پارتيا توراعاسى بولىپ دادەباي ايبەك ارقاباي ۇلى سايلاندى. دەلەگاتتار الدىندا ءسوز سويلەگەن «ادىلەت» پارتياسىنىڭ توراعاسى نەگىزگى جۇمىس باعىتتارىن ايقىندادى.
ء«بىزدىڭ پارتيامىزدىڭ نەگىزى زاڭ ۇستەمدىگى مەن ءتارتىپ قاعيداتتارىنا قۇرىلادى. حالىقتىڭ زاڭ ۇستەمدىگىنە دەگەن سەنىمى – مەملەكەتتىڭ باستى رەسۋرسى ءارى تىرەگى. سوندىقتان ءبىزدىڭ نەگىزگى مىندەتىمىز – ادىلدىكتى جاريالاۋ عانا ەمەس, ونى ورتاق مادەنيەتىمىزدىڭ اجىراماس بولىگىنە ءارى كۇندەلىكتى ءومىرىمىزدىڭ شارتىنا اينالدىرۋ. باسقاشا ايتقاندا, ادىلدىك ۇلتتىق سانا مەن بولمىستىڭ ايرىقشا سيپاتىنا اينالۋعا ءتيىس. مەملەكەت باسشىسى قاسىم-جومارت توقاەۆ ءوز نازارىن ۇنەمى ءدال وسى باعىتقا اۋدارىپ كەلەدى», دەدى ايبەك دادەباي.
«ادىلەت» پارتياسى ءوز قىزمەتىن زاڭ جانە ءتارتىپ, ءتيىمدى ينستيتۋتتار, قۋاتتى وڭىرلەر – قۋاتتى ەل, ءىس جۇزىندەگى حالىق ۇنىنە قۇلاق اساتىن مەملەكەت, ادىلەتتى ءارى باسەكەگە قابىلەتتى ەكونوميكا, الەۋمەتتىك ىنتىماق پەن اتاۋلى قولداۋ, ادامي الەۋەتكە باسىمدىق بەرۋ, تسيفرلىق مەملەكەت, تازا قازاقستان, جاۋاپتى ورتا دەرجاۆا جانە جاڭا گەوساياسي ەتيكا قاعيداتتارى توڭىرەگىندە قۇرادى.
«ادىلەت» يدەولوگياسىنىڭ نەگىزىندە قازاقستاننىڭ جارقىن بولاشاعى ءار ازاماتتىڭ بۇگىنگى كۇندەلىكتى تاڭداۋى ارقىلى قالىپتاسادى دەگەن سەنىم جاتىر. بۇل – ادال ەڭبەك ەتۋ, زاڭدى قۇرمەتتەۋ جانە ەل ومىرىنە بەيجاي قاراماي, قوعام ىسىنە بەلسەندى اتسالىسۋ.
ء«بىزدىڭ نيەتتەستەرىمىز – ءدال وسىنداي ازاماتتار. ولار – بەلسەندى, جاۋاپكەرشىلىگى جوعارى, ەل دامۋىنا ۇلەس قوساتىن جاندار. ءبىز بىرگە ەڭبەك ەتەمىز, جۇمىستى اشىق, ادال ءارى قوعام الدىندا ەسەپ بەرە وتىرىپ جۇرگىزەمىز. ءبىز جەڭىل شەشىمدەر ۇسىنبايمىز. جۇيەلى, جاۋاپتى جانە دايەكتى جۇمىس جۇرگىزۋگە ۋادە بەرەمىز», دەپ اتاپ ءوتتى ايبەك دادەباي.
«ادىلەت» پارتياسى ءوز قۇندىلىقتارى رەتىندە ادىلەتتىلىك, پاتريوتيزم, جاۋاپكەرشىلىك, ەڭبەكقورلىق جانە دامۋدى جاريالادى. باعدارلامادا «زاڭ مەن ءتارتىپ» قاعيداسى باستى نەگىز رەتىندە كورسەتىلگەن.
پارتيانىڭ ماقساتى – قازاقستانداعى ءاربىر ادال ەڭبەكتىڭ ءادىل ءارى لايىقتى باعالانۋىنا جاعداي جاساۋ. سونىمەن قاتار ەلدىڭ تەحنولوگيالىق, ينتەللەكتۋالدىق جانە ينستيتۋتسيونالدىق دامۋىن قولداۋ كوزدەلگەن.
ءبىلىم, دەنساۋلىق ساقتاۋ, عىلىم, مادەنيەت جانە كرەاتيۆتى يندۋستريالاردى دامىتۋعا ەرەكشە كوڭىل بولىنەدى. مەديتسينا سالاسىندا باستى نازار ادامنىڭ دەنساۋلىعىنا اۋدارىلىپ, العاشقى مەديتسينالىق كومەكتى كۇشەيتۋ جانە دارىگەرلەردىڭ جاعدايىن جاقسارتۋ جوسپارلانعان.
ايماقتاردىڭ تەڭ دامۋى دا نەگىزگى باعىتتاردىڭ ءبىرى رەتىندە قاراستىرىلعان. پارتيا پىكىرىنشە, ءار ءوڭىردىڭ ورتالىقتان ءادىل قولداۋ الۋى ماڭىزدى.
حالىقارالىق دەڭگەيدە «ادىلەت» قازاقستاندى ورتا دەرجاۆالىق جانە تۇراقتاندىرۋشى ەل رەتىندە كورسەتۋگە ۇمتىلادى.
سونىمەن قاتار پارتيا ءاربىر ۋادەسى بويىنشا تۇراقتى تۇردە جاريا ەسەپ بەرۋدى ەنگىزۋدى جوسپارلاپ وتىر.
«ادىلەت» پارتياسى ارنايى تسيفرلىق پلاتفورمانى ىسكە قوستى, ول ارقىلى ازاماتتار مۇشەلىككە ءوتىنىش بەرە الادى جانە باستامالار ۇسىنا الادى.
پارتياعا 18 جاسقا تولعان, زاڭ تالاپتارىنا ساي ازاماتتار مۇشە بولا الادى. قازىرگى تاڭدا ۇيىمعا 9812 ادام تىركەلگەن, بۇل زاڭمەن بەلگىلەنگەن تالاپتاردى تولىق ورىندايدى.
قۇرىلتاي سەزى پارتيانى رەسمي تىركەۋدىڭ ماڭىزدى كەزەڭى ءارى قازاقستانداعى ساياسي مادەنيەتتى دامىتۋداعى ماڭىزدى قادام رەتىندە باعالانۋدا.
