت پەن وزبەكستاننىڭ تۋريستىك ءىس-شارالارىنىڭ تۇساۋكەسەرلەرى ۇيىمداستىرىلادى. ءداستۇرلى وزبەك تاعامدارىنان دا ءدام تاتۋعا بولادى.
