تاڭەرتەڭنەن باستاپ الاڭعا ادامدار اعىلىپ, اسكەري وركەسترلەردىڭ ونەرىن, ساپتىق كورسەتىلىمدەردى جانە تەحنيكا كورمەسىن تاماشالادى. باعدارلامانىڭ نەگىزگى بولىگىندە بىرىككەن اسكەري وركەسترلەر مەن قۇرمەت قاراۋىلى روتاسى ونەر كورسەتتى. اسكەري قىزمەتكەرلەر قارۋمەن كۇردەلى قيمىلدار جاساپ, جوعارى دەڭگەيدەگى ۇيلەسىمدىلىكتەرىن كورسەتتى.
كونتسەرتكە قازاقستان قارۋلى كۇشتەرىنىڭ ۇلتتىق اسكەري-پاتريوتتىق ورتالىعىنىڭ, مەملەكەتتىك كۇزەت قىزمەتىنىڭ, ۇلتتىق ۇلان مەن ۇقك شەكارا قىزمەتىنىڭ وركەسترلەرى قاتىستى. ولار اسكەري مارشتارمەن قاتار قازاق اندەرىن دە زاماناۋي ۇلگىدە ورىندادى.
مەرەكەلىك شارا بارىسىندا اسكەري تەحنيكا مەن قارۋ-جاراق كورمەسى دە ۇيىمداستىرىلدى. كەلۋشىلەر بروندى كولىكتەردى كورىپ, كەي تەحنيكالاردىڭ ىشىنە كىرىپ, سۋرەتكە تۇسۋگە مۇمكىندىك الدى.
كوپشىلىكتىڭ ەرەكشە قىزىعۋشىلىعىن زاماناۋي روبوتتاندىرىلعان جۇيەلەر تۋدىردى. توتەنشە جاعدايلار مينيسترلىگىنىڭ ماماندارى ءورت كەزىندە قولدانىلاتىن ءتورت اياقتى Unitree B2 Fire روبوتىن تانىستىردى. سونىمەن بىرگە جاڭا بۋىنداعى ۇشقىشسىز ۇشۋ اپپاراتتارى دا كورسەتىلدى.
شارا سوڭىندا بىرىككەن وركەستر پاتريوتتىق شىعارمالاردى ورىنداپ, كورەرمەندەر ۇزاق ۋاقىت تارقاماي, تەحنيكا جانىندا سۋرەتكە ءتۇسىپ, اسەرلەرىمەن ءبولىستى. كوپتەگەن استانالىق ءۇشىن بۇل كۇن ارميا مەن قوعامنىڭ بىرلىگىن ايقىندايتىن ەرەكشە مەرەكەگە اينالدى.
