فوتو: اقوردا
پرەزيدەنت بۇكىل الەمگە قاۋىپ توندىرگەن جاھاندىق سىن-قاتەرلەردى, سونىڭ ىشىندە قوعامدى جەگى قۇرتتاي جەپ جاتقان جاعىمسىز ادەتتەردەن ارىلۋ كەرەكتىگىن سانامىزعا سىنالاپ كىرگىزدى. بابالارىمىزدان قالعان وسيەتتى – جاقسىدان ۇيرەنىپ, جاماننان جيرەنە ءبىلۋ كەرەكتىگىمىزدى ەسكەرتتى.
«شىن مانىندە, وزىق ۇلت بولۋ ءۇشىن جاقسىلىققا ۇمتىلۋمەن قاتار ەلىمىزدىڭ ءوسىپ-وركەندەۋىنە كەدەرگى بولاتىن جامان ادەت, جاعىمسىز قىلىق جانە قاۋىپتى كەسەلدەن قۇتىلۋىمىز كەرەك. بۇل – ۇلتتىڭ جاڭا ساپاسىن قالىپتاستىرۋ جولىنداعى وتە ماڭىزدى قادام», دەپ ۇلى ابايدىڭ «بەس نارسەدەن قاشىق بول, بەس نارسەگە اسىق بول» دەگەن ەشقاشان ەسكىرمەيتىن, ءمان-ماڭىزىن جوعالتپايتىن وسيەتىن قايتالادى.
ءار زاماننىڭ وزىنە ءتان سىن-قاتەرلەرى بار ەكەنىن كوزى-قاراقتى, كوكىرەگى وياۋ ادامدار جاقسى بىلۋگە ءتيىس. پرەزيدەنت ايتپاقشى, جاھاندانۋ ۇردىسىنە, جاڭا تەحنولوگيانىڭ دامۋىنا جانە باسقا دا سەبەپتەرگە بايلانىستى قوعامعا قاۋىپتى جاڭا كەسەلدەر پايدا بولدى. وسى ورايدا ق.توقاەۆ ناشاقورلىق, لۋدومانيا, ۆانداليزم, زورلىق-زومبىلىق جانە ىسىراپشىلدىق سىندى بەس كەسەلمەن بۇكىل ەل بولىپ كۇرەسىپ, ءبىرجولا توسقاۋىل قويۋىمىز كەرەكتىگىنە توقتالدى.
اشىق مالىمەتتەرگە سۇيەنسەك, قۇمارپازدىق قۇرىعىنا ىلىنگەندەردىڭ سانى 400 مىڭعا جۋىق ەكەن. ءبىر سوزبەن ايتقاندا, بۇلار – بۋكمەكەرلىك كەڭسەلەر مەن كازينولاردىڭ تۇراقتى كليەنتى.
بۇل – تۇتاس ءبىر قالانىڭ حالىق سانىنا پارا-پار كورسەتكىش. شىن مانىندە, لۋدومانيا – بەيبىت كۇندە ەلدىڭ شىرقىن بۇزىپ جاتقان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ, قىلمىسقا ۇرىندى. قۇمار ويىن ءۇشىن قارىزعا باتىپ, وزىنە قول جۇمساعان جاندار تۋرالى حابارلار, وكىنىشكە قاراي, كۇن سايىن تاراپ جاتادى. بۇل دەرت جاس ۇرپاققا وتە ۇلكەن زيان كەلتىرەدى. ونلاين ويىندار بالالاردىڭ كۇندەلىكتى ەرمەگىنە اينالىپ بارادى.
«قۇزىرلى ورگاندار بىلتىر ينتەرنەت-كازينونىڭ بەلگىسى بار 4 مىڭنان استام سايتتى بۇعاتتادى. ءبىز ناشاقورلىققا جانە ەسىرتكى بيزنەسىنە قارسى كۇرەسۋ ءۇشىن كەشەندى جوسپار قابىلدادىق. ۇكىمەت لۋدومانيامەن كۇرەسكە قاتىستى ءدال سونداي جوسپار قابىلداۋى كەرەك. قۇمارپازدىققا زاڭ جۇزىندە شەكتەۋ قويۋ قاجەت. «Amanat» پارتياسى فراكتسياسىنىڭ باستاماسىمەن وسى ماسەلە بويىنشا ءتيىستى زاڭ جوباسى ازىرلەندى. پارلامەنتتە قارالىپ جاتقان سول جوبانى وسى سەسسيانىڭ سوڭىنا دەيىن قابىلداۋ قاجەت», دەپ مەملەكەت باسشىسى تاپسىرما بەرگەندەي, لۋدومانياعا قارسى كۇرەس شارالارىن كۇشەيتەتىن, ياعني قۇمار ويىنداردىڭ الدىن الىپ, ونىڭ باق بەتتەرىندەگى جارناماسىنا توسقاۋىل قوياتىن زاڭدى ءماجىلىس تىڭعىلىقتى دايارلادى.
ءبىز جاستاردىڭ قۇمار ويىنعا سالىنىپ, ارزان تابىسقا ۇمتىلۋىنا جول بەرمەۋىمىز كەرەك. ادال ەڭبەكپەن تاپقان تابىس قانا بەرەكەلى بولاتىنىن قوعام بولىپ ءتۇسىندىرىپ-اق جاتىرمىز. بىراق ناتيجە كوڭىل كونشىتپەيدى. سوندىقتان مەملەكەت باسشىسىنىڭ تاپسىرماسىمەن دايىندالعان قۇمار ويىندارعا تۇساۋ سالاتىن زاڭنىڭ قابىلدانۋى – تاۋەلسىز قازاقستان تاريحىنداعى ايتۋلى وقيعالاردىڭ ءبىرى. بۇل ۇلت بولاشاعىنا دەر كەزىندە اراشا تۇسكەن تىرلىك بولدى. ايتپەسە, «زاڭى جوق ەلدە قىلمىس تا جوق» دەگەن ەجەلگى فيلوسوفياعا سالساق, ءتيىستى زاڭنامانىڭ سولقىلداقتىعى بۇل باعىتتاعى كۇرەس شارالارىنىڭ قولىن بايلاپ, اياعىن تۇساۋلاپ تاستاعانى جاسىرىن ەمەس. زاڭنىڭ مىسى باسپاعان سوڭ ءار نارسەگە ەلىرتكەن جاستار ويىنا كەلگەنىن ىستەپ, ويىنقۇمارلىقتىڭ قۇرىعىنا ىلىگىپ كەتىپ جاتىر.
وسى ويىن بيزنەسى, لوتەرەيا جانە لوتەرەيا قىزمەتى تۋرالى زاڭ جوباسىن جالپى وتىرىستا تانىستىرعان دەپۋتات ەلنۇر بەيسەنباەۆ بۇل ەڭ كوپ تالقىلانعان زاڭ جوباسى بولعانىن ايتتى. جاستاردىڭ ۋلانعان ساناسىنا توقتاۋ سالار, كوزسىز قۇمارلىعىن تىياتىن زاڭ جوباسى ەكى جىل ۇزدىكسىز تالقىلاندى. وسىنىڭ ءوزى-اق بۇل ءجۇردىم-باردىم قاراپ, ءاتۇستى شەشىم شىعاراتىن قاتارداعى ماسەلە ەمەس ەكەنىن كورسەتىپ وتىر. ەندەشە, پرەزيدەنت قول قويعان ويىن بيزنەسى مەن لۋدومانيانى توقتاتاتىن زاڭ قوعام بىرلىگى مەن جاستاردىڭ دۇرىس جەتىلۋىنە اسەر ەتەدى دەپ سانايمىز.
اسقاربەك سەيىلحان,
قازاقستاننىڭ ەڭبەك
سىڭىرگەن ءارتىسى
