مەملەكەت باسشىسى قاسىم-جومارت توقاەۆ ءتۋريزمدى دامىتۋ جونىندە وتكىزگەن كەڭەستە سالانىڭ الەمدىك ەكونوميكانى قارقىندى دامىتۋدىڭ كاتاليزاتورى ەكەنىن ايتىپ, بىرقاتار ناقتى تاپسىرما بەرگەن ەدى. بۇگىنگى وڭىنان وڭعارىلعان شارۋا مەملەكەت باسشىسىنىڭ تاپسىرماسىن مۇلتىكسىز ورىنداۋ بارىسىندا اتقارىلعان ءىس ەكەنىن اتاپ ايتۋىمىز قاجەت. تابيعاتى تامىلجىعان ەركە كوكشەنىڭ باۋرايىندا ەل ءتۋريزمى جاڭا سيپاتقا يە بولىپ كەلە جاتىر. نەگىزىندە بۇل سالا ينۆەستورلار ءۇشىن مەيلىنشە تارتىمدى ەكەنى دە بەلگىلى. الىس-جاقىن شەتەلدەن كەلگەن دەمالۋشىلاردى قابىلداپ, ءتول تاريحىمىزدىڭ تىلسىم سىرىن ۇقتىراتىن مول مۇمكىندىك تۋىپ وتىر. زاماناۋي كەشەن ەلىمىزدەگى ەڭ جوعارى تەحنولوگيالىق ينتەراكتيۆتى مۇراجايلاردىڭ بىرىنە اينالماق.
سالتاناتتى ءىس-شاراعا مادەنيەت جانە اقپارات ءمينيسترى ايدا بالاەۆا, اقمولا وبلىسىنىڭ اكىمى مارات احمەتجانوۆ, پرەزيدەنت ءىس باسقارۋشىسىنىڭ ورىنباسارى رۋستام باياليەۆ جانە ت.ب. قاتىستى.
«بۋرابايدىڭ تۇمسا تابيعاتىن, تاريحي-مادەني بايلىعىن كوپشىلىككە تانىتۋ – وتە وزەكتى. بۇگىنگى زاماناۋي يننوۆاتسيالىق كەشەننىڭ اشىلۋى وسكەلەڭ ۇرپاقتى وتانسۇيگىشتىككە تاربيەلەۋدە ماڭىزدى قادامداردىڭ ءبىرى دەپ ەسەپتەيمىن. مۇندا جاستار ءوڭىردى عىلىمي-شىعارماشىلىق تۇرعىدان تەرەڭ زەردەلەپ, رۋحاني كەمەلدەنىپ, مول تاعىلىم الادى دەپ سەنەمىن», دەدى ايدا بالاەۆا. سونىمەن قاتار مۇنداي كەشەندەر تەك تاريحي تۇرعىدان عانا ەمەس, قوعامدىق سانانى جاڭعىرتۋعا ىقپال ەتەتىن وزىق ينستيتۋت قۇرۋدا ماڭىزدى ەكەنىن اتاپ ءوتتى.
كۇنىنە 500-گە دەيىن دەمالۋشىلاردى قابىلداي الاتىن زاماناۋي كەشەن جاڭا انيماتسيالىق جانە اۋديوۆيزۋالدى تەحنولوگيالار ارقىلى ەل تاريحىن بىلمەككە ۇمتىلعان ادامداردى الاشتىڭ رۋحاني الەمىنە ەنگىزىپ, كوكىرەگىنە كونە مۇرانىڭ ەڭ اسىلىن سىڭىرە الادى.
«مۋلتيمەديالىق ينتەراكتيۆتى كەشەن – جاي عانا مۋزەي ەمەس, بۇل جەردە يننوۆاتسيا مەن ءداستۇر ورتاق ۇيلەسىم تاپقان. كەشەننىڭ ابىلاي حان الاڭىندا ورنالاسقانى – ەرەكشە وقيعا. بۇل جەر ەلىمىزدىڭ كيەلى ورىندارىنىڭ تىزىمىنە كىرەدى جانە بۋراباي كۋرورتىنىڭ ەڭ باستى كوز تارتار ورنى. مۋلتيمەديالىق ورتالىق دەمالىس پەن ويىن-ساۋىق ورنى عانا ەمەس, سونىمەن قاتار مادەني پىكىر الماسۋ ورتالىعى بولاتىنىنا سەنەمىن», دەدى اقمولا وبلىسىنىڭ اكىمى مارات احمەتجانوۆ.
جازۋشى-دراماتۋرگ ج.ەرعاليەۆ ارۋاق قونىپ, نار شوككەن قاسيەتتى كوكشە توپىراعىنىڭ, التايدان اتىراۋعا دەيىنگى الاش دالاسىنىڭ قادىر-قاسيەتىن تەرەڭنەن تولعاپ, سيپاتتاپ بەردى. سول قادىر-قاسيەتتى تۋريستەر بۇگىنگى جاعىمدى جاڭالىق ارقىلى تولىققاندى بىلە الادى. جاڭا كەشەننىڭ مەدياكونتەنتى ويىن-ساۋىق جانە تانىمدىق ماتەريالداردى نەگىزگە الا وتىرىپ, تۇراقتى جاڭارتىلماق. بۇل ءارتۇرلى باعدارلامالاردان رۋحاني ءلاززات الۋعا, جاڭا قىزىقتى دا مازمۇندى دۇنيەلەردى بىلۋگە مۇمكىندىك تۋدىرادى.
كەشەندى قايتا قۇرۋ جانە جوندەۋ جۇمىستارى «Kaspi.kz» اكتسيونەرلىك قوعامىنىڭ دەمەۋشىلىگىمەن اتقارىلعان. «كۋب 360» زالى – بەينەنى كەسكىندەيتىن بىرەگەي تەحنولوگياسى بار قازاقستانداعى جالعىز زال. بەس پروەكتورمەن, ەكى بۇيىرلىك ەكران, 270 گرادۋستىق پانورامالىق كەسكىن جاسايدى. بۇل كورەرمەندەرگە ءفيلمنىڭ ءبىر بولىگى ءتارىزدى اسەر ەتەدى ەكەن. سول ساتتە اقسەلەۋلى قازاق دالاسىن ءوزىڭ ارالاپ جۇرگەندەي سەزىنەسىڭ. كەشەندە 3D ورىنداۋىندا ارۋاقتى ابىلاي حاننىڭ اق باتاسىن ەستىپ, ىلكى زاماندا ەل داۋىن, جەر داۋىن جالعىز اۋىز سوزبەن شەشكەن, ەل ۇيىتقىسى بولعان بيلەردىڭ بەينەسىن كورۋگە بولادى.
جاستار مەن جاسوسپىرىمدەردى باۋرايتىن تۇسى دا از ەمەس. ويىن تۇرىندەگى ينتەراكتيۆتى ەكسپوزيتسيالار بالالار مەن شەتەلدىك قوناقتارعا ۇلتتىق مۋزىكالىق اسپاپتار, ويۋ-ورنەكتەر, سونداي-اق قازاق دالاسىنىڭ بار بولمىسىن كورسەتە الادى. وسى كەشەندە كەلۋشىلەر قازاقتىڭ ەجەلگى رۋلارىن, ولاردىڭ تاڭبالارىن, مەكەندەگەن ولكەلەرىن تاماشالاي كەلىپ, كوز جانارلارى سيمۆولدىق اعاشقا تىرەلەدى ەكەن.
قورىتا ايتقاندا, مۋلتيمەديالىق ينتەراكتيۆتى كەشەننىڭ اشىلۋى ەل ءتۋريزمىن دامىتۋ باعىتىنداعى باعالى ءىس بولدى.
اقمولا وبلىسى,
بۋراباي اۋدانى
