قازىرگى ۋاقىتتا ەلدەگى جاڭعىرمالى ەنەرگيا كوزدەرىنىڭ (جەك) ۇلەسى 5,8 پايىز بولسا, 2035 جىلعا قاراي 16 پايىزعا دەيىن ۇلعايۋعا ءتيىس. جەك نىساندارىن وندىرىسكە ەنگىزۋ مەملەكەت باسشىسى العا قويعان ەنەرگەتيكالىق ماشينا جاساۋدا ەل ىشىلىك قۇندىلىقتى دامىتۋ, ەكسپورتتىق الەۋەتتى كۇشەيتۋ, سونداي-اق 2060 جىلعا قاراي كومىرتەگى بەيتاراپتىعىنا قولجەتكىزۋ مىندەتتەرىنە جاۋاپ بەرەدى. بالامالى ەنەرگەتيكانى دامىتۋ مەن كۇن پانەلدەرىنە ءوسىپ كەلە جاتقان سۇرانىستى قاناعاتتاندىرۋ ماقساتىندا قولعا الىنعان جوبا تىكەلەي ەكونوميكالىق پايدا اكەلىپ قانا قويماي, قالانىڭ ەكولوگيالىق جاعدايىن تۇراقتاندىرۋعا زور ۇلەس قوسادى. جەك سالاسىنداعى وندىرىستىك قۋاتتىلىقتى ارتتىرۋ رەسپۋبليكامىزدىڭ جاسىل تەحنولوگيا نارىعىنداعى پوزيتسياسىنىڭ نىعايۋىنا ىقپال ەتەدى.
قۇنى 2,9 ملرد تەڭگەنى قۇرايتىن ونەركاسىپ نىسانى 150 مۆت جىلدىق قۋاتقا سايكەستەندىرىلىپ وتىر. كاسىپورىن مودۋلدەردى قۇراستىرۋ بويىنشا اۆتوماتتى جەلىلەر مەن دانەكەرلەۋ ماشينالارىنان, لازەرلىك پلازمالىق كەسكىشتەردەن تۇراتىن زاماناۋي جابدىقتارمەن جاراقتاندىرىلادى. 1 كۇن ءمودۋلىنىڭ قۋاتى 585 ۆت-تان باستالسا, جوسپارلانعان ءونىم كولەمى جىلىنا 250 مىڭ مودۋلگە جەتكىزىلمەك. اۋماعى 2 گەكتاردان اساتىن زاۋىتتا جەرگىلىكتى ماماندار ءۇشىن 100-دەن استام جاڭا جۇمىس ورنى اشىلادى. جۇمىسشى جانە ينجەنەرلىك-تەحنيكالىق قۇرام شەتەلدىك مامانداردان تەحنولوگيا ۇدەرىسىن ۇيرەنىپ, قاجەتتى داعدىلاردى مەڭگەرەدى.
«TGS-Solar» برەندىمەن «التىن گرۋپپ» جشس وتاندىق ينۆەستورى ىسكە قوساتىن زاۋىتتىڭ كاپسۋلاسىن سالۋ راسىمىنە «Kazakh Invest» ۇلتتىق كومپانياسىنىڭ وڭىرلىك ديرەكتورى ولجاس احمەتبەكوۆ, سونداي-اق الماتى قالاسى كاسىپكەرلىك باسقارماسىنىڭ, «Almaty Finance», «Almaty Business Development Company», عىلىمي جانە ءبىلىم بەرۋ ۇيىمدارىنىڭ وكىلدەرى قاتىستى. «التىن گرۋپپ» قۇرىلتايشىسى جومارت مومىنباەۆ قۇتتىقتاۋ ءسوز سويلەپ, جوبانى ىسكە اسىرۋعا كورسەتكەن كومەگى ءۇشىن ۇكىمەتكە العىسىن ءبىلدىردى. قاتىسۋشىلار كۇن مودۋلدەرىن ءوندىرۋ ۇدەرىسىمەن جانە ساتۋدىڭ جوسپارلانعان كولەمىمەن تانىستى.
نىسان قۇرىلىسىن جىل سوڭىنا دەيىن اياقتاۋ كوزدەلگەن. «جاسىل ەنەرگەتيكا ءوز ەلىمىزبەن قاتار ورتاق ءوڭىردىڭ ەكوجۇيەسىنە دە وڭ اسەر ەتەدى. ونىمدەرىمىز ونەركاسىپتىك كۇن ەلەكتر ستانسالارىنىڭ, شارۋا قوجالىقتارىنىڭ جانە جەكە سەكتوردىڭ سۇرانىسىن قاناعاتتاندىراتىنىنا سەنىمدىمىز», دەيدى كومپانيالار توبىنىڭ سەرىكتەسى قانات ابەنوۆ.
