مۇراجايدىڭ نەگىزىن قالاۋشى, قازاقستاننىڭ ەڭبەك سىڭىرگەن گەولوگى ولجاباي يسمايلوۆ وسى سالادا تالاي جىلدان بەرى ەڭبەك ەتىپ كەلەدى. ول جادىگەرلەردىڭ عىلىمي, سونداي-اق ەستەتيكالىق قۇندىلىعىنا ەرەكشە نازار اۋدارعان. ارينە, بۇل, مۇراجايعا كەلگەن قوناقتاردىڭ قىزىعۋشىلىعىن ارتتىرادى ءارى تانىمدىق كوكجيەگىن كەڭەيتەدى. اتالعان مۋزەي گەولوگيا, مينەرالوگيا سالاسىنا قىزىققان بارشا قوناققا, شەتەلدىك تۋريستەرگە ەلىمىزدىڭ جەراستى بايلىعى تۋرالى مول ماعلۇمات بەرۋ ماقساتىندا قۇرىلعان. ەكسپوناتتاردىڭ قاتارىندا ءتۇرلى مينەرال, تاۋ جىنىسى, اسىل تاس, سونداي-اق پالەونتولوگيالىق ولجا بار. مۇنداعى نەگىزگى كوللەكتسيادان باسقا, XIX عاسىرداعى گەولوگيالىق ادەبيەتتەر مۇراعاتى جانە XX عاسىردىڭ باسى مەن ورتاسىنداعى گەولوگيالىق قۇرالداردىڭ ۇلگىلەرى بار.
«ماماندىعىم – گەولوگ. بار ءومىرىمدى وسى سالاعا ارناپ كەلەمىن. استانادا مينەرالوگيالىق مۇراجاي اشۋعا بەل بۋعانىم دا – وسى ماماندىققا دەگەن ماحابباتتىڭ بەلگىسى. بۇرىن الماتىدا مينەرالدار مۋزەيى بولعان, بىراق قازىر جوق. سوندىقتان وقۋشىلار وسىندا ءجيى كەلەدى. ءبىزدىڭ مۇراجايدىڭ ماقساتى — ەلىمىزدىڭ تابيعي رەسۋرستارىن دارىپتەۋ ءارى بالالاردىڭ ءوز ەلىنە, تۋعان جەرىنە دەگەن سۇيىسپەنشىلىگىن قالىپتاستىرۋ. سەبەبى بىزدە مەندەلەەۆ كەستەسىنىڭ بارلىق دەرلىك ەلەمەنتىن تابۋعا بولادى», دەيدى قازاقستاننىڭ ەڭبەك سىڭىرگەن گەولوگى ولجاباي يسمايلوۆ.
مۇراجاي كوللەكتسياسىندا قازاقستان اۋماعىنان جينالعان جادىگەرلەردەن بولەك, كورشىلەس ەلدەردەن, ءتىپتى ەۋروپا, افريكا, وڭتۇستىك امەريكا, اۋستراليادان جينالعان ەكسپوناتتار دا ۇسىنىلعان. كوللەكتسيالىق ۇلگىلەردىڭ ءبىر بولىگىن جەرگىلىكتى گەولوگتەر تەگىن سىيعا تارتىپتى. مۇراجاي قورى ۇنەمى جاڭارتىلىپ, جاڭا تۇسىمدەرمەن تولىقتىرىلىپ وتىرادى.
