جاساندى ينتەللەكت ارقىلى ونلاين اۋدارماشىعا جاڭادان 110 ءتىل قوسىلدى. ولاردىڭ اراسىندا بەس تۇرىك ءتىلى بار. اتاپ ايتساق, باشقۇرت, چۋۆاش, ياكۋت, تۋۆا, سونداي-اق قىرىم تاتارلارىنىڭ تىلىندەگى ماتىندەر ەندى وزگە تىلدەرگە ەمىن-ەركىن اۋدارىلادى. قىزمەت ونلاين ۇلگىدە, ينتەرنەتكە كىرۋ مۇمكىندىگى بار كەز كەلگەن قولدانۋشىعا قولجەتىمدى. كومپانيانىڭ حابارلاماسىندا ايتىلعانداي, جاڭارتۋ 614 ميلليوننان استام ادامدى نەمەسە جەر تۇرعىندارىنىڭ شامامەن سەگىز پايىزىن قامتيدى.
«ولاردىڭ كەيبىرى – 100 ميلليوننان استام سويلەۋشىسى بار نەگىزگى الەمدىك تىلدەر. ال كەي تىلدەر جەرگىلىكتى شاعىن قاۋىمداستىقتاردا عانا قولدانىستا. ءتىپتى بۇل باعدارلاماعا انا ءتىلى جويىلىپ كەتكەن حالىقتاردىڭ دا سوزدەرى ەنگىزىلگەن», دەپ حابارلايدى «Google» كومپانياسى.
ونلاين اۋدارماشى جۇيەگە قوسىلعان بارلىق ءتىل اراسىندا جەكە سوزدەر مەن سويلەمدەردى, ماتىندەردى, سونداي-اق تۇتاس ۆەب-پاراقشالاردى اۋدارۋ مۇمكىندىگىنە يە. «Google» اۋدارماشىنىڭ دا باسقا ماشينالىق اۋدارماشى قۇرالدار سياقتى وزىندىك شەكتەۋلەرى بار. وقىرمانعا شەت تىلدەگى ءماتىننىڭ مازمۇندىق ماعىناسىن تۇسىندىرۋگە كومەكتەسكەنىمەن, ءاردايىم ناقتى اۋدارمانى جەتكىزىپ بەرە المايدى. ارينە, كەڭ قولدانىستاعى كەيبىر تىلدەردىڭ اۋدارما ناتيجەسى جاقسىراق بولىپ كەلەدى. مىسالى, «Google Translate» اعىلشىن ءتىلى مەن ەۋروپا وداعى تىلدەرى اراسىندا ساپالى اۋدارما جاسايدى.
ايتا كەتەيىك, قازاق ءتىلى «Google» ونلاين اۋدارما جۇيەسىنە ون جىل بۇرىن, ناقتىراق ايتساق, 2014 جىلدىڭ 12 جەلتوقسانىندا قوسىلدى. جىل وتكەن سايىن اۋدارما ساپاسى جاقسارىپ, بازاداعى قازاق ءتىلىنىڭ سوزدىك قورى ارتا تۇسكەن.
