دەلەگاتتار الدىندا ءسوز سويلەگەن «ادىلەت» پارتياسىنىڭ توراعاسى نەگىزگى جۇمىس باعىتتارىن ايقىندادى:
ء«بىزدىڭ پارتيامىزدىڭ نەگىزى زاڭ ۇستەمدىگى مەن ءتارتىپ قاعيداتتارىنا قۇرىلادى. حالىقتىڭ زاڭ ۇستەمدىگىنە دەگەن سەنىمى – مەملەكەتتىڭ باستى رەسۋرسى ءارى تىرەگى. سوندىقتان ءبىزدىڭ نەگىزگى مىندەتىمىز – ادىلدىكتى جاريالاۋ عانا ەمەس, ونى ورتاق مادەنيەتىمىزدىڭ اجىراماس بولىگىنە ءارى كۇندەلىكتى ءومىرىمىزدىڭ شارتىنا اينالدىرۋ. باسقاشا ايتقاندا, ادىلدىك ۇلتتىق سانا مەن بولمىستىڭ ايرىقشا سيپاتىنا اينالۋعا ءتيىس. مەملەكەت باسشىسى قاسىم-جومارت توقاەۆ ءوز نازارىن ۇنەمى ءدال وسى باعىتقا اۋدارىپ كەلەدى», دەدى ايبەك دادەباي.
«ادىلەت» پارتياسى ءوز قىزمەتىن زاڭ جانە ءتارتىپ, ءتيىمدى ينستيتۋتتار, قۋاتتى وڭىرلەر – قۋاتتى ەل, ءىس جۇزىندەگى حالىق ۇنىنە قۇلاق اساتىن مەملەكەت, ادىلەتتى ءارى باسەكەگە قابىلەتتى ەكونوميكا, الەۋمەتتىك ىنتىماق پەن اتاۋلى قولداۋ, ادامي الەۋەتكە باسىمدىق بەرۋ, تسيفرلىق مەملەكەت, تازا قازاقستان, جاۋاپتى ورتا دەرجاۆا جانە جاڭا گەوساياسي ەتيكا قاعيداتتارى توڭىرەگىندە قۇرادى.
«ادىلەت» يدەولوگياسىنىڭ نەگىزىندە قازاقستاننىڭ جارقىن بولاشاعى ءار ازاماتتىڭ بۇگىنگى كۇندەلىكتى تاڭداۋى ارقىلى قالىپتاسادى دەگەن سەنىم جاتىر. بۇل – ادال ەڭبەك ەتۋ, زاڭدى قۇرمەتتەۋ جانە ەل ومىرىنە بەيجاي قاراماي, قوعام ىسىنە بەلسەندى اتسالىسۋ.
ء«بىزدىڭ نيەتتەستەرىمىز – ءدال وسىنداي ازاماتتار. ولار – بەلسەندى, جاۋاپكەرشىلىگى جوعارى, ەل دامۋىنا ۇلەس قوساتىن جاندار. ءبىز بىرگە ەڭبەك ەتەمىز, جۇمىستى اشىق, ادال ءارى قوعام الدىندا ەسەپ بەرە وتىرىپ جۇرگىزەمىز. ءبىز جەڭىل شەشىمدەر ۇسىنبايمىز. جۇيەلى, جاۋاپتى جانە دايەكتى جۇمىس جۇرگىزۋگە ۋادە بەرەمىز», دەپ اتاپ ءوتتى ايبەك دادەباي.
پارتيا ۇستانىمدارى قازاقستاندىقتاردىڭ كەڭ قولداۋىنا يە بولدى. 30 ساۋىردە ىسكە قوسىلعان http://adilet-partiyasy.kz/ تسيفرلىق پلاتفورماسى ارقىلى پارتيا قاتارىنا كىرۋگە 9000-نان استام ءوتىنىش كەلىپ ءتۇستى.
پارتيانىڭ قۇرىلۋى 2026 جىلعى 15 ناۋرىزدا قابىلدانعان قازاقستان رەسپۋبليكاسىنىڭ جاڭا كونستيتۋتسياسىندا بەكىتىلگەن قۇندىلىقتاردىڭ ءىس جۇزىندەگى ناقتى كورىنىسى بولدى. قۇرىلتاي سەزى «ادىلەتتىڭ» تاۋەلسىزدىك بۋىنىنىڭ پارتياسى رەتىندەگى مارتەبەسىن راستاپ, ونىڭ وكىلدى دەموكراتيا ينستيتۋتتارى مەن زاڭ ۇستەمدىگىن نىعايتۋعا باعىتتالعانىن كورسەتتى.
