بۇگىنگى تاڭدا ەلىمىزدە كوپتەگەن سالانى اۆتوماتتاندىرۋ ۇدەرىسى جوعارى قارقىنمەن ءجۇرىپ جاتىر. بۇدان دەنساۋلىق ساقتاۋ سالاسى دا تىس قالىپ جاتقان جوق. روبوت-كۋرەر – سونىڭ ءبىر دالەلى. وسى روبوت ارقىلى ەم الۋشىلارعا قىزمەت ساپاسىن جاقسارتۋعا بولادى. مۇنى ۋنيۆەرسيتەتتىڭ جاس عالىمدارى مەن روبوتتەحنيكا جانە اۆتوماتيكا تەحنيكالىق قۇرالدارى كافەدراسىنىڭ ستۋدەنتتەرى جاساعان. روبوت-كۋرەر اۋرۋحانادا ەم الىپ جاتقاندارعا كەرەكتى ءدارى-دارمەكتى جەتكىزىپ بەرۋگە ارنالعان. نەگىزىنەن, ءدارى-دارمەكتى مەديتسينا قىزمەتكەرلەرى تاسۋشى ەدى عوي. ەندى ونى روبوت-كۋرەر اتقارسا تاماشا ەمەس پە؟! قازاقشا ايتقاندا, روبوت-كۋرەر مەديتسينا ماماندارىنىڭ قولىن ۇزارتادى. مۇندا بارلىق جۇيە اۆتوماتتاندىرىلىپ, زاماناۋي قۇرالدارمەن جابدىقتالعان. اسىرەسە قۇرىلعىداعى اۆتونومدى ناۆيگاتسيانىڭ قىزمەتى زور. ول روبوتتىڭ باعدارىن وڭتايلى ەتىپ, ءدارى-دارمەكتى جەتكىزۋدى جىلدامداتادى. قىسقاسى, روبوت-كۋرەر سۇرانىس بويىنشا ەمدەلۋشىگە ءدارى-دارمەكتى ءارى جىلدام, ءارى قاۋىپسىز جەتكىزەدى.
وسى كومەكشى قۇلتەمىردى جاساعان توپتىڭ جەتەكشىسى نۇرلان بايانبايدىڭ ايتۋىنشا, بۇل يدەيا وعان پاندەميا كەزىندە كەلىپتى.
«مۇنداي روبوت-كۋرەر بىرقاتار شەت مەملەكەتتە جاقسى دامىعان. ولار ءدارى-دارمەكتى پاتسيەنت جاتقان ءاربىر پالاتاعا قاۋىپسىز جەتكىزىپ بەرەدى. سونى كوزىمەن كورىپ, وسىنداي روبوتتى ءبىز نەگە جاساماسقا دەگەن وي كەلدى. ءسويتىپ, بىردەن باستاپ كەتتىك. الدىمەن شاعىن روبوت-كۋرەر جاسادىق. ول ويىمىزدان شىقتى. سودان كەيىن ۋنيۆەرسيتەت قولداۋىمەن ونىڭ ۇلكەن نۇسقاسىن جاساپ شىعاردىق. ازىرشە ونى ءوزىمىز سىناقتان وتكىزدىك. الداعى تاڭدا وسىنداي روبوتتاردى شىعارۋدى دامىتساق دەيمىز. ويتكەنى بۇعان سۇرانىس جوعارى بولارى انىق. وعان تولىق كوزىم جەتەدى. مىسالى, الماتىداعى №4 قالالىق اۋرۋحانادا جۇمىس ىستەپ جۇرگەندە وسىنداي پروبلەما بار ەكەنىن بايقادىم. ءبىز جاساعان روبوت-كۋرەر مەديتسينالىق عيمارات ىشىندە ەركىن ءجۇرىپ, ءدارى-دارمەكتى قويمادان ءاربىر ەمدەلۋشىگە ءوزى اپارادى», دەدى ول.
جاس عالىمدار روبوتكۋرەردى وتاندىق ماتەريالدان جاساعان. ەلەكتروندىق قۇرالدار عانا شەتەلدەن الىنعان. وسى توپقا جەتەكشىلىك ەتكەن نۇرلان بايانباي 2018 جىلدان بەرى كورنەكتى عالىمنىڭ ەسىمىن يەلەنگەن جوعارى وقۋ ورنىندا قىزمەت ىستەيدى. سانكت-پەتەربۋرگ قالاسىندا ماگيستراتۋرانى وقىپ, ق. ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ دوكتورانتۋراسىن تامامداعان. بيىل «بولاشاق» باعدارلاماسىمەن ۇلىبريتانيادا ءبىلىمىن ودان ءارى تەرەڭدەتۋگە اتتانىپ بارادى. قىسقاسى, يگىلىكتى دۇنيەنى جاساعان جاس عالىمداردى قولداپ, روبوت-كۋرەردىڭ سانىن كوبەيتسەك, مەديتسينالىق قىزمەتتىڭ ساپاسى ارتا تۇسەرى انىق.
