فوتو: ۆەدومستۆو
اتالعان مينيسترلىكتىڭ ءباسپاسوز قىزمەتى ءمالىم ەتكەندەي, جاڭا گيدروتەحنيكالىق نىسان بالابوگەن جانە ۇلكەنبوگەن وزەندەرىنىڭ قيىلىسقان تۇسىندا, 680 گەكتار جەردە بوي كوتەرەدى. بوگەتتىڭ ۇزىندىعى – 1,75 شاقىرىم, بيىكتىگى – 26 مەتر. سۋ قويماسى كوكتەمگى تاسقىن سۋىن جيناپ, سۋارۋ ماۋسىمىندا «بوگەن» سۋ قويماسىنا قوسىمشا سۋ جىبەرەدى دەپ جوسپارلانىپ وتىر.
«مينيسترلىكتىڭ سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىنا سايكەس تۇركىستان وبلىسىندا «بايدىبەك اتا» جانە «بورالداي» سۋ قويمالارى سالىنادى. ەكى نىسان دا «بوگەن» سۋ قويماسىنا قوسىمشا 113 ملن تەكشە مەتر سۋ جەتكىزۋگە مۇمكىندىك بەرەدى. وسىلايشا, ءبىز تۇركىستان قالاسى اۋماعىندا اعىن سۋ ماسەلەسىن شەشۋدى جوسپارلاپ وتىرمىز», دەدى سالا ءمينيسترى نۇرجان نۇرجىگىتوۆ.
سۋ قويماسىنا جينالعان سۋدى «بوگەنگە» جەتكىزۋ ءۇشىن «سارقىراما» كانالى سالىنىپ جاتىر. جالپى ۇزىندىعى 21,7 شاقىرىم بولاتىن كانال سەكۋندىنا 12 تەكشە مەتر سۋ وتكىزە الادى. بۇگىندە قۇرىلىس جۇمىستارى 48%-عا اياقتالىپ, 10 شاقىرىمنان استام بولىگى تولىق بەتوندالعان.
«بايدىبەك اتا» سۋ قويماسىنىڭ نەگىزگى سۋ كوزى – بوگەن وزەنى. گيدرولوگيالىق ەسەپتەۋلەرگە سايكەس, وزەننىڭ ورتاشا جىلدىق اعىنى – 165 ملن تەكشە مەترگە دەيىن جەتەدى, ونى حالىقتىڭ قاجەتتىلىگىنە جاراتۋ وتە ماڭىزدى, - دەدى سۋ شارۋاشىلىعى سالاسىنىڭ ارداگەرى ءىلياس الىبەكوۆ.
