فوتو: ۇلتتىق سپورت قاۋىمداستىعىنىڭ ءباسپاسوز قىزمەتى
جارىس بايگەنىڭ 4 ءتۇرى بويىنشا ءوتتى: قۇنان بايگە, توپ بايگە, جورعا جارىس جانە الامان بايگە, جالپى جۇلدە قورى — 24 900 000 تەڭگە.
«بۇل باسەكە - بايگەدەن ەل چەمپيوناتىنىڭ 8-كەزەڭى, ال ءبىر جاعىنان وسى كۇزدە استانادا وتەتىن 5-ءشى دۇنيەجۇزىلىك كوشپەلىلەر ويىندارىنا ىرىكتەۋ ەسەبىندە ءوتىپ جاتىر. ات جارىسقا ەلىمىزدىڭ تۇكپىر تۇكپىرىنەن ەڭ ۇزدىك جىلقىلار جينالدى. ولار بايگەنىڭ ءتورت تۇرىنەن, ياعني قۇنان بايگە, توپ بايگە, الامان بايگە جانە جورعا جارىس اتالىمى بويىنشا سىنعا تۇسەدى. ءار بايگە تۇرىنە شامامەن 25 تۇلپار قاتىسىپ جاتىر. بۇل اتتاردىڭ جاعدايى جاقسى, الداعى ۇلكەن دوداعا دايىن دەپ ايتا الامىن», دەدى «بايگە» فەدەراتسياسىنىڭ اتقارۋشى ديرەكتورى التاي بيمەن.
قۇنان بايگەدەن ءبىرىنشى ورىن العان قامىسقۇلاق اتتى تۇلپاردىڭ شاباندوزى اسلانبەك ابدىقال جەڭىس جولىندا باپكەر كەڭەسىنىڭ كومەگى تيگەنىن اتاپ ءوتتى.
«باپكەردىڭ ايتۋىمەن ءجۇرىپ وتىردىم. ول ماعان جارىس باستالا سالا الدىڭعى توپتا وتىرۋعا كەڭەس بەردى. سوڭعى اينالىمدا ءبىرىنشى بولىپ العا وزدىم. مارەگە بەس ءجۇز مەتر قالعاندا ارتىمنان تاعى ءبىر ات كەلە جاتتى. جەتىپ الا ما دەپ قورقىپ ەدىم, بىراق مەن ءبىرىنشى كەلدىم. ەندى كوشپەلىلەر ويىندارىنا دايىندالامىن», دەپ اتاپ ءوتتى جاس شاباندوز اسلانبەك ابدىقال.
II ورىندى نايزا اتتى قۇنان الدى, شاباندوزى ارنات مۇراتحان. جۇلدەگەرلەر ۇشتىگىن ايشۋاق ەسىمدى اتقا مىنگەن اڭسار ارىستانبەك ءتامامدادى.
توپ بايگەدە عاسىر اتتى سايگ ۇلىك, اليحان جانىبەك ۇلى ەسىمدى شاباندوزىمەن ۇزدىك اتاندى. II ورىندى راۆشان, شاباندوزى ءدىلنۇر نۇرمۇقاش يەلەندى. ءىىى ورىندى شاباندوز قايرجان ءاليحان تاۋەكەل اتتى تۇلپارىمەن جەڭىپ الدى.
جورعا جارىس قورىتىندىسى:
- I ورىندى يەلەنگەن وردا, شاباندوزى يۋري لىمار;
- II ورىن ۆىپۋسك, شاباندوزى انۋاربەك ابدراحمانوۆ;
- III ورىن اقجاۋىن, شاباندوزى ەربۇلان تىلەعالي ۇلى.
الامان بايگە ناتيجەسى:
- ءى ورىندى سوفلور لەند ەسىمدى ايعىر, شاباندوزى امير امان ۇلى;
- ءىى ورىندى بەرەكە ەسىمدى جىلقى, شاباندوزى يرينات سانجار;
- ءىىى ورىندا شايكۇرەڭ اتتى تۇلپار شاباندوزى ارنات مۇراتحان.
ءىس-شارانىڭ سەرىكتەستەرى – ۇلتىق سپورت قاۋىمداستىعى, رەسپۋبليكالىق «بايگە» فەدەراتسياسى جانە پاۆلودار وبلىستىق اكىمدىگى.
ەسكە سالا كەتەيىك, 8-13 قىركۇيەكتە استانا قالاسىندا 5-ءشى دۇنيەجۇزىلىك كوشپەلىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانعان. 5-ءشى دۇنيەجۇزىلىك كوشپەلىلەر ويىندارىنىڭ باس دەمەۋشىسى - ALAGEUM ELECTRIC, ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەلىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.
