فوتو: uralskweek.kz
جيىندا ءسوز العان وقۋ-اعارتۋ ءمينيسترى عاني بەيسەمباەۆ كۇردەلى جوندەۋدەن كەيىن اشىلاتىن ءبىلىم ۇياسى مەن 1 قىركۇيەككە دەيىن پايدالانۋعا بەرىلەتىن جايلى مەكتەپتەردىڭ دايىندىق دەڭگەيىن باياندادى.
بۇگىنگى تاڭدا رەسپۋبليكا بويىنشا 7 859 مەكتەپ جۇمىس ىستەيدى, ونىڭ 6 387-ءسىنىڭ ماتەريالدىق-بازالىق جاعدايى جاقسى دەپ باعالانعان. جامبىل, پاۆلودار, اقمولا جانە تۇركىستان وبلىستارىندا 1290 مەكتەپ كۇردەلى جوندەۋدى قاجەت ەتەتىنى انىقتالدى.
سونىمەن قاتار 280 مەكتەپتە جايلى وقۋ جاعدايىن جاساۋ ءۇشىن جوندەۋ جۇمىستارى جۇرگىزىلىپ جاتىر. 222 مەكتەپتە كۇردەلى جوندەۋ جۇمىستارى وقۋ جىلىنىڭ باسىنا دەيىن اياقتالادى.
كەستەدەن ارتتا قالۋ قاۋپى قاراعاندى, الماتى, سولتۇستىك قازاقستان جانە شىعىس قازاقستان وبلىستارىندا, سونداي-اق الماتى قالاسىندا قوسىمشا 15 وبەكت بويىنشا انىقتالىپ وتىر.
سۋ تاسقىنى سالدارىنان زارداپ شەككەن ءبىلىم بەرۋ نىساندارى بويىنشا قالپىنا كەلتىرۋ جۇمىستارى دا جالعاسىپ جاتىر.
«اۋقىمدى سۋ تاسقىنى سالدارىنان بارلىعى 40 ءبىلىم بەرۋ نىسانى زارداپ شەكتى. بۇگىنگى تاڭدا 5 نىسان بويىنشا قالپىنا كەلتىرۋ جۇمىستارى اياقتالدى. 16 نىسان بويىنشا جۇمىس جۇرگىزىلىپ جاتىر», دەدى عاني بەيسەمباەۆ.
ال 1 قىركۇيەككە دەيىن 20 جايلى مەكتەپ اشىلادى.
«بيىلعى 20 تامىزعا دەيىن «جايلى مەكتەپ» ۇلتتىق جوباسىن ىسكە اسىرۋ اياسىندا العاش رەت 20 مەكتەپ ىسكە قوسىلادى. 2024 جىلى 536 مىڭ جاڭا وقۋشى ورنىنا ارنالعان 302 مەكتەپتى پايدالانۋعا بەرۋ جوسپارلانىپ وتىر. بۇل شارالار 92 ءۇش اۋىسىمدى جانە وقۋشى ورنى تاپشىلىعى بار 249 مەكتەپتەردىڭ پروبلەمالارىن شەشۋگە مۇمكىندىك بەرەدى. اكىمدىكتەر مەكتەپتەردى ىسكە قوسۋ مەرزىمدەرىنىڭ كەشىگۋىنە جول بەرمەۋ ءۇشىن قاجەتتى شارالاردى قابىلداۋى قاجەت», دەدى مينيستر.
