ەتنولاگەردىڭ نەگىزگى ماقساتى – بالالاردىڭ جازعى دەمالىسىن ءتيىمدى ۇيىمداستىرا وتىرىپ, ۇلتتىق سانا-سەزىمى قالىپتاسقان, جالپىادامزاتتىق قۇندىلىقتاردى ءوزارا ۇشتاستىرا الاتىن ۇلتجاندى تۇلعا تاربيەلەۋ. ماۋسىمدا جۇمىسىن باستاعان ەتنولاگەر شىلدەنىڭ سوڭىنا دەيىن ءتورت اۋىسىم بويى جۇمىس
ىستەيدى.
ء«تىلىمىزدى, ءدىنىمىزدى, ونەرىمىزدى وقۋشىلار بالا كۇنىنەن باستاپ بويىنا ءسىڭىرۋى كەرەك. سوندا ءبىز ناعىز ۇلتجاندى ازاماتتى, ەلىمىزدى كوركەيتەتىن قىز بەن ۇل تاربيەلەيمىز. شەبەر مۇعالىمدەرىمىز, اجەلەر قاۋىمى وسكەلەڭ ۇرپاققا كيىز باسۋدى, ءجۇن ءتۇتۋدى, قامشى ءورۋدى, باسقا دا قولونەردى, تەرىمەن جۇمىس ىستەۋدى, ۇلتتىق تاعامدار دايىنداۋدى ۇيرەتەدى», دەدى م.اۋەزوۆ اتىنداعى №86 مەكتەپ-گيمنازيا ديرەكتورى گۇلميرا ورالقىزى.
«سارىجايلاۋ» ەتنولاگەرىندە ءبىرىنشى ماۋسىمدا 300-گە جۋىق وقۋشى دەمالدى. ال قازىر ەكىنشى ماۋسىمدا 200-گە تارتا وقۋشى قامتىلعان. بۇعان دەيىن قالىپتاسقان, تاپتاۋرىن لاگەرلىك جۇيەگە تىڭ جاڭاشىلدىق ەنگىزىپ, ۇلتتىق بولمىستى تانۋ تۇرعىسىندا ۇيىمداستىرىلعان وسىنداي لاگەردى بابادان قالعان مۇرالاردى كەلەشەك ۇرپاققا جالعاۋدىڭ التىن كوپىرى دەۋگە تولىق نەگىز بار.
بۇل جاقتا كۇن ءتارتىبى «قارا جورعا» بيىمەن باستالادى. ودان كەيىن «سالت-داستۇرلەردى ۇيرەنۋ», «قولونەر», «ۇلتتىق تاعامدار», «قىش ونەرى» سياقتى شەبەرلىك ساباقتارى وتەدى. بۇعان قوسا, «ۇلتتىق ءداستۇرىن ۇلىقتاعان ۇرپاق» تاقىرىبىندا «اجەلەر مەكتەبىنىڭ» ساباقتارى, توعىزقۇمالاق, بەس اسىق سياقتى ۇلتتىق ويىندار, روبوتتەحنيكا جانە STEM ساباقتارى, دومبىرا مەن ءان ساباقتارى ۇيىمداستىرىلادى.
اتالعان ەتنولاگەردە وقۋشىلار جازعى دەمالىسىن ءتيىمدى ءارى پايدالى وتكىزەتىنى انىق. ون كۇن بويى ءبىر ۇيىرمەگە قاتىسىپ, ءوزى قىزىققان ءىستى نەمەسە ونەردى تولىق ۇيرەنبەسە دە, الىپپەسىن مەڭگەرىپ, تانىم ىرگەتاسىن قالىپتاستىرىپ شىعادى. ايتا كەتەيىك, استانا قالاسى ءبىلىم ۇيىمدارىنىڭ بازاسىندا 97 مەكتەپ جانىنداعى لاگەر, وقۋشىلاردىڭ قىزىعۋشىلىقتارى بويىنشا 75 بەيىندىك لاگەر جانە 21 ەتنولاگەر بار.
