1922 جىلى 6 شىلدەدە اقتوبە وبلىسى شالقار اۋدانىندا دۇنيەگە كەلگەن ىزگىلىك نۇرماعامبەت ۇلى – بۇكىل ءومىرىن وتانعا قىزمەت ەتۋگە ارناعان ادام. اسكەري ءبىلىمى وعان مايداندا ۆزۆود كومانديرى بولۋعا مۇمكىندىك بەردى. ەرلىگى مەن باتىلدىعىنىڭ ارقاسىندا مايور اتاعىن الدى. جاۋىنگەرلىك ءومىربايانى 1941 جىلى 24 ساۋىردە اقتوبە اۋداندىق اسكەري كوميسسارياتى شاقىرعان كەزدەن باستالادى. 1941 جىلدىڭ ماۋسىمىنان 1945 جىلدىڭ 28 ساۋىرىنە دەيىن ول 101-اتقىشتار بريگاداسىنىڭ قۇرامىندا باتالون كومانديرىنىڭ ورىنباسارى قىزمەتىن اتقاردى. ماسكەۋدەن بەرلينگە دەيىنگى ۇزاق تا اۋىر جولدى ءجۇرىپ ءوتتى. 4-تانك ارمياسىنىڭ قۇرامىندا ورەل-كۋرسك دوعاسىنداعى شايقاسقا قاتىسىپ, كالينين, بريانسك, بەلارۋس جانە 1-ۋكراين مايداندارىندا شايقاستى. مايدان دالاسىندا ەكى رەت جارالانىپ, كونتۋزيا الدى.
مايدانگەر ءىى دارەجەلى «وتان سوعىسى» وردەنىمەن, «گەرمانيانى جەڭگەنى ءۇشىن», «بەرليندى العانى ءۇشىن», «جاۋىنگەرلىك ەڭبەگى ءۇشىن» مەدالدارىمەن, مينسك پەن سمولەنسكىنى ازات ەتكەنى, كۋرسك دوعاسىنداعى شايقاسقا قاتىسقانى ءۇشىن جانە باسقا دا كوپتەگەن ناگرادامەن ماراپاتتالعان.
ىزگىلىك داباەۆ اسكەري قىزمەتشىلەرگە رجەۆ ماڭىنداعى شايقاستار تۋرالى ايتتى. «14 ايعا سوزىلعان ۇرىستا روتامداعى 200 جاۋىنگەردەن 25 ادام عانا امان قالدى», دەپ ەسكە الدى ارداگەر. ونىڭ كوز الدىندا باتالون كوميسسارى تولەگەن الشىمباەۆ پەن بريگادا كومانديرىنىڭ ورىنباسارى جارمۇحامبەت مەيىرمانوۆ ەرلىكپەن قازا تاپتى.
سوعىستان كەيىن ىزگىلىك داباەۆ جۋرناليستيكامەن اينالىسىپ, كسرو جۋرناليستەر وداعىنىڭ مۇشەسى بولدى. قازاق كسر جوعارعى كەڭەسىنىڭ ماراپاتتاۋ ءبولىمىن باسقاردى.
«حح عاسىرداعى كورنەكتى قايراتكەرلەردىڭ پورترەتتەرى» كىتابىندا ءالىبي جانگەلدين, ءابىلحان قاستەەۆ, جامبىل جاباەۆ, احمەت جۇبانوۆ, جۇماباي شاياحمەتوۆ جانە كەمەل توقاەۆ تۋرالى ەستەلىكتەرى جاريالانعان.
بۇگىندە مايدانگەر جاسىنا قاراماستان بەلسەندى. اقساقال ءۇش ۇل, ءبىر قىز تاربيەلەپ ءوسىردى. ىزگىلىك نۇرماعامبەت ۇلى اسكەري قىزمەتشىلەرمەن ۇزاق ءومىر ءسۇرۋ سىرىمەن ءبولىستى. ولاردى ءتارتىپتى قاتاڭ ساقتاپ, دۇرىس تاماقتانىپ, جامان ادەتتەردەن اۋلاق بولۋعا شاقىردى. سوعىس ارداگەرىنىڭ ەرلىك پەن توزىمدىلىككە تولى عۇمىرى جاس ۇرپاققا ۇلگى بولىپ قالا بەرمەك.
