فوتو: قاراعاندى وبلىسى تجد
29 ماۋسىمدا 13 جانە 15 جاستاعى ەكى وقۋشى قىزدىڭ بۇقار جىراۋ اۋدانى قىزىلجار اۋىلى ماڭىندا سۋعا باتىپ كەتكەنى حابارلانعان ەدى. ولاردىڭ ءبىرى بىردەن تابىلىپ, ەكىنشىسىن ىزدەۋ ءۇش كۇنگە سوزىلعان. ىزدەۋ جۇمىستارىنا توتەنشە جاعدايلار دەپارتامەنتى, پوليتسيا جانە تەمىرتاۋ اڭشىلار مەن بالىقشىلار قوعامىنىڭ 40 قىزمەتكەرى, تۋىستارى مەن جەرگىلىكتى تۇرعىندار جۇمىلدىرىلعانى ايتىلدى. قۇتقارۋشىلار نۇرا وزەنىنىڭ ءتۇبىن, ارناسىن, جاعالاۋ ايماعىن تەكسەرگەن.
اتالعان وبلىستىڭ تجد ءباسپاسوز قىزمەتى: «بۇگىن تاڭعى ساعات 08:50-دە سۇڭگۋىرلەر 15 جاستاعى قىزدىڭ ءمايىتىن تاپتى. ول وزەننەن شومىلۋ ورنىنان شامامەن 1300 مەتر قاشىقتىقتا تابىلدى. ىزدەستىرۋگە 40 ادام, 9 تەحنيكا, 7 ءجۇزۋ قۇرالدارى جۇمىلدىرىلدى. ىزدەۋ جۇمىستارىن جۇرگىزۋ ناشار كورىنۋ جانە اعىنعا بايلانىستى قيىندادى. بۇل وقيعا سۋداعى قاۋىپسىزدىك ەرەجەلەرىن ساقتاۋدىڭ ماڭىزدىلىعىن كورسەتەدى», دەپ حابارلادى.
