فوتو: ©mosaic-lille.fr
اسلانبەك – جازعى وليمپيادا ويىندارىندا ەلىمىزدىڭ دەلەگاتسياسىن باستاپ شىعاتىن, ياعني تۋ ۇستاۋشى ءۇشىنشى بوكسشى. بۇعان دەيىن كوك بايراعىمىزدى قاي بوكسشىلار ۇستادى دەگەن ساۋالعا توقتالۋدى ءجون سانادىق.
قازاقستان سپورتشىلارى تاۋەلسىز ەلدىڭ اتىنان جازعى وليمپيادا ويىندارىنا 1996 جىلى قاتىستى. اقش-تىڭ اتلانتا قالاسىن دۇبىرگە بولەگەن ايتۋلى الاماننىڭ اشىلۋ سالتاناتىندا ەرماحان يبرايىموۆ تۋ ۇستاپ شىقتى. 71 كگ سالماق دارەجەسىندە دوداعا كىرگەن بوكسشى جارتىلاي فينالدا كۋبالىق الفرەدو دۋۆەرحەلگە ەسە جىبەرىپ, قولا مەدالدى قاناعات تۇتتى. ءتورت جىلدان كەيىن اۋستراليانىڭ سيدنەي قالاسىندا الاۋى تۇتانعان جازعى وليمپيادانىڭ سالتاناتتى راسىمىندە دە ءبىزدىڭ سپورتشىلاردى ەرماحان يبرايىموۆ باستاپ ءجۇردى. تۋ كوتەرگەن ساڭلاق شيرەك فينالدا ءتورت دۇركىن الەم چەمپيونى, جازعى وليمپيادا ويىندارىندا ەكى مارتە كۇمىس مەدال يەلەنگەن كۋبالىق بوكسشى حۋان ەرناندەستى ايقىن ۇتتى. جارتىلاي فينالدا بريتاندىق دجەرمان تەيلوردى ىعىستىرىپ, فينالدىق تارتىستا الەم چەمپيونى رۋمىن ماريان سيموننان باسىم ءتۇسىپ, وليمپيادا چەمپيونى اتاندى. ودان كەيىنگى جازعى وليمپيادا ويىندارىندا ەلىمىزدىڭ دەلەگاتسياسىن باستاپ, تۋ ۇستاپ شىعۋ قۇرمەتى بوكسشىلارىمىزعا بۇيىرعان جوق. تەك 2021 جىلى وتكەن توكيو جازعى وليمپياداسىندا بوكسشى قامشىبەك قوڭقاباەۆ پەن جەڭىل اتلەت ولگا رىپاكوۆا كوشتى باستاپ تۋ الىپ ءجۇردى. قامشىبەك توكيو جازعى وليمپياداسىنىڭ جارتىلاي فينالىندا امەريكالىق ريچارد توررەسكە ەسە جىبەرىپ, قولا مەدالدى قاناعات تۇتتى.
اسلانبەك پاريج رينگىندە اتوي سالا ما؟ بىلتىر تاشكەنتتە الەم چەمپيونى اتاندى. ون جىل بۇرىن 20 جاسىندا ەرەسەكتەر اراسىنداعى دودادا توپ جارىپ كوزگە تۇسكەن ساڭلاققا وليمپيادانىڭ جولداماسى 30 جاسقا تولعانشا جالىنان ۇستاتقان جوق. وردا بۇزار شاعىندا وليمپيادا دۋىنا قوسىلاتىن بوكسشى ءۇشىن ازىرگە الىنباس قامال – جاپون سەۆون وكادزاۆا. بىلتىر قىتايدىڭ حانچجوۋ قالاسىندا وتكەن جازعى ازيا ويىندارىنىڭ جارتىلاي فينالدىق باسەكەسىندە شىمبەرگەنوۆ وسى وكادزاۆاعا ەسە جىبەرگەن ەدى.
