جەزقازعان قالاسىنىڭ شەتكەرى جاعىنان جاڭا مۇناي بازاسىنىڭ قۇرىلىسى باستالدى. ءساتىن سالسا, 2025 جىلدىڭ تامىزىندا پايدالانۋعا بەرىلەدى. ءوڭىردىڭ ەنەرگەتيكالىق قاۋىپسىزدىگىن قامتاماسىز ەتۋدى ماقسات تۇتقان جوبانى ىسكە اسىرۋ ءۇشىن «PetroRetail PFS» جشس 4,5 ملرد تەڭگە ينۆەستيتسيا سالۋدى كوزدەپ وتىر.
«وبلىستا قازىر ءبىر عانا مۇناي بازاسى بار. ءبىز قولعا العان جوبا جۇزەگە اسقان كەزدە بۇل سالادا ايماقتا باسەكەلەستىك پايدا بولادى. ال باسەكەلەستىك بار جەردە, قىزمەت كورسەتۋ ساپاسى ارتادى. مۇنى حالىق جاقسى بىلەدى», دەيدى «PetroRetail PFS» جشس قۇرىلىس ىستەرى جونىندەگى ديرەكتورى اندرەي يۋرەۆيچ ناۋمەنكو.
جاڭا مۇناي بازاسى جازعى جانە قىسقى ديزەل وتىنىن, اي-92 جانە اي-95 ماركالى بەنزيندى قابىلداۋ, ساقتاۋ جانە بوساتۋعا لايىقتالىپ سالىنباق. جانارماي ساقتايتىن رەزەرۆۋارلىق پارك كولەمى ازىرگە 5 مىڭ تەكشە مەترگە جوسپارلانعان. دەگەنمەن كەيىن ونىڭ كولەمىن 10 مىڭ تەكشە مەترگە ۇلعايتۋ مۇمكىندىگى دە ەسەپتەلىپ وتىر. جوبانىڭ جالپى اۋدانى – 7 گەكتار. ونىڭ 5 گەكتارىنا قۇرىلىس جۇرگىزىلەدى.
جوبا بويىنشا مۇندا 5 ۆاگون-تسيستەرناعا قۇيىلاتىن تەمىرجول ەستاكاداسى, سورعى ستانساسى جانە اۆتوتسيستەرنالارعا قۇيۋ ستانساسى, ترانسفورماتورلىق قوسالقى ستانسا جانە ديزەلدىك ەلەكتر ستانساسى, اكىمشىلىك كورپۋس, تەمىرجول جانە باسقا دا نىساندار ورنالاستىرىلادى.
«جوبالاردى قاراستىرعاندا تەك بۇگىنگى كۇندى ەمەس, كەلەشەكتى دە ەسكەرۋىمىز كەرەك. كوپ ۇزاماي جەزقازعان-قىزىلوردا اۆتوجولىن كۇردەلى جوندەۋدەن وتكىزۋ باستالادى. سول جولدىڭ قۇرىلىسىنا پايدالانۋ ءۇشىن دە قانشاما جانار-جاعارمايعا قاجەتتىلىك تۋىندايتىنىن ويلاي بەرىڭىز. جول پايدالانۋعا بەرىلگەن سوڭ جەزقازعان ارقىلى جۇزەگە اساتىن كولىك قاتىناسىنىڭ كۇرت كوبەيەتىنى ايتپاسا دا تۇسىنىكتى. سوندىقتان «PetroRetail PFS» جشس-نىڭ وڭىرىمىزگە كەلىپ, ينۆەستيتسيا قۇيىپ جاتقانىنا تەك قۋانامىز. ولاردىڭ جۇمىسىنا ساتتىلىك تىلەيمىز», دەدى وبلىس اكىمىنىڭ ورىنباسارى الماز ىدىرىسوۆ.
جاڭا ءىستى باستاۋ وڭايعا سوقپايدى. جاس وبلىستىڭ وزىندىك قيىنشىلىققا تاپ بولىپ جاتقانى دا بەلگىلى. بىراق تىعىرىقتان شىعار جول ارقاشان تابىلادى. وڭىرگە ينۆەستيتسيا تارتۋ – سول قيىنشىلىقتاردى ەڭسەرۋدىڭ باستى العىشارتى.
جەزقازعاندا ىرگەتاسى قالانعان جاڭا مۇناي بازاسى ينۆەستيتسيالىق مۇمكىندىكتەردى ىسكە قوسۋ ارقىلى ءوڭىردىڭ كەلەشەگىن كەمەلدەندىرە تۇسۋگە جاسالعان كەزەكتى قادام ىسپەتتى.
